काठमाडौं–नेपाल धितोपत्र बोर्डका अध्यक्ष भीष्मराज ढुंगानाले घुमाउरो तरिकाले आफ्नो तलब सुविधा बढाएका छन्।
बोर्डका अध्यक्षले नेपाल सरकारको विशिष्ट श्रेणीको तलब सुविधा पाउने व्यवस्था छ। नेपाल राष्ट्र बैकबाट कार्यकारी निर्देशकबाट अवकासप्राप्त ढुंगानाले तलब बढाउन नपाउने भएपछि मासिक भत्तामा तीन गुणाले बढाएका हुन्।
बोर्डका अध्यक्षले मासिक १० हजार रुपैयाँ भत्ता पाउने व्यवस्था छ। उनले यस्तो भत्ता मासिक तलबको आधा पाउने गरि अर्थमन्त्रालयबाट स्वीकृत गराएका हुन्। अहिले उनको मासिक तलब ६५ हजार १२६ रुपैयाँ छ। यसै आधारमा उनले अबदेखि भत्ताको रुपमा ३२ हजार प्राप्त गर्ने छन्। अब उनले नियमित तलब र भत्तासहित ९७ हजार रुपैयाँ बुझ्ने छन्।
कर्मचारी नियमावलीमा बोर्डका अध्यक्षको तलब सुविधा के–के हुने भनेर तोकिएको हुन्छ। अध्यक्ष ढुंगानाले आफ्नो सेवासुविधा बढाउने गरि नियमावली संसोधन गरेका हुन्।
तर ढुंगानाले भने आफूले तलब भत्ता नबढाएको बताए। मन्त्रालय स्रोतका खाइपाई आएको तलबको आधा मासिक भत्ता पाउने गरी कर्मचारी नियमालीमा संसोधन गरिएको छ।
बोर्डका अध्यक्षले तलबभत्ताका साथै अन्य अधिकृत कर्मचारीले पाएसरह सञ्चय कोषको सुविधा प्राप्त गर्छन्। त्यस्तै अध्यक्षले प्रत्येक महिना औषधि उपचार खर्च प्राप्त गर्नुका साथै बिरामी परेर अस्पताल भर्ना भएको खण्डमा अस्पतालको विल बमोजिमको खर्च पाउछन्। अध्यक्षले नेपाल सरकारका विशिष्ट श्रेणीका कर्मचारीसरह सवारी साधन र टेलिफोन सुविधा पाउने व्यवस्था छ।
अध्यक्ष ढुंगानाले आफूले चढ्ने गाडीमा धेरै समस्या आएको भन्दै एक करोड २५ लाख रुपैयाँको गाडी किन्ने प्रस्ताव बोर्डमा पेश गर्न लागेका थिए। तर चर्को विरोध भएपछि उक्त योजनाबाट पछि हटेको बताइसकेका छन्। चौतर्फी विरोध भएपछि भाडाको गाडीका लागि सार्वजनिक सूचना जारी गर्न लागिएको उनले बताए।
कोरोना कहरको समयमा पनि डेढ करोडको गाडी किन्न लागेको समाचार नेपाललाइभमा प्रकाशित भएपछि ढुंगाना गाडी खरिदको योजनाबाट तत्काल पछि हटेका हुन्। नेपाल सरकारले गाडी खरिदमा मितव्ययी बन्ने नीति लिए पनि नियामक निकायले महंगोमा गाडी खरिद गर्न लागेको भन्दै चौतर्फी विरोध भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
