फिचर

फोक्सुन्डो पुग्ने बाटोको रोमाञ्चकता [फोटो फिचर]

ऋग्वेद शर्मा/शिव बोहरा शनिबार, कात्तिक १६, २०७६ ०८:११

डोल्पा- डोल्पा जिल्लाको फोक्सुन्डो ताल जति सुन्दर छ, त्यहाँ पुग्ने बाटोका दृश्यहरु पनि त्यो भन्दा कम छैन। यात्राका लागि भौगोलिक हिसाबले कठीन भए पनि चट्टाने पहाड, छहरा, भीर, अप्ठ्यारा गोरटा सबै रोमाञ्चक लाग्छन्।

कर्णाली प्रदेशको डोल्पा केन्द्रीय सडक सञ्जालसँग प्रत्यक्ष रुपमा जोडिन सकेको छैन। जिल्लाभित्र केही सडकहरु बनेका त छन् तर ती कच्ची छन्। डोल्पाको शे-फोक्सुन्डो गाउँपालिमा रहेको फोक्सुन्डो ताल पुग्नका लागि कर्णालीको विकटता नझेली सुख पनि छैन।

रुकुमको राडीज्यूलासम्म काठमाडौंबाट बसमा पुग्नेहरु ६ वटा जिप परिवर्तन गरेर डोल्पाको सुलिगाड पुग्छन्। नेपालगञ्जबाट हवाइजहाजमा जानेहरु एउटा जिप चढेर सुलिगाड पुग्छन्।

फोक्सुन्डो पुग्नका लागि सुलिगाडबाट पैदल यात्रा गर्नुको विकल्प छैन। फोक्सुन्डो तालबाट निस्किएर बनेको खोलाको तिरैतिर उकालो लाग्दै जाँदा सफा पानीको वहाव र चट्टाने डाँडाहरु निकै आउँछन्। कतै उकालोको बाटोको कठिन त कतै ओरालो बाटोको सहजता सबै अनुभव गर्न पाइन्छ। फोक्सुन्डोबाट निस्किएको पानी बहेर बनेको नदीमा कतैकतै झोलुंगे पुल बनेको छ भने अधिकांश ठाउँमा काठको पुल तर्नुपर्छ।

खोलाको एक तिरबाट हिँड्दै जाँदा बाटोसमेत बनाउन नसक्ने पहरो भेटिएपछि खोलो तारेर अर्को तिरबाट बाटो बनाइएको छ। उकालो लाग्दा घरी दायाँ घरी बाँया पार्ने खोलो यति सङ्लो देखिन्छ कि पानीभित्रका ढुङ्गासमेत देखिन्छन्। खोलाको तिर हुँदै हिँड्ने भए पनि बेलाबखत जंगल र बुट्याने झाडीहरु पनि आइपर्छन्। जहाँ चराचुरुङ्गीको चिरबिर आवाज अनि एक टंकार सुसाइ रहेको खोलाले अनौठो संगीतको मिठास दिन्छ।