काठमाडौं- नेपाली कांग्रेसका सांसद तथा उद्योगी विनोद चौधरीले बजेटमाथिको छलफलमा देश अहिले डरलाग्दो अवस्थामा फसेको बताएका छन्। चौधरीले आर्थिक वर्ष २०७६/७७ को बजेटमाथि चलेको छलफलमा प्रतिनिधिसभामा राखेको विचार :
समृद्ध नेपाल निर्माणका लागि अगाडि बढ्न जुन प्रकारले बजेटको स्ट्रक्चर र स्वरुप हुनुपर्ने हो, यो बजेटमा पनि हुन सकेको छैन। त्यसका लागि आवश्यक केही आधारभूत वस्तुको आवश्यकता रहेको मैले महसुस गरको छु। विकास खर्च कम से कम ६० प्रतिशत र चालु खर्च कम से कम कुल बजेटको ४० प्रतिशत हुनुपर्ने न्यूनतम मान्यतालाई स्थापित गर्न आवश्यक छ।
देश अहिले एउटा डरलाग्दो दर्दनाक अवस्थमा फसेको छ। देशको खर्च अहिले रेमिटेन्सबाट चलेको छ। जसका कारण आयात बढेको छ। आयातका कारण करका दरहरुमा वृद्धि गर्दै जाने प्रवृत्ति बढेको छ। नेपाललाई विश्वकै उच्च कर भएको देशको रुपमा स्थापित गराउने काम भएको छ। विकास र दिगो भौतिक संरचनाको निर्माण गर्नुको सट्टा उपभोक्तावादमा जानुपर्ने अवस्था आएको छ।
निर्यात बढाउनका लागि हरेक वर्ष नयाँनयाँ योजना आउँछ। यो वर्ष पनि आएको छ।
तर, यथार्थमा ५ वर्षसम्म निर्यातको तस्बिर हेर्ने हो भने उल्टै घट्दो क्रममा छ।
राजनीतिक रुपान्तरण, स्थिर सरकारले एउटा गतिशील अर्थतन्त्र भएको राष्ट्रको विकास गरी जनतालाई त्यसको फाइदा दिन नसक्दासम्म आउने दिनमा अझै समस्या उत्पन्न हुन्छ।
यदि ९ सय ८१ अर्बको राजस्वमध्ये ९ सय ५७ अर्ब चालु खर्चमा खर्च हुने हो भने विकासका लागि राष्ट्रको आन्तरिक स्रोतको परिचालन हुनुपर्छ, खोज्नुपर्छ। विकास खर्च विनियोजन बजेटको ५० प्रतिशत मात्रै खर्च नहुनु भनेको योजना बनाउनेको क्षमतामा प्रश्न उड्छ। यो हुने भनेको अर्थतन्त्र सुधार नहुनु हो। सरकार आफै मोटाउनु हो। सरकार आफै मोटाउँदै गर्दा त्यसको बोझ पछि राष्ट्रले अवश्य पनि भोग्नुपर्छ।
देशलाई आत्मनिर्भर बनाउने विषय चालु बजेटमा पनि थियो, आगामी बजेटमा पनि छ। अब पनि फेरि हुन्छ। तर, त्यसको कार्यान्वयनको उपलब्धिलाई हेर्नेको हो भने त्यति सकारात्मक छैन।
अहिले पनि जिडिपीमा उत्पादनको हिसा ५.५ प्रतिशतभन्दा माथि उड्न सकेको छैन। सिमेन्टमा बाहेक अन्य वस्तुमा देशलाई आत्मनिर्भर बनाउन केही सफल भए पनि १२ वस्तुको उपलब्धि हुन सकेको छैन।
अहिले पनि कृषि उत्पादनको तरकारी, फलफूल तथा फूलसमेत विदेशबाट आयात गरिरहेका छौं।
अहिलेको अवस्थाबाट सम्भव नभए सरकारले उत्पादनको नयाँ क्षेत्र खोजी गर्नुपर्छ। नेपाललाई एसियाकै लागि शिक्षा, स्वास्थ्य पर्यटनमा गन्तव्य बनाउन सकिन्छ।
तर, यसको हेराइमा परिवर्तन हुनुपर्छ।
यसका लागि सरकारले लगानी विस्तार गर्दै अगाडि बढेको अवस्थामा नयाँ सुरुवात हुन सक्छ।
तर, यहाँ पर्यटक बढाउन भिजिट नेपालको कुरा गर्दैछौं। यो भिजिट नेपाल मनाउँदैमा पर्यटक बढ्ने होइन। पर्यटक बढाउन त हामीले गन्तव्य र प्रोडक्ट बढाउनुपर्छ। सँगसँगै सरकारले आर्थिक विशेष क्षेत्र, आयात तथा निर्यात क्षेत्रको स्पष्ट पहिचान गर्नुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
