काठमाडौं– लामो समयदेखि नेपाली कांग्रेसका सभापति गगनकुमार थापासँग राजनीतिक सहयात्रा गरिरहेका युवा नेता डिल्लीराम सुवेदीले पार्टीको सहमहामन्त्री खुलातर्फ उम्मेदवारी दर्ता गरेका छन्।
गण्डकी प्रदेशसभा सदस्यसमेत रहेका उनले नयाँ र पुरानो पुस्ताबीच पर्खाल खडा गर्ने नभई दुवै पुस्तालाई जोड्ने ‘सेतु’ बन्ने उद्देश्यले उम्मेदवारी दिएको बताए।
उम्मेदवारी दर्तापछि पत्रकारहरूसँग कुरा गर्दै उनले पुस्तान्तरणको चरणमा रहेको कांग्रेसमा नयाँ पुस्ताले नेतृत्वमा हस्तक्षेप बढाइरहेको र पुरानो पुस्तासँग लामो राजनीतिक अनुभव रहेको अवस्थामा यी दुईबीच द्वन्द्व नभई अनुभव र ऊर्जाको संयोजन आवश्यक रहेको मान्यताका आधारमा उम्मेदवारी दिएको बताए।
विद्यार्थी राजनीतिबाट कांग्रेसको मूलधारमा आएका सुवेदीले नेपाल विद्यार्थी संघबाट सक्रिय राजनीति सुरु गरेका थिए। सुवेदी काठमाडौं शिक्षा क्याम्पसको स्ववियु सभापति हुँदै नेविसंघको केन्द्रीय उपाध्यक्षसम्म भएका थिए। २०७३ सालमा नेविसंघको केन्द्रीय उपाध्यक्ष तथा गण्डकी प्रदेश संयोजक बनेयता उनी कांग्रेसको संगठन र वैचारिक राजनीतिमा सक्रिय छन्।
२०७९ को प्रदेशसभा निर्वाचनमा बागलुङ–१(२) बाट उनी गण्डकी प्रदेशसभा सदस्यमा निर्वाचित भएका थिए।
कांग्रेसभित्र अध्ययन, लेखन र वैचारिक बहसमा रुचि राख्ने नेताका रूपमा चिनिने सुवेदी पार्टीको इतिहास, लोकतान्त्रिक आन्दोलन र संविधान निर्माणसँग सम्बन्धित सामग्रीको लेखन तथा सम्पादनमा सक्रिय छन्।
सभापति थापासँगको सहलेखनमा प्रकाशित ‘नेपाली कांग्रेस र संविधानसभा’ उनको वैचारिक–लेखन यात्रासँग जोडिएको पुस्तक हो। गगन थापाले नै कांग्रेसका ऐतिहासिक दस्तावेज संकलन तथा सम्पादनमा सुवेदीलगायतको भूमिकाको उल्लेख गरेका छन्।
विद्यार्थी राजनीतिमा रहँदा सुवेदीले शैक्षिक तथा वैचारिक बहसलाई प्राथमिकता दिएका थिए। कांग्रेसको वैचारिक धरातल र समसामयिक राजनीतिक प्रश्नमा बहस गर्ने उद्देश्यले प्रकाशित ‘विचार विशेष’ जस्ता प्रकाशनसँग उनको संलग्नता रहँदै आएको छ।
उनले पार्टीको २०७२ सालमा सम्पन्न १३औँ महाधिवेशनको पूर्वसन्ध्यामा युवालाई नेतृत्वमा पर्याप्त स्थान दिनुपर्ने आवाज उठाएका थिए। उनी बागलुङबाट यस पटकसमेत गरी तेस्रोपटक महाधिवेशन प्रतिनिधि भएका हुन्।
प्रदेशसभामा रहँदा सुवेदीले गण्डकीको बजेटमा टुक्रे आयोजना र पहुँचका आधारमा योजना छनोट हुने प्रवृत्तिमाथि प्रश्न उठाउँदै आएका छन्।
को हुन् सुवेदी?
नेविसंघबाट राजनीति सुरु गरेका सुवेदी २०५३ सालमा जनता माध्यमिक विद्यालय, नारायणस्थानको नेविसंघ इकाइ अध्यक्ष, २०६० सालमा काठमाडौं शिक्षा क्याम्पसको इकाइ अध्यक्ष र २०६२ सालमा स्ववियु सभापति बनेका थिए।
२०५९ सालपछि प्रतिगमनविरुद्धको आन्दोलनमा काठमाडौंका सडकमा उनी निकै सक्रिय देखिएका थिए। २०६२/६३ को जनआन्दोलन उत्कर्षमा पुग्ने बेला स्ववियु सभापतिको भूमिकामा रहेका उनी पार्टीका विभिन्न आन्दोलन र अभियानमा सक्रिय हुँदै नेविसंघको केन्द्रीय उपाध्यक्ष तथा गण्डकी प्रदेश संयोजकको जिम्मेवारीसमेत सम्हालेका थिए।
डिल्लीराम राजनीतिक तथा शैक्षिक आन्दोलनमा निरन्तर अग्रपंक्तिमा सक्रिय देखिनुका साथै २०७२ र २०७८ सालमा पार्टीको केन्द्रीय महाधिवेशन प्रतिनिधि निर्वाचित भइसकेका छन्।
राजनीतिक नेतृत्वका अलावा कुशल राजनीतिक प्रशिक्षक, सामाजिक अभियन्ता तथा विभिन्न पुस्तक र पत्रिकाको लेखन तथा सम्पादनमा समेत उनी सक्रिय छन्। नेपाली कांग्रेसका महामन्त्री गगन थापाको नेतृत्व तथा स्वर्गीय समाजवादी चिन्तक प्रदीप गिरी र नरहरि आचार्यको सल्लाहमा प्रकाशित ‘विचार विशेष’ जर्नलको सम्पादकसमेत रहिसकेका छन्।
२०७२ सालको भूकम्पपछि क्षतिग्रस्त विद्यालयहरूको पुनर्निर्माण गर्न सहयोगी संस्थाहरूसँग हातेमालो गर्दै ‘मिलेर बनाऔँ विद्यालय’ अभियानमार्फत २०० भन्दा बढी विद्यालयमा स्थायी तथा अस्थायी संरचना निर्माणको संयोजन गरेका छन्।
डिल्लीराम तराई क्षेत्रमा बाढी आएका बेला ‘मायाले भरिएको बाल्टिन’ बोकेर दर्जनौँ बस्तीमा पुगेका थिए। कोभिड महामारीका बेला बागलुङका विभिन्न स्वास्थ्यचौकी एवं संस्थामा अक्सिजन सिलिन्डर, कन्सन्ट्रेटरलगायत स्वास्थ्य सामग्री लिएर पुगेका थिए।
शिक्षाका क्षेत्रमा काम गर्ने ५०० भन्दा बढी संस्थाको नेतृत्व गर्दै ‘शिक्षाका लागि राष्ट्रिय अभियान नेपाल’को अध्यक्षको जिम्मेवारीसमेत सम्हालिसकेका उनी भौतिक विकाससँगै मानवीय विकासको मुद्दालाई प्राथमिकतामा राख्छन्।
देशका ७० भन्दा धेरै जिल्लामा राजनीतिक अभियानका क्रममा पुगेका उनी विभिन्न सभा–समारोहमा प्रस्तुति दिन वा सहभागी हुन अमेरिका, बेलायत, युरोप, भारत, चीनलगायतका देशमा पुगेका छन्।
अंग्रेजी र समाजशास्त्रमा स्नातकोत्तर गरेका उनी वैचारिक राजनीतिका माध्यमबाट सकारात्मक परिवर्तन ल्याउन सकिने हुटहुटी बोकेर हिँडिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
