फाइल तस्बिर
काठमाडौं- परराष्ट्रमन्त्री प्रदीप ज्ञवाली र नेपालका लागि चिनियाँ राजदूत हाउ यान्छीबीच बिहीबार दिउँसो भेटवार्ता भएको छ। मन्त्री ज्ञवाली र राजदूत यान्छीबीच परराष्ट्र मन्त्रालयमा भेट भएको चिनियाँ दूतावास स्रोतले जानकरी दिएको हो। परराष्ट्र मन्त्रालयले भने बिहीबार चिनियाँ राजदूतसँग भएको भेटघाटको विषयमा औपचारिक रुपमा जानकारी दिएको छैन।
चिनियाँ राजदूत यान्छीको पछिल्लो सक्रियतालाई नेकपाभित्रको विवाद मिलाउने प्रयोजनका रूपमा व्याख्या गर्न थालिएका बेला यान्छीले मन्त्री ज्ञवालीलाई भेटेकी हुन्।
बिहीबारै सत्तारुढ दल नेकपाका तीन शीर्ष नेताहरू प्रधानमन्त्री एवंम् पार्टी अध्यक्ष केपी ओली, अर्का अध्यक्ष पुष्पकमल दाहाल र वरिष्ठ नेता माधव कुमार नेपालबीच करीब तीन घण्टा प्रधानमन्त्री निवास बालुवाटारमा भेटवार्ता भएको थियो। वार्ताले कुनै ठोस निष्कर्ष निकाल्न नसकिरहेको अवस्थामा चिनियाँ राजदूत यान्छीले मन्त्री ज्ञवालीसँग भेटघाट गरेकी हुन्।
चिनियाँ दूतावास स्रोतका अनुसार राजदूत यान्छीले परराष्ट्रमन्त्री ज्ञवालीसँग गरेको भेटको पुष्टि गरे पनि भेटघाटको विषय भने जानकारी दिएको छैन।
सम्बन्धित मन्त्रालयका प्रमुखसँग राजदूतले भेटघाट गर्नु नौलो भने होइन। यद्यपि नेकपाको आन्तरिक सत्ता समीकरणमा प्रधानमन्त्री निकट मानिएका मन्त्री ज्ञवालीसँग राजदूतले विना पूर्व निर्धारित कार्यक्रम र बिना जानकारी भेट गर्दा उनको भेटलाई सक्रियताकै रुपमा आशंका गर्न थालिएको छ।
१० असारबाट नेकपाको स्थायी कमिटीको बैठक चलिरहेको छ। आन्तरिक विवादलाई मिलाउन दुई अध्यक्षलाई जिम्मेवारी दिँदै केही दिनका लागि स्थगित भएको बैठक शुक्रबार पुनः बस्दैछ। स्थायी कमिटी बैठकमा प्रधानमन्त्री एवंम पार्टी अध्यक्ष ओलीलाई दुवै पदबाट राजीनामा दिन दबाव बढ्दै जाँदा राजदूत यान्छीले राष्ट्रपति विद्यादेवी भण्डारीदेखि लिएर पार्टी अध्यक्ष दाहाल, वरिष्ठ नेता झलनाथ खनाल र नेपालसँग योबीचमा भेटघाट गरिसकेकी छन्।
राष्ट्रपति कार्यालयको संयोजनमा राजदूत यान्छीले पछिल्लो पटक नेकपाका शीर्ष नेतासँगको भेटवार्तालाई बाक्लो बनाएकी छन्।
हालै मन्त्री ज्ञवाली र अमेरिकी विदेशमन्त्री माईक पोम्पियोबीच भिडियो वार्तापछि चिनियाँ राजदूत यान्छीसँग भएको मन्त्री ज्ञवालीको यो पहिलो भेट हो। मन्त्री ज्ञवाली र अमेरिकी विदेशमन्त्री पोम्पियोबीच कोरोना कहर र त्यसले पारेको असरको विषयको सेरोफेरोमा कुराकानी भएको परराष्ट्रमन्त्रालयले औपचारिक जानकारी दिएको थियो। तथापि, मन्त्री ज्ञवाली र विदेशमन्त्री पोम्पियोबीच नेपालको संसदले अनुमोदन गर्न ढिला गरेको अमेरिकी सहयोग कार्यक्रम एमसीसीका विषयमा छलफल भएको थियो। यो छलफलको विषयलाई मन्त्री ज्ञवालीले नै पुष्टि गरिसकेका छन्।
यही १५ असारभित्र एमसीसीलाई अनुमोदन गर्नुपर्नेमा पार्टीभित्रको आन्तरिक गतिरोधका कारण प्रधानमन्त्री ओलीको आग्रहमा राष्ट्रपति भण्डारीले त्यसअघि नै संसदको हिउँदे अधिवेशन स्थगित गरेकी थिइन्।
मन्त्री ज्ञवाली र विदेशमन्त्री पोम्पियोबीचको वार्तापछि नेपालको अर्थ मन्त्रालयले एमसीसीको अमेरिकास्थित प्रधान कार्यालयलाई समयअवधि थप्न निवेदन पठाएको थियो। औपचारिक रुपमा चीनले एमसीसीका विषयमा कुनै आपत्ति नजनाए पनि नेपाल लाइभसँगको कुराकानीमा चिनियाँ दूतावासका उच्च पदस्थ कर्मचारीले एमसीसी र आईपिएस जोडिएको हुन सक्ने र त्यसमा चीनको चासो रहेको बताएको छ। बिहीबार मन्त्री ज्ञवाली र राजदूत यान्छीबीचको करीब ४५ मिनेट लामो भेटवार्ताका क्रममा एमसीसीको विषय समावेश भएको अनुमान गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1751267101.jpg)
-1751273553.jpg)
-1749826086.png)
