महिला क्रिकेटमा थपिएको हौसला

फिचर

महिला क्रिकेटमा थपिएको हौसलावुमन्स च्याम्पियन्स लिगको ट्रफी चन्द्रागिरीमा

ऋग्वेद शर्मा बुधबार, कात्तिक ६, २०७६ १७:३१

काठमाडौं- ‘हामीलाई ठूलो राशिको पुरस्कार चाहिँदैन, धेरै रकममा खेलाडी किनिदिउन् भन्ने पनि छैन, छ त खेल्ने वातावरण पाइयोस् भन्ने मात्रै’ नेपाली महिला क्रिकेट टिमकी कप्तान रुबिना क्षेत्रीले गएको वर्ष माघमा प्रतियोगिता नै नहुनुको निराशा व्यक्त गर्दै भनेकी थिइन्।

उनै रुबिना नेपालमा पहिलो पटक आयोजना भइरहेको महिला क्रिकेटको फ्रेन्चाइज टी २० क्रिकेट प्रतियोगिता ‘वुमन्स च्याम्पियन्स लिग’ को फाइनल खेल्दै छिन्। जहाँ उनले भनेजस्तै नेपाली महिला क्रिकेटरले खेल्ने राम्रो वातावरण पाएका छन्।

क्याट क्विन्स काठमाडौं र चितवन राइनोजबीच हुने फाइनल खेल त्रिवि क्रिकेट मैदान कीर्तिपुरमा बिहीबार बिहान ११ः३० मा सुरु हुनेछ। फाइनल खेलअघि आयोजक ‘क्विन्स इभेन्ट म्यानजमेन्ट’ले प्रतियोगिताको ट्रफी बुधबार बिहान चन्द्रागिरीमा प्रदर्शनसमेत गरायो।

पहिलो पटक महिला क्रिकेटमा ठूलो घरेलु प्रतियोगिता भइरहँदा ‘ट्रफी टुर’ ले आफूहरुमा क्रिकेटप्रतिको हौसला अझ थपिएको फाइनल पुगेको टिम क्याट क्विन्स काठमाडौंकी कप्तान रुबिनाले बताइन्।

चितवन राइनोजकी कप्तान इन्दु बर्मा पनि वुमन्स च्याम्पियन्स लिगले महिला क्रिकेटको अवस्था सुधार गर्न धेरै सहयोग गरेको र धेरै कुरा बुझ्न पाइरहेको सुनाउँछिन्। दुवै टिमका कप्तान उपाधि आफूहरुले जित्नेमा विश्वस्त देखिन्छन्।

ट्रफी चन्द्रागिरीमा ल्याएर प्रदर्शन गर्नुले प्रतियोगितालाई लिएर हौसला अझ बढेको भन्दै काठमाडौंकी कप्तान रुबिना भन्छिन्- ‘फाइनल खेल्नुअघि हामीले हाम्रा गल्तीहरु बुझेका छौँ। यसअघि पहिलो खेलमा नै हामी चितवनसँग हारेका थियौँ, पछिल्लो खेलहरुमा हामीले धेरै सुधार गरेका हौँ, फाइनलमा टिमले कसरी राम्रो खेल्न सक्छ भन्ने ध्यान दिइरहेका छौँ।’

चितवनसँगको पहिलो खेल हारेका कारण पनि धेरै कुरा बुझ्न पाएको रुबिनाको भनाइ छ। ‘उनीहरुको खेल कस्तो छ भन्ने हामीलाई थाहा छ। त्यही भएर हरेक खेलाडीलाई विचार गरेर योजना बनाइरहेका छौँ। हामीले राम्रो क्रिकेट खेल्ने छौँ’ उनले भनिन्।

फाइनल प्रतिस्पर्धात्मक हुने दुवै टिमका कप्तान सुनाउँछन्। ‘हामी दुवै टिमलाई दुवै टिमको बारेमा थाहा छ, उनीहरुलाई हामीले पहिलो खेलमा हराए पनि त्यसपछिको कमब्याक निकै राम्रो गरेका छन्। त्यसैले फाइनल सहज हुने छैन। हामी जितका लागि पूरा मेहनत गर्नेछौँ’ चितवनकी कप्तान इन्दुले विश्वस्त हुँदै बताइन्।

