काठमाडौं- नेपाल धितोपत्र बोर्डले अध्यक्ष भीष्मराज ढुंगानाका लागि डेढ करोड रूपैयाँ मूल्य पर्ने नयाँ गाडी खरिदको प्रस्ताव गरेको छ। ढुंगानाले अहिले चढिरहेको गाडी पुरानो भएको, त्यसको इन्जिन मर्मत गरिसकेको र अध्यक्षले चढ्न नमिल्ने अवस्थामा पुग्न लागेको भन्दै नयाँ गाडी खरिदको प्रस्ताव गरिएको हो।
धितोपत्र बोर्ड स्रोतले दिएको जानकारीअनुसार गाडी खरिदको प्रस्ताव सञ्चालक समितिमा पुर्याइएको छ। सञ्चालक समितिले यसबारेमा निर्णय भने गरिसकेको छैन। 'प्रस्ताव गरिएको छ, निर्णय भइसकेको छैन,' धितोपत्र बोर्ड स्रोतले भन्यो।
कोरोना महामारीका कारण खर्चको संकट हुँदा सरकारले अधिकतम मितव्ययिताको नीति अपनाउने घोषणा गरिसकेको छ। तर यही बीचमा नियमनकारी निकाय बोर्डले भने ठूलो रकम खर्च गरेर अध्यक्षका लागि महँगो गाडी किन्ने प्रस्ताव गरेको हो।
अध्यक्षलाई महँगो र बिलासी गाडी किन्ने गरी बोर्डले प्रस्ताव तयार गरिसकेको छ। बोर्डले अध्यक्षका लागि खरिद गर्ने गाडीको स्पेसिफिकेसन तयार गरिसकेको छ। त्यस आधारमा कम्तिमा पनि डेढ करोड रूपैयाँ पर्ने गाडी किन्ने तयारी गरिएको स्रोतले दावी गरेको छ।
धितोपत्र बोर्डका तत्कालीन् अध्यक्ष डा रेवतबहादुर कार्कीको पालामा अध्यक्षले चढ्ने गरी एउटा गाडी किनिएको थियो। तर ४ वर्ष पनि नपुग्दै गाडी थोत्रो भएको र इन्जिनसमेत मर्मत गरिसकिएको भन्दै नयाँ गाडी किन्ने प्रस्ताव अघि बढाइएको स्रोतले जनाएको छ।
अध्यक्षलाई नयाँ गाडी किन्ने विषयमा बोर्डको उच्च व्यवस्थापनमा कार्यरत अधिकारीहरू नयाँ गाडी किन्ने पक्षमा छैनन्। ४ वर्षअघि मात्रै गाडी किनिएको र अहिले नै फेर्नुपर्ने अवस्था नरहेको बोर्डका एक अधिकारीले बताए।
नेपाल राष्ट्र बैंकको कार्यकारी निर्देशकबाट अवकाशप्राप्त ढुंगाना गत पुसमा धितोपत्र बोर्डको अध्यक्षमा खुला प्रतिस्पर्धाबाट नियुक्त भएका थिए। नियुक्त भएदेखि नै ढुंगानाले आफू चढ्ने गरी अध्यक्षका लागि उपयुक्त नभएको बताउँदै नयाँ किन्न दबाब दिन थालेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
