काठमाडौं- फुटबलमा दुई क्लबको रोमाञ्चक भिडन्त ती क्लब कति नजिक छन् भन्ने आधारमा हुन्छन्। तर, रियल मड्रिड र बार्सिलोनाबीचको भिडन्तलाई छाडेर।
रियल मड्रिड र बार्सिलोना परका सहर भए पनि भिडन्त एउटै सहरका दुई क्लबको भन्दा ज्यादा हुन्छ। जहाँ विश्वभरका फुटबलप्रेमी जोडिन्छन्। त्यहाँ दर्शकबीचको राजनीतिक र भौगोलिक दुरीसमेत पसिदिन्छ। मड्रिडको केन्द्रिय शासन र क्याटालोनियाको स्वतन्त्रताको लडाइँ त्यहाँ छ।
अहिले ला लिगामा १३ खेल बाँकी रहँदा बार्सिलोना रियल मड्रिडभन्दा दुई अंकले अघि छ। यस्तोमा आइतबार राति बर्नाबेउमा हुने एल क्लासिको नतिजा उपाधिमा प्रमुख हुनसक्छ। क्याम्प नाउमा भएको बराबरीले पनि बर्नाबेउको खेल विशेष बन्दैछ।
रियल मड्रिड होस् या बार्सिलोना दुवै टिम यो सिजन भरलाग्दा छैनन्। त्यसमा पनि खेलाडी घाइते हुने समस्याले दुवै टिमलाई पिरोलेको छ। च्याम्पियन्स लिगमा रियल मड्रिडले घरेलु मैदानमा भोगेको हारले त थप पीडा दिएकै छ। बार्सिलोनाको पनि च्याम्पियन्स लिग खेल उम्दा भएको होइन। यसैले त यो एल क्लासिको सामान्य अनुमानबाहिर देखिन्छ।
यो सबैमा विशेष ध्यान हुनेछ, लियोनल मेस्सीमाथि। जो आइतबार राति आफ्नो ४२औँ एल क्लासिको खेल्दैछन्। मेस्सीले १८ वर्षको उमेरमा एल क्लासिको डेब्यू गरेदेखि अहिलेसम्म धेरै कुरा फेरियो। सबैभन्दा बढी त उनको आफ्नै कीर्तिमानहरु।
.jpg)
सन् २००७ को मार्च महिनामा क्याप नाउमा रियल मड्रिडविरुद्ध लियोनल मेस्सी पहिलो पटक धेरैको नजरमा परेका हुन्। उनको अन्तिम समयको गोलले बार्सिलोनाले आफ्नो पुरानो प्रतिस्पर्धीसँग बराबरी गरेको थियो। जहाँ मेस्सीले आफ्नो पहिलो एल क्लासिको ह्याट्रिक पनि पूरा गरेका थिए।
त्यसको १३ वर्ष र २६ एल क्लासिको गोलपछि अहिलेसम्म पनि खेलमा परिवर्तन गराउन सक्ने क्षमता उनै मेस्सीसँग नै छ। ला लिगामा २० खेलमा १८ गोल गरेका उनले १२ गोलमा अन्तिम पास मिलाएका छन्।
बार्सिलोनामा मेस्सीले गर्न सक्ने परिवर्तन जस्तै रियल मड्रिडमा अहिले करिम बेन्जेमालाई लिन सकिन्छ। उनको गोलका कारण। विशेष त क्रिष्टियानो रोनाल्डो युभेन्टस लागेपछि।
रियल मड्रिडमा देखिएको गोलको समस्यामा सबैभन्दा बढी आस बेन्जेमामाथि नै छ। गएको हप्ता तालिकाको मध्यतिरको टिम लेभान्टेसँग १–० ले हार्दा रियल मड्रिड ला लिगामा यो सिजन आठौँ खेलमा गोलविहीन भएको थियो। लिगका सुरुवातका खेलहरु हेर्ने हो भने गोलको एक्लो भार बेन्जेमा माथि नै थियो। लिगका पहिलो १६ खेलमा नै उनले १३ गोल गरेका थिए।
तर क्रिसमस बिदापछिको समय हेर्ने हो भने बेन्जेमाले लिगमा जम्मा एक गोल गरेका छन्। त्यो एथ्लेटिको मड्रिडविरुद्धको एक गोल जितको आधार बनेको थियो। रियल मड्रिडका लागि लिगमा बेन्जेमा पछि धेरै गोल गर्नेमा सर्जियो रामोस छन्। उनको पाँच गोलमा तीन गोल पेनाल्टीमार्फत हो। बेन्जेमा बाहेक फरवार्डको अवस्था त नाजुक छ।
