राजविराज– एक हप्ताअघिको हावाहुरीका कारण ढलेका विद्युत पोल मर्मत नहुँदा सप्तरीको सुरुङ्गा नगरपालिकाका करिब १ हजार ५ सय घरधुरी अन्धकारमा बस्न बाध्य भएका छन्। बिजुली नहुँदा करिब २ सय परिवारमा खानेपानीको समस्या छ।
गत सोमबारको हावाहुरीले वडा नम्बर २ का ६ वटा विद्युत पोलमा क्षति पुगेको छ। एक हप्ता बितिसक्दा समेत पोल मर्मत नहुँदा सिस्वारी, रक्साहा, वाहुना, कमलपुर, हर्दिया, पिप्राहा, कर्रा र भेडियाका १ हजार ५ सय भन्दा बढी परिवार मैनबत्तीको सहारामा बसेको स्थानीय हरी बन्जाराले बताए।
विद्युत आपुर्ति बन्द भएपछि सिस्वारी, रक्साहा र भेडियाका करिब २ सय परिवार सवैभन्दा बढी समस्यामा छन्। ट्युवेलमा पानी नआउने ती ठाउँमा इनारमा मोटर जडान गरी घर–घरमा खानेपानी प्रयोग गर्नुपर्ने बाध्यता छ। ‘विद्युत अवरुद्ध भएपछि त्यहाँका सर्वसाधारण समस्यामा छन्।’, बन्जाराले भने, ‘बाँकी स्थानमा पनि सुख्खा मौसममा ट्युवेलको पानी सुक्ने समस्या छ। अधिकांशले बिजुलीकै भरमा खानेपानीको व्यवस्था मिलाएका छन्।’
यसैगरी कुटानी–पिसानीका मिलसमेत बन्द भएका छन्। करिब ६ किलोमिटर टाढा रहेको उदयपुरस्थित लालपत्ता पुर्याएर सर्वसाधारणले कुटानी–पिसानीको काम गरिरहेको स्थानीय शेखर कार्कीले बताए। मोबाइल चार्ज गर्न नपाएर सञ्चार सुविधाबाट पनि वञ्चित हुनु परेको उनको गुनासो छ।
उता विद्युत अभावमा सर्प तथा किराको त्रास वढेको स्थानीयहरु बताउँछन्। ‘गर्मी मौसम सुरु हुनासाथ सर्पको बिगबिगी हुन्छ।’, कार्की भन्छन्, ‘शौचालय जान पनि कतिबेला उज्यालो होला भनेर पर्खिनुपर्ने बाध्यता छ।’ समस्याका विषयमा आफुहरुले नेपाल विद्युत प्राधिकरण वितरण केन्द्र राजविराजमा जानकारी गराईसक्दा पनि हालसम्म मर्मतको काम सुरु नभएको स्थानीयले गुनासो गरेका छन्।
केन्द्र प्रमुख चन्द्रनारायण साहले हावाहुरीले जिल्लाभरी दर्जनौ पोलमा क्षती गरेको र सिमित कर्मचारीका भरमा सबै ठाउँको काम गर्दा केही ढिलो भएको स्विकार गरे। उनले भने, ‘अन्य प्रायः सबै ठाउँका पोल मर्मतको काम सम्पन्न भइसकेको छ। सुरुङ्गामा पनि कर्मचारी खटीसकेका छन्।’ २/३ दिन भित्रै सुरुङ्गावासीको समस्या समाधान हुने उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788940058.jpg)
-1786602170.png)
-1791388337.png)
