काठमाडौं- ज्वरो नाप्ने थर्मल गनको कालोबजारी गरेको आरोपमा पक्राउ परेका शंकर ग्रुप र जगदम्बा स्टिलका सञ्चालक सुलभ अग्रवालको बिरामीको नाटक गर्दै अस्पताल बस्ने योजना विफल भएको छ।
कालोबजारी गर्न लागिएको ६७ थान थर्मल गनसहित दिउँसो नक्सालबाट पक्राउ परेका अग्रवाल हिरासत बस्नुपर्ने भएपछि बिरामीको बाहना बनाउँदै अस्पताल भर्ना हुन लागेका थिए। बिरामी भएको बताएपछि प्रहरीले उनलाई अस्पताल समेत पुर्याएको थियो।
‘छाती दुख्यो भन्दै कराउन थालेपछि हामीले वीर अस्पताल पुर्याएका थियौं। डाक्टरले जाँच गरेर सबै कुरा नर्मल छ भनेपछि फिर्ता ल्याइएको छ। अहिले उनी दरबारमार्गको हिरातमा छन्,’ स्रोतले नेपाल लाइभसँग भन्यो।
महानगरीय अपराध महाशाखाले पक्राउ गरेका अग्रवाललाई थप कारबाहीका लागि महानगरीय प्रहरी परिसर काठमाडौंको जिम्मा लगाएको थियो। पक्राउ गरेपनि महाशाखालाई मुद्दा चलाउने अधिकार छैन। परिसरबाट अग्रवाललाई महानगरीय प्रहरी वृत्त दरबारमार्गको हिरासतमा राखिएको परिसरका डिएसपी होबिन्द्र बोगटीले जानकारी दिए।
महाशाखाका प्रहरी नै ग्राहक बनेर थर्मल गन किन्ने योजनाअनुसार उनी पक्राउ परेका हुन्। उनले साढे २४ सयमा किनेको थर्मलगनलाई १५ हजार रुपैयाँमा बेच्न लागेका थिए। चीनबाट थर्मल गन ल्याएको भन्ने सूचना आएपछि थप थर्मल गन खोज्न भन्दैै महाशाखाले अग्रवालको बालुवाटरस्थित घर र नक्सालस्थित अफिसमा समेत छापा हानेको थियो। तर एउटा पनि थर्मल गन प्रहरीले फेला पार्न सकेन।
कूटनीतिक नियोगको सवारी साधन २०९ एचसिसी १ नम्बरको गाडीमा थर्मल गन बोकेर महँगोमा बेच्दै हिँडेको अवस्थामा पक्राउ परेको हुन्। उनले प्रयोग गर्दै आएको सो गाडीसमेत अवैधानिक भएको प्रहरी अनुसन्धानले देखाएको छ।
जगदम्बाका संचालक अग्रवाल मेडिकल सामग्री बिक्रेता होइनन्। तर केही समयअघि शंकर ग्रुपले चीनबाट उक्त ग्रुपले सामग्री ल्याएको थियो। विभिन्न व्यवसायीको सामान लिन चीन उडेको नेपाल एयरलाइन्सको जहाजमा उक्त कम्पनीले सेटिङ गरेर आफ्नो सामान मात्रै ल्याएको थियो।
शंकर ग्रुपले संकटका बेला महँगोमा बेच्न अरुको सामान ल्याउने रोकेको विषयमा यसअघि नेपाल लाइभले समाचार प्रकाशन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