रियल मड्रिडमा गोलमा देखिन नसकेका फरवार्डको दोष चोटलाई दिए पनि कारण त्यो मात्र होइन। लेभान्टेसँगको खेलमा पुनः घाइते भएका इडर्न हाजार्डको अनुपस्थितिले पनि चोटको मार थपिएको पक्कै छ। उनी एल क्लासिकोमा मात्रै होइन सिजनका बाँकी खेलमा पनि के हुने हो भन्न सकिँदैन। रियल मड्रिड गोलमा उत्कृष्ट देखिने क्लब हो, जुन अभाव अहिले खड्किरहेको छ।
चोटको समस्या रियल मड्रिडमा मात्रै होइन बार्सिलोनामा पनि उस्तै छ। उसमान डेम्बेले र लुइस स्वारेज घाइते रहेको टिममा पछिल्लो पटक सर्जी रोबर्टो र जोर्डी अल्बा पनि थपिएका छन्। च्याम्पियन्स लिगमा नापोलीसँगको खेलमा घाइते भएका जेरार्ड पिके पनि खेल्न सक्ने नसक्ने दोधार नै छ। जसले कमजोर देखिएको बार्सिलोनाको डिफेन्स लाइन थप समस्यामा परेको छ।
फरवार्ड लाइनमा मुख्य खेलाडी लियोनल मेस्सीलाई साथ दिन प्रशिक्षक क्विके सेटियनसँग छनोटका केही अवसर छन्। नापोलीविरुद्धको खेलमा सेटियनले मेस्सी र एन्टोनी ग्रिजम्यानलाई अगाडि खेलाएर मिडफिल्डमा सर्जियो बुस्केट्स, इभान राकिटिक, फ्रान्की डि योङ र आर्टुरो भिडाललाई खेलाएका थिए।
सेटियन रियल मड्रिडविरुद्ध पनि त्यही शैलीमा देखिन सक्छन्। त्यसबाहेक पनि उनले अगाडि अन्सु फाती र मार्टिन ब्रेथवेटलाई पनि प्रयोग गर्ने अवसर त पाएकै छन्। ब्रेथवेटले अलाभेससँगको खेलमा आफ्नो खुबी पनि देखाएका थिए।
ला लिगामा हेड टु हेड नतिजाले पनि उपाधिमा असर गर्ने हुनाले रियल मड्रिड र बार्सिलोनाबीचको खेल विशेष हुनेछ। डिसेम्बरमा क्याप नाउमा भेट हुँदाको गोलरहित बराबरी २००२ पछिको बराबरी थियो। रियल मड्रिड र बार्सिलोनाबीचको खेलमा अंक धेरै अघिपछि नभए पनि हारजितले ठूलो अर्थ राख्नेछ। त्यसमा प्रशिक्षक जिनेदिने जिदान या क्विके सेटियन कसले बढी चुनौती ब्येहोर्ने छन् त्यो हेर्न बाँकी छ।
बार्सिलोना र रियल मड्रिडबीच अहिलेसम्म भएका प्रतिस्पर्धात्मक खेलको संख्या २ सय ४३ पुगेको छ। जसमा रियल मड्रिडले ९५ खेल जितेको छ भने बार्सिलोनाले ९६ खेल जितेको छ। ५२ खेल बराबरी भएका छन्। एल क्लासिकोमा अहिलेसम्मका सबै खेलमा हेर्दा रियल मड्रिडले ४ सय ३ गोल गरेको छ भने बार्सिलोनाले ३ सय ९९ गोल गरेको छ।
ला लिगामा रियल मड्रिड र बार्सिलोनाबीचको पछिल्लो सात खेललाई हेर्ने हो भने रियल मड्रिड जितविहीन छ। त्यसमा तीन खेल बराबरी खेलेको रियल मड्रिडले चार खेल हारेको छ। बर्नाबेउमै पनि बार्सिलोनाले ला लिगाका पछिल्ला चार खेलमा रियल मड्रिडलाई हराएको छ। तर जारी सिजन बार्सिलोनाको अवे खेल सम्झनलायक भने देखिँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
