सुरक्षा/अपराध

सांसद अपहरण प्रकरण मुख्य आरोपितको बयान लिन हच्कियो प्रहरी, महोत्तरीबाट फर्कियो अनुसन्धान टोली दुवैको मुद्दा तामेलीमा राख्ने तयारी

नारायण अधिकारी मंगलबार, वैशाख ३०, २०७७ २१:३२

काठमाडौं- पूर्वस्वास्थ्य राज्यमन्त्रीसमेत रहेका समाजवादी पार्टी (राष्ट्रिय जनता पार्टीसँग एकता गरी जनता समाजवादी पार्टी बनाउने घोषणा भइसकेको)का सांसद डा सुरेन्द्र यादव अपहरण प्रकरणको अनुसन्धानका लागि महोत्तरी गएको प्रहरी टोली काठमाडौं फर्किएको छ। गत शुक्रबार महानगरीय प्रहरी परिसर काठमाडौंबाट अनुसन्धानका लागि भन्दै महोत्तरी गएको प्रहरी निरीक्षक नेतृत्वको टोली फर्किएको हो।

महानगरीय प्रहरी परिसर काठमाडौंको मुद्दा शाखाका प्रहरी निरीक्षक देवी पौडेलको कमान्डमा शुक्रबार अपराह्न काठमाडौंबाट महोत्तरी गएको टोलीले गत शनिबार बिहान सांसद यादवको महोत्तरीको सम्सीस्थित घर पुगेर मुचुल्का उठाएको थियो। मुचुल्कासँगै यादवको परिवारको सदस्यसँग समेत सोधपुछ गरिएको प्रहरीले जनाएको छ।

तर परिवारका सदस्यले के बयान दिए भन्नेबारे प्रहरीले केही खुलाएको छैन। ‘अनुसन्धानका लागि महोत्तरी खटिएको प्रहरी काठमाडौं आइपुगेको छ। सम्बन्धित व्यक्तिको बयान पनि लिइएको छ। अहिले यहाँभन्दा बढी भन्न मिल्दैन,’ परिसर स्रोतले नेपाल लाइभसँग भन्यो।

अपहरण प्रकरणमा जोडिएका पूर्वमन्त्री तथा सत्तारुढ दल नेपाल कम्युनिस्ट पार्टी (नेकपा)का सांसद महेश बस्नेत, पूर्वप्रहरी महानिरीक्षक सर्वेन्द्र खनाल, नेकपाकै सांसद कृष्णकुमार श्रेष्ठ (किसन) र गुन्डा नाइके नवीन बस्नेत सांसद डा यादवको घर पुग्दाको अवस्था, त्यहाँको विवरणलगायतका विषय समावेश गरी प्रहरीले मुचुल्का उठाएको थियो।

यो पनि पढ्नुहोस्

सांसद अपहरण प्रकरण : मुद्दा तामेलीमा राख्न दबाब, डा यादवको घर पुगेर मुचुल्का उठाउँदै प्रहरीशनिबार, वैशाख २७, २०७७

मुचुल्कामा कसुर भएको समयसहितको मिति, कसुर भएको स्थानको विवरण, चार किल्ला र रेखाचित्र, सम्बन्धित ठाउँको वस्तुस्थिति, कसुर वा कसुरदारसँगको सम्बन्ध, त्यस वरपर देखिएका प्रमाण र कसुरसँग सम्बन्धित विषय मुचुल्कामा समावेश गरिएको छ।

सांसद डा यादवको घरमा मुचुल्का उठाइसकेपछि उनीहरू बसेको तथा खाना खाएको भनिएको बर्दिबासस्थित गौतम होटलमा पुगेर प्रहरी मुचुल्का उठाएको थियो। सँगै उक्त होटलका कर्मचारीसँग पनि घटनाका बारेमा सोधपुछ गरिएको छ।

शनिबार सांसद यादवको घर र गौतम होटलको मुचुल्का उठाइसकेपछि आइतबार प्रहरी निरीक्षक पौडेलको टोली जनकपुर गएको थियो। स्रोतका अनुसार अपरहण प्रकरणमा साक्षी रहेका जनता समाजवादी पार्टीका नेता शेषनारायण यादवसँग समेत प्रहरीले बयान लिएको छ। यादवलाई जिल्ला प्रहरी कार्यालय धनुषाले कार्यालयमा उपस्थित हुन भन्दै बोलाएपछि यादव प्रहरी कार्यालय पुगेका थिए। त्यही निरीक्षक पौडेलेको टोलीले उनलाई सोधपुछ गरेको हो।

