काठमाडौं– संयुक्त राष्ट्रसंघको ८१औँ महासभामा सहभागी हुन परराष्ट्रमन्त्री शिशिर खनालको नेतृत्वमा नेपाली टोली आइतबार साँझ अमेरिकाको न्युयोर्क प्रस्थान गरेको छ। प्रधानमन्त्री बालेन्द्र शाह भने उच्चस्तरीय नेपाली प्रतिनिधिमण्डलको नेतृत्व गर्दै मंगलबार (सेप्टेम्बर २२) न्युयोर्क जाने कार्यक्रम छ।
संयुक्त राष्ट्रसंघको ८१औँ महासभाको उच्चस्तरीय सप्ताहअन्तर्गत सेप्टेम्बर २२ देखि २८ सम्म महासभाको सामान्य बहस हुनेछ। यस क्रममा विश्वका राष्ट्र तथा सरकार प्रमुखहरूले विभिन्न अन्तर्राष्ट्रिय मुद्दामा आफ्ना धारणा राख्नेछन्।
परराष्ट्रमन्त्री खनालले महासभाको उच्चस्तरीय सत्रअन्तर्गत विभिन्न उच्चस्तरीय बैठक, सहायक कार्यक्रम तथा मन्त्रीस्तरीय कार्यक्रममा सहभागिता जनाउनेछन्। उनले विभिन्न मुलुकका आफ्ना समकक्षी तथा अन्य विशिष्ट व्यक्तित्वसँग द्विपक्षीय भेटवार्ता गर्ने कार्यक्रमसमेत रहेको परराष्ट्र मन्त्रालयले जनाएको छ।
प्रधानमन्त्री शाहले सेप्टेम्बर २४ मा महासभाको सामान्य बहसलाई सम्बोधन गर्ने कार्यक्रम छ। उनको नेतृत्वमा जाने नेपाली प्रतिनिधिमण्डलमा परराष्ट्रमन्त्री खनाल, प्रधानमन्त्रीका प्रमुख सल्लाहकार कुमार ब्यान्जनकार, परराष्ट्र सचिव अमृतबहादुर राई तथा नेपाल सरकारका अन्य वरिष्ठ अधिकारी सहभागी हुनेछन्।
गुटेरेससँग भेटवार्ता गर्ने
न्युयोर्कमा रहँदा प्रधानमन्त्री शाहले संयुक्त राष्ट्रसंघका महासचिव एन्टोनियो गुटेरेससँग भेटवार्ता गर्ने कार्यक्रमसमेत रहेको छ। प्रधानमन्त्री शाह सेप्टेम्बर २६ मा काठमाडौं फर्किने कार्यक्रम छ।
यसपटकको महासभामा नेपालको प्रतिनिधिमण्डल १४ सदस्यीय रहेको जनाइएको छ। प्रधानमन्त्रीको नेतृत्वमा महासभामा सहभागी हुने पछिल्ला प्रतिनिधिमण्डलमध्ये यो तुलनात्मक रूपमा सानो टोली हो।
संयुक्त राष्ट्रसंघको ८१औँ महासभाको उच्चस्तरीय सप्ताहमा सामान्य बहससँगै विकास, जलवायु परिवर्तन, समुद्री सतह वृद्धि, महामारी रोकथाम तथा आणविक निशस्त्रीकरणलगायत विषयमा विभिन्न उच्चस्तरीय बैठक आयोजना हुँदैछन्।
परराष्ट्रमन्त्री खनाल भने सेप्टेम्बर २९ मा नेपाल फर्किने कार्यक्रम रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
