जनकपुर- राष्ट्रिय जनता पार्टी (राजपा) नेपालले बिहीबार साँझ जनकपुरमा संघीय सरकारका गृहमन्त्री रामबहादुर थापा र संस्कृति, पर्यटन तथा नागरिक उड्डयनमन्त्री योगेश भट्टराईको पुतला दहन गरेको छ।
जनकपुर विमानस्थलस्थित बुद्ध एयरको काउन्टर तोडफोड गरेको आरोपमा पक्राउ परेका राजपा सांसद प्रमाेद साहलाई पक्राउ गरेको विरोधमा राजपा धनुषाले पुत्ला दहन गरेको हाे।
राजपाले शुक्रबार जनपकुरमा जुलुस प्रदर्शन गर्ने र शनिबार धनुषा जिल्ला बन्द गर्ने कार्यक्रमसमेत घोषणा गरेको छ।
मंगलबार त्रिभुवन अन्तर्राष्ट्रिय विमानस्थलबाट महानगरीय प्रहरी अपराध महाशाखाको टोलीद्वारा समातिएका सांसद साहमाथि अनुसन्धान गर्न बुधबार जिल्ला अदालत धनुषाले ४ दिनको म्याद दिइसकेको छ।
सांसद साहले सोमबार जनकपुरबाट काठमाडौं उडान भर्ने क्रममा बिहान ११ः४० मा आउनुपर्ने बुद्ध एयरको जहाज डिले भएको भन्दै काउन्टर तोडफोड गरेका थिए।
सांसद साहलाई 'गैरसैनिक हवाई उडान ऐन २०१५' को कसुरमा म्याद लिएर अनुसन्धान सुरु गरिएको छ। उनीमाथि हवाई यातायातसँग सम्बन्धित व्यक्तिको सुरक्षा विरुद्धको अपराधमा अनुसन्धान सुरु गरिएको प्रहरीले जनाएको छ।
ऐनमा उल्लेख गरिएको छ, ‘हवाई उडान कार्यसँग सम्बन्धित कुनै पनि कर्मचारी, विमानस्थलमा कार्यरत सरकारी वा गैर सरकारी कर्मचारी, हवाई यात्रुलगायत विमानस्थलमा आगन्तुक कुनै पनि व्यक्तिलाई हात हतियार लिई वा नलिई डर, धम्की, प्रलोभन वा अरू कुनै तरिका अपनाई अपहरण गरी वा कब्जामा लिई आफ्नोे कर्तव्यबाट विचलित पारी वा अन्य कुनै किसिमबाट हवाई उडान सञ्चालन तथा सुरक्षामा खतरा वा बाधा उत्पन्न गराउने कार्य गरेमा हवाई यातायातसँग सम्बन्धित व्यक्तिको सुरक्षा विरुद्ध अपराध गरेको मानिनेछ।’
यस्तो अपराध गरेको व्यक्तिलाई ५ वर्षदेखि १० वर्षसम्म सजायन हुनसक्ने व्यवस्था छ। सांसद साहमाथि लागेको आरोप पुष्टि भएको खण्डमा उनले पनि यही ऐन अनुसार बढीमा १० वर्षसम्म कैद बस्नुपर्ने हुन्छ।
यसअघि निजी क्षेत्रका वायुसेवा सञ्चालक संघ (आयोन)ले सांसद साहलाई सरकारले कारबाही नगरे जनकपुरका सबै उडान तथा अवतरण बन्द गर्ने चेतावनी दिएको दिएको थियो।
यता संसद् सचिवायलयले सांसद साहको सेवासुविधा रोक्ने निर्णय गरिसकेको छ। उपसभामुख शिवमाया तुम्बाहाम्फेको नेतृत्वमा बुधबार बसेको संसद् सचिवालयको बैठकले उक्त निर्णय गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
