काठमाडौं- नेपाली कांग्रेस केन्द्रीय कार्यसमितिको बैठकले हालै सम्पन्न संसद र प्रदेशसभाको निर्वाचनमा वाम गठबन्धन तथा मधेस गठबन्धनका कारण चुनावमा पराजय ब्यहोर्नुपरेको निष्कर्ष निकालेको छ। पार्टीले समग्र हारमा वाम गठबन्धन र प्रदेश २ को हारमा मधेस गठबन्धनलाई कारणको रुपमा ठहर गरेको छ।
उसले निर्वाचन समिक्षालाई मध्यनजर गर्दै जे-जस्ता कारणहरुले निर्वाचन परिणाम प्रतिकुल भयो नेपाली कांग्रेस केन्द्रीय समितिले त्यसको जिम्मेवारी लिने निर्णय गरेको छ।'हालै सम्पन्न संघीय संसद र प्रदेश सभाको निर्वाचनमा हामीले पराजय व्यहोर्नु परेको छ', बैठकपछि वितरित निर्णयमा भनिएको छ, 'नेपाल कम्युनिष्ट पार्टी (एकिकृत मार्क्सवादी, लेनिनवादी) र नेपाल कम्युनिष्ट पार्टी (माओवादी केन्द्र) ले निर्माण गरेको कम्युनिष्ट गठवन्धनले गर्दा समग्रमा तथा मधेश केन्द्रीत दलहरु, संघीय 8वादी फोरम र राष्ट्रिय जनता पार्टीको गठवन्धनले गर्दा प्रदेश नं. २ को निर्वाचनमा आशातीत सफलता प्राप्त गर्न सहज थिएन।
'पार्टीले उम्मेदवारी चयन प्रकृयालाई प्रयाप्त गृहकार्य गरी समयमा टुंगो लगाउन नसक्नु, स्थानीय, प्रदेश र केन्द्रीय तहमा पार्टीले दिएको उम्मेदवारको पक्षमा कतिपय स्थानमा निस्कृयता, असहयोग र अन्तर्घात जस्ता अनुशासनहिन क्रियाकलाप देखिनु, पार्टीको संरचनालाई पूर्णता दिई पार्टीको संगठनात्मक गतिविधिलाई तिव्रता दिन आवश्यक आन्तरिक व्यवस्थापनमा कमजोरी देखिनु, निर्वाचनमा जनमत सृजना गर्न सामाजिक संजाल र संचार माध्यमको प्रभावकारी ढंगबाट प्रयोग गर्न नसक्नु, अनेकन वाधा र अवरोधको वावजुद मुलुकको राजनैतिक, आर्थिक र सामाजिक विकासमा नेपाली कांग्रेसको सरकारका उपलव्धी बारे जनताका बीच प्रभावकारी प्रचार प्रसार गर्न नसक्नु लगायतका विषयहरु पनि प्रतिकुल परिणाम आउनुका कारण रहे', निर्णयमा भनिएको छ।
कांग्रेसले कम्युनिष्ट गठवन्धनले भारतले लगाएको नाकावन्दीका कारण पीडित नागरिकको मत आफ्नो पक्षमा प्रभावित पार्न सफल भएको पनि बताएको छ।
बैठकले भदौमा महासमितिको बैठक बस्ने निर्णय समेत गरेको छ। 'जिल्ला सभापति भेला एवं ग्राम र नगरपालिका तहसम्मको पार्टीको सांगठनिक संरचना तथा भातृ र शुभेच्छुक संस्थाहरु मार्फत राय सुझाव संकलन गरी पार्टीको विधानलाई आवश्यक परिमार्जन एवं संशोधन लगायत कार्यको तयारी गरी २०७५ भाद्र महिनामा नेपाली कांग्रेस महासमितिको बैठक आयोजना गर्ने', निर्णयमा भनिएको छ।
बैठकले विजयकुमार गच्छदारले नेतृत्व गरेको तत्कालीन नेपाल लोकतान्त्रिक फोरमसँग एकता गर्दा भएको सहमति अनुरुपका समायोजन कार्यलाई पूर्णता दिने निर्णय समेत गरेको छ।
गत चैत ९ देखि जारी बैठकमा चुनावी हारको जिम्मेवारी कसले लिने भन्ने विषयमा कुरा मिल्न नसक्दा केही दिनयता महामन्त्रीले प्रतिवेदन पेश गर्न सकेका थिएनन्। हिजो (शनिबार) बिहान बोलाइएको बैठक बस्दै नबसी स्थगित भएको थियो। आइतबार पनि बिहान ९ बजेको लागि बोलाइएको बैठक साँझ ६ बजेमात्रै बस्न सकेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