लिग चरणको ४ खेलमा ४ जित निकाल्दै फाइनल पुगेको चितवन प्रतियोगितामा अपराजित टिम हो। यता पहिलो खेलमा चितवनसँगै ५ विकेटले हारेको काठमाडौं त्यसपछिका सबै खेल जित्दै फाइनल पुगेको हो। इलिमिनेटर खेलमा विराटनगर टाइटन्सलाई ९ विकेटले पराजित गर्दै काठमाडौं फाइनलमा पुग्यो।

उपाधि जित्ने उत्साह भन्दा ठूलो दुवै कप्तानमा पहिलो फ्रेन्चाइज टी २० प्रतियोगिता खेल्न पाउनुले नै देखिन्छ। खेलविहीन भएर क्रिकेटबाटै पलायन हुनुपर्ने हो कि भन्ने डर लिएर बाँचिरहेका उनीहरु घरेलु मैदानमा भइरहेको क्रिकेट उत्सवको निरन्तरताको आशमा छन्।

‘असाध्यै रमाइलो वातावरणमा क्रिकेट खेल्न पाइरहेका छौँ। महिला क्रिकेट प्रोमोट भइरहेको छ। त्यसले हामीमा धेरै हौसला थपिएको छ। हामीले जस्ता खाले प्रतियोगिता होस् भन्ने चाहन्थ्यौँ त्यो भइरहेको छ। त्यसलाई सकेसम्म राम्ररी कसरी प्रयोग गर्ने भन्नेमा हामीले ध्यान दिएका छौँ’ रुबिनाले भनिन्।

रुबिना

साग खेलकुदअघि राष्ट्रिय स्तरमा यत्तिको प्रतियोगिता हुनु ठूलो कुरा भएको रुबिनाको भनाइ छ। ‘सागअघि यत्तिको वातावरणमा खेल्न पाउनु हाम्रो लागि राम्रो अनुभव हो। हामीमा थपिएको उत्साहले सागमा मनस्थिति बलियो हुनेछ। यसले खेलाडीको विकास राम्रो भइरहेको छ, नयाँ आशाको उदय भएको छ’ उनले भनिन्।

रुबिना जस्तै इन्दु पनि महिला फ्रेन्चाइज क्रिकेटले आफूहरु एकदमै उत्साहित भएको बताउँछिन्। ‘हामीमा धेरै उत्साह थपिएको छ। यसले नेपाली महिला क्रिकेटलाई ठूलो सहयोग गर्नेछ। लुकेका खेलाडीहरु बाहिर देखिन पाएका छन्’ उनले भनिन्।

२००७ मा मलेसियामा एसीसी प्रतियोगितामा सहभागी हुँदै अन्तर्राष्ट्रिय क्रिकेट सुरु गरेको नेपाली महिला क्रिकेट टिमले पहिलो पटक घरेलु मैदानमा राम्रो प्रतियोगिता खेल्न पाइरहेका छन्। २०१८ को अप्रिलपछि अन्तर्राष्ट्रिय क्रिकेट परिषद (आइसिसी) ले सबै सदस्य राष्ट्रबीचको टी २० खेललाई अन्तर्राष्ट्रिय टी २० को मान्यता दिनुले पनि नेपाली टिमको टी २० अनुभव बढाउन यस्ता प्रतियोगिताले सहयोग गर्ने नै छ।

इन्दु

नेपाली महिला टिमका प्रशिक्षक बिनोद दास पनि ‘वुमन्स च्याम्पियन्स लिग’ जस्तो प्रतियोगिताले नेपालमा महिला क्रिकेटको विकासमा ठूलो सहयोग गरिरहेको बताउँछन्। ‘महिला खेलाडीहरुका लागि प्रतियोगिता खेल्न पाउनु नै ठूलो कुरा भइरहेको छ। खेलाडीहरुले जति धेरै प्रतियोगिता खेल्न पाउँछन् उति नै निखारिने हुन्, यसैले यस्तो प्रतियोगिताको महत्व ठूलो छ’ दासले भने।

