समाज

बेलहिया मावि जग्गा प्रकरण : अख्तियारले थाल्यो विस्तृत अनुसन्धान

दीपक घिमिरे मंगलबार, जेठ १४, २०७६ १८:१५

भैरहवा- रुपन्देहीको सिद्धार्थनगर-१ बेलहियास्थित बेलहिया माध्यमिक विद्यालयको जग्गा व्यक्तिका नाममा भएको सम्बन्धमा अख्तियार दुरुपयोग अनुसन्धान आयोगले विस्तृत अनुसन्धान थालेको छ।

अख्तियारको बुटवल कार्यालयले गरेको प्रारम्भिक अनुसन्धानले उक्त जग्गा भू-माफिया गिरोह र मालपोत कर्मचारीको मिलोमतोमा हडपिएको निष्कर्ष निकाल्दै विस्तृत अनुसन्धान थालेको जानकारी दिएको हो।

विद्यालयका नाममा सिद्धार्थनगर नगरपालिका-१ को १ (ङ) को कित्ता नम्बर ३१० र ३११ को १२ कठ्ठा १५ धुर जग्गा थियो। सोमध्ये १२ कठ्ठा ४ धुर जग्गा हडपिएको समाचार केही समयअघि नेपाल लाइभमा प्रकाशित भएको थियो।

२०२९ सालमा स्थापित उक्त विद्यालयको जग्गा भू-माफिया र कर्मचारीको मिलेमतोमा हडपेर व्यक्तिका नाममा दर्ता भएको पाइएको थियो।

सो जग्गा सोही नगरपालिका वडा नम्बर ९ बस्ने विजयकुमार जैसवाल र गंगोत्रीदेवी जैसवालबाट वडा नम्बर ३ बस्ने ज्ञानीश्वरी श्रेष्ठको नाममा रजिष्ट्रेसन पास भएको देखिन्छ। विजयकुमार जैसवाल र गंगोत्रीदेवी जैसवालको अहिलेसम्म पहिचान खुल्न सकेको छैन।

उक्त जग्गा व्यक्तिको नाममा पार्नकै लागि श्रेष्ठसहित भू-माफिया र तत्कालीन मालपोत अधिकृतसहित मालपोत कर्मचारीको गिरोह नै सक्रिय रहेको श्रोतले समेत दाबी छ।

अख्तियारले सार्वजनिक जग्गा किनबेचमा भू-माफिया गिरोह र मालपोत कर्मचारीