४ करोड रुपैयाँसम्म तलबभत्ता बुझ्छन् बैंकका सिइओ, कसको कति?

बैंक/बिमा/सेयर

४ करोड रुपैयाँसम्म तलबभत्ता बुझ्छन् बैंकका सिइओ, कसको कति?

अरुण सापकोटा सोमबार, पुस २७, २०७७, ०७:३२

काठमाडौं- 'क' वर्गका वाणिज्य बैंकका प्रमुख कार्यकारी अधिकृत (सिइओ)हरूले वार्षिक चार करोड रुपैयाँसम्म तलब सुविधा लिने गरेका छन्। अर्बौं रुपैयाँको निक्षेप तथा कर्जा लगानीको मुख्य जिम्मेवारी सिइओको हुने भएकाले उनीहरूको तलबभत्ता अन्य क्षेत्रका उच्च पदस्थ कर्मचारीहरूको भन्दा बढी हुन्छ।

आर्थिक वर्ष (आव) २०७६/७७ मा सम्बन्धित बैंकहरूले प्रकाशन गरेको विवरणअनुसार नेपालका २७ वाणिज्य बैंकमध्ये सबैभन्दा बढी तलबभत्ता स्ट्यान्डर्ड चार्टर्ड बैंकका प्रमुख कार्यकारी अधिकृत अनिर्वाण घोष दास्तीदारले बुझेका छन्। उनले उक्त आवमा झन्डै ४ करोड तलबभत्ताका रुपमा बैंकबाट बुझेका छन्। दास्तीदारले बोनससहित गत आवमा ३ करोड ९८ लाख रुपैयाँ बुझेको बैंकको विवरणमा उल्लेख छ।

सबैभन्दा बढी तलबभत्ता तथा सुविधा लिने सिइओको सूचीमा प्रभु बैकका प्रमुख कार्यकारी अधिकृत अशोक शेरचन रहेका छन्। उनले गत आवमा तीन करोड ४२ लाख रुपैयाँ तलबभत्ता तथा सुविधाबापत रकम बुझेका थिए।

नेपाल इन्भेष्टमेन्ट बैंकका प्रमुख कार्यकारी अधिकृत ज्योति प्रकाश पाण्डेले प्रभुका शेरचनलाई पछ्याएका छन्। गत आवमा पाण्डेले तीन करोड ६ लाख रुपैयाँ तलब भत्ता तथा अन्य सुविधा बुझेको बैंकको विवरण छ। उनले यसबाहेक नियमअनुसार बोनस रकम पनि प्राप्त गरेका छन्।

ग्लोबल आइएमई बैंकका सिइओ बढी तलबभत्ता बुझ्ने सूचीको चौथो नम्बरमा छन्। ग्लोबल आइएमई बैंक र जनता बैंक मर्ज हुनुअगाडि महेश प्रसाद ढकाल कार्यकारी सिइओ थिए। जनतालाई मर्ज गरेसँगै पर्शुराम कुँवर सिइओ बनेका थिए। संयुक्त रुपमा दुईले प्रमुख कार्यकारीको भूमिकामा दुई करोड ८२ लाख रुपैयाँ तलब भत्ता तथा अन्य सुविधा लिएको बैंकको विवरण छ। कुँवरले ग्लोबल आइएमई छाडिसकेका छन्।

आकर्षक तलब बुझ्नेमा बैंक अफ काठमाण्डूका सिइओ शोभनदेव पन्त पाँचौँ नम्बरमा छन्। उनले गत आवमा २ करोड ८१ लाख रुपैयाँबराबरको तलब भत्ता तथा अन्य सुविधा लिएको देखिएको छ।

त्यस्तै हिमालयन बैंकका सिइओ अशोक राणाले दुई करोड ७९ लाख रुपैयाँ तलब भत्ता तथा अन्य सुविधा प्राप्त गरेका छन्।

बजार विस्तारमा आक्रामक रुपमा प्रस्तुत भएको एनआईसी एसिया बैंकका प्रमुख कार्यकारी अधिकृत रोशन कुमार न्यौपानेले गत आवमा बोनसबाहेक २ करोड ५० लाख रुपैयाँ बुझेका छन्।

हालसम्म लेखापरीक्षण प्रतिवेदन सार्वजनिक गरेका बैंकहरूमध्ये सबैभन्दा कम लक्ष्मी बैंकका प्रमुख कार्यकारी अधिकृत अजय विक्रम शाहले एक करोड ९ लाख रुपैयाँ बुझेका छन्। यसबाहेक उनले नियम अनुसार थप बोनस रकम प्राप्त गर्छन्।

यो समाचार प्रकाशन हुँदाको मितिसम्म सिभिल बैँकले वार्षिक साधारणसभा आह्वान गरेको छैन। अघिल्लो आर्थिक वर्षको लेखापरीक्षण प्रतिवेदनअनुसार सिभिल बैंकका प्रमुख कार्यकारी अधिकृत गोविन्द गुरुङले एक करोड ४३ लाख रुपैयाँ बुझेका थिए।

बैंकिङ क्षेत्रमा अलि बढी चर्चा हुने गरेका सिइओ अनिल केशरी शाहको तलबभत्ता यस वर्ष घटेको छ। उनले यस वर्ष एक करोड ६२ लाख रुपैयाँ बुझेका छन्। गत वर्ष उनले तलब सुविधामा एक करोड ९८ लाख रुपैयाँ बुझेका थिए।

तीन वटा सरकारी लगानी भएका वाणिज्य बैंकबाहेक अन्य वाणिज्य बैंकका सिइओको तलब भत्ता तथा अन्य सुविधा एक करोड रुपैयाँ भन्दा बढी छ। गत वर्ष राष्ट्रिय वाणिज्य बैंकको सिइओको तलब नायब प्रमुख कार्यकारी अधिकृतको भन्दा कम हुन गएको थियो।

विदेशी लगानी भएका नेपाल एसबिआई बैंक र एभरेस्ट बैंकका सिइओले उनीहरुकै प्रतिनिधि बैंकबाट तलब सुविधा बुझ्छन्। उनीहरुका लागि नेपाली बैंकहरुले आवास, गाडी तथा अन्य सुविधा दिँदै आएका छन्।

प्रमुख कार्यकारी अधिकृतहरूले बैँकबाट नियमअनुसार प्राप्त गर्ने सेवा सुविधाका साथै अन्य विभिन्न लाभ समेत लिन्छन्। सिइओले बुझ्ने वार्षिक तलब सुविधासँगै करोडौं रुपैयाँ सरकारलाई कर पनि तिरिरहेका हुन्छन्। सबैभन्दा धेरै तलब बुझ्ने स्ट्यान्डर्ड चार्टर्ड बैंकका प्रमुख कार्यकारी अधिकृतले सरकारलाई एक करोड ९२ लाख रुपैयाँ बुझाएका छन्।

गत आवमा कसको वार्षिक तलबसुविधा कति?

प्रस्तुतिका आधारमा प्याकेजमा तलब सुविधा दिने अन्तर्राष्ट्रिय अभ्यास
वाणिज्य बैंकका सिइओले पाउनले तलब सुविधा उनिहरुले दिने प्रस्तुतिका आधारमा तय हुनुपर्ने पूर्व बैंकर उपेन्द्र पौडेलको तर्क छ। विश्वमै बैंकहरूले सिइओलाई प्रस्तुतीकरणका आधारमा ठूला प्याकेज दिने गरेको उनको भनाइ छ। छिमेकी मुलक भारतमै बैंकहरुको सइओको तलब सुविधा आकर्षिक हुने गरेको उनले बताए।

नेपालको अर्थतन्त्र अनुसार बैंकको सिइओको तलब सुविधा बढी भएको भन्दै आलोचना हुने गरेको छ। नेपालीहरुको औषत प्रतिव्यक्ति आय वार्षिक एक हजार ९० डलर रहेको छ। जबकि निजि स्तरका वाणिज्य बैंकका सिइओले कम्तीमा एक करोड रुपैयाँ तलब सुविधा लिएका छन्।

बैंकिङ क्षेत्रमा तलबको विवरण तुलनात्मक रूपमा बढी पारदर्शी मानिन्छ। बैंकका उच्च पदस्थ कर्मचारीहरूको तलब भत्ता तथा अन्य सुविधाका विवरण सार्वजनिक हुने गरेको छन्। तर निजी क्षेत्रका कतिपय कम्पनीहरुले प्रमुख कार्यकारी अधिकृतलाई करोडौँ रुपैयाँ तलब भत्ता तथा सुविधा दिएपनि सार्वजनिक गर्ने गरेका छैनन्।

बैंकका सिइओको तलब सुविधाका विषमया लगानीकर्ताबीच बहस पनि हुने गरेको छ। बैंकहरुले आयोजना गर्ने साधारणसभामा बोल्ने क्रममा सेयरधनीहरुले नै बैंकका सिइओको तलब धेरै भएको भन्दै आलोचना गर्ने गरेका छन्। लगानीकर्तालाई दिने प्रतिफल कम हुँदै जाने तर सिइओहरूको सेवासुविधामा बढी रकम खर्च गर्नु उपयुक्त नहुने सेयरधनीहरूको टिप्पणी हुने गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।