नेता यादवलाई प्रहरी निरीक्षकको टोलीले दुई घण्टासम्म सोधपुछ गरेको थियो। सांसद यादवलाई जनकपुरबाट काठमाडौं लैजाने क्रममा सबैभन्दा पहिला उनले नेता शेषनारायणलाई फोन गरेर जानकारी गराएकाले उनीमाथि सोधपुछ गरिएको हो।

जनकपुर र महोत्तरीको काम सकाएपछि यादवलाई काठमाडौं ल्याउँदा खाना खाएको भनिएको सिन्धुलीस्थित होटलमा समेत गएर प्रहरीले सोधपुछ गरेको थियो। मंगलबार काठमाडौं फर्कने क्रममा काभ्रेस्थित उनीहरूले खाजा खाएको ठाउँमा समेत प्रहरीले सोधपुछ गरेको छ।

यो पनि पढ्नुहोस्

सांसद अपहरण प्रकरण : अनुसन्धानका लागि काठमाडौंबाट प्रहरी टोली महोत्तरी गयोशुक्रबार, वैशाख २६, २०७७

यता शुक्रबार नै सांसद यादवलाई राखिएको काठमाडौंको नक्सालस्थित मेरियट होटलमा प्रहरीले मुचुल्का उठाइसकेको छ। शनिबार नै पूर्वआइजी खनालका चालक प्रहरी हवल्दार शिव तामाङसँग पनि प्रहरीले बयान लिइसकेको छ। सांसद यादव राजीखुसीमै काठमाडौं आएको दाबी बयान तामाङले दिएका छन्। दुवै पक्षले विभिन्न सञ्चारमाध्यमलाई दिएको अन्तर्वातासमेत प्रमाणको रुपमा प्रहरीले संकलन गरेको छ।

तर घटनाको मुख्य आरोपितको भने प्रहरीले अहिलेसम्म बयान लिने हिम्मत जुटाएको छैन। ‘आवश्यकता देखिएको अवस्थामा लिन्छौं,’ यसबारे परिसर स्रोतले नेपाल लाइभसँग भनेको छ।

दुवै पक्षको मुद्दा तोमलीमा राख्ने तयारी
महानगरीय प्रहरी परिसर काठमाडौंमा सांसद यादव अपहरणको आरोपमा सांसददेखि पूर्वआइजिपीसम्मको जाहेरी दर्ता भएको छ भने साइबर अपराधमा पनि अपरहणमा पीडित भनिएका सांसद यादवसहित पूर्वप्रधानमन्त्री बाबुराम भट्टराई र विश्वदीप पाण्डेविरुद्ध पनि मुद्दा दर्ता भएको छ।

यो पनि पढ्नुहोस्

महेश बस्नेत, पूर्वआइजिपी सर्वेन्द्र खनालसहित ४ विरुद्ध सांसद यादवद्वारा अपहरणको उजुरी दर्तासोमबार, वैशाख २२, २०७७

अपरहणको आरोप लागेका सांसद र पूर्वआइजीले उनीहरुविरुद्ध जाहेरी दर्ता गरेका हुन्। यी दुवै पक्षको जाहेरी उपर प्रहरीले भने मुद्दा दर्ता गराउने भन्दा पनि तामेलीमा राख्ने प्रक्रिया अघि बढाएको स्रोतले नेपाल लाइभलाई जानकारी दिएको छ ।

जाहेरी लिईसकेपछि झुठा मुद्दा भएको, अनुसन्धान गर्न नपर्ने वा मुद्धा चलाउनु पर्ने अवस्था नदेखिएमा 'भ्रमपूर्ण, झुठ्ठा वा काल्पनिक सूचनालाई तामेलीमा राख्न सकिने भन्ने फौजदारी कार्यविधि संहिता २०७४ को दफा ११ लाई आधार सरकारी वकिल कार्यालयमा प्रतिवेदन पठाउन सक्ने कानूनी व्यवस्था छ।

त्यस्तै मुद्दा तामेलीमा नराखी अनुसन्धान गर्न जरुरी देखिएको तर अनुसन्धान गर्दै जाँदा तथ्यगत र पर्याप्त प्रमाण नभएको अवस्थामा कार्यविधि संहिताको दफा ३१ को १ अनुसार मुद्दा नचलाउने निर्णयको लागि सरकारी वकिलसमक्ष पठाउन सकिनेछ। सोही अनुसार दुवै पक्षको मुद्दा तामेलीमा राख्ने तयारी काठमाडौं परिसरले गरेको छ।