नेपाल क्रिकेट संघ (क्यान) को समेत चुनाव भइसकेको अवस्थामा महिला क्रिकेटको घरेलु प्रतियोगितामा अझ विकास होला कि भन्ने आशमा प्रशिक्षक दास देखिन्छन्। ‘अब त क्यान पनि आएको छ। हेरौँ क्यानले पनि महिला क्रिकेटको विकासका लागि घरेलु प्रतियोगितामा राम्ररी अगाडि बढ्छ नै होला। वर्षमा यस्ता खाले प्रतियोगिताहरु तीन चार वटा भइदिने हुन् भने धेरै सहयोग पुग्नेछ’ उनले भने।

खेलाडीहरुलाई आर्थिक रुपमा ठूलो सहयोग पुग्न पनि प्रतियोगिताको संख्यामा नै बृद्धि हुनुपर्ने दासको भनाइ छ। ‘एउटा प्रतियोगिताले नै खेलाडीलाई आर्थिक रुपमा ठूलो मद्धत पुग्न सक्दैन, त्यसका लागि धेरै प्रतियोगिता नै चाहिन्छ। तर, यसले उदाहरणीय सुरुवात गरेको छ निरन्तर होस् भन्ने कामना गर्दछौँ’ उनले भने।

साथै प्रशिक्षक दासले राष्ट्रिय टिमको छनोटमा पनि यस्ता प्रतियोगिताले मद्धत हुने बताए। ‘कुनै समय क्लोज क्याम्पमा खेलाडीको संख्या समेत पुग्दैन थियो। प्रतियोगिता नै नहुँदा खेलाडी खोज्न पनि समस्या नै हुन्छ। अहिलेको प्रतियोगिताले नयाँ खेलाडीहरुमा उत्साह थपेको छ। यहाँबाट पनि केही खेलाडी राष्ट्रिय टिममा आउन सक्छन्’ उनले बताए।

गएको फागुनदेखि विभिन्न समय मिति तय हुँदै सर्दै गरेको प्रतियोगितामा क्याट क्विन्स काठमाडौं र चितवन राइनोजसँगै पोखरा पल्टन, ललितपुर फाल्कोन्स, विराटनगर टाइटन्स गरी ५ सहरका नाममा ५ टिम सहभागी भएका हुन्। जसमा हरेक टिममा १४ गरी ७० खेलाडी आबद्ध रहेका छन्। जो २५ हजारदेखि ७५ हजारसम्ममा टिममा आबद्ध भएका थिए। यसले गर्दा एकैपटक ठूलो संख्यामा महिला खेलाडीको क्रिकेट विकासमा सहयोग गरेको प्रशिक्षक दास बताउँछन्।

काठमाडौंका प्रशिक्षक मनोज कटुवाल र चितवनका प्रशिक्षक सामसङ जङ थापा पनि बिहीबार हुने फाइनललाई लिएर जत्तिकै उत्साहित नेपाली महिला क्रिकेटमा भएको विकासले छन्। दुवै प्रशिक्षक आफूहरुको तयारी राम्रो भएको सुनाउँदै उपाधि जित्नेमा समेत विश्वस्त रहेको बताउँछन्।

‘महिला क्रिकेटमा भइरहेको यो प्रतियोगिताको रेस्पोन्स राम्रो छ। आफ्नै देशमा खेलाडीहरुले यस्तो अनुभव लिन पाउनु राम्रो कुरा हो। पुरुष खेलाडीका प्रतियोगिता भइरहँदा महिला खेलाडीलाई पनि यस्तै प्रतियोगितामा सहभागी हुन पाए भन्ने इच्छा भइरहेको हुन्थ्यो जुन अहिले पूरा भएको छ’

चितवनका प्रशिक्षक सामसङ भन्छन्, ‘हामीले सबै खेलमा राम्रो गरिरहेका छौँ, बिहीबार काठमाडौंलाई हराएर उपाधि जित्न पूरा मेहनत गर्नेर्छाैँ।’

प्रतियोगिताको विजेताले ७ लाख र उपविजेताले ३ लाख रुपैयाँ पुरस्कार पाउनेछन्। यस्तै व्यक्तिगत विधातर्फ सर्वोत्कृष्ट हुने खेलाडीले एउटा स्कुटरसहित नगद ५० हजार पाउनेछिन्। उत्कृष्ट ब्याटर र बलरले समान २५/२५ हजार प्राप्त गर्नेछन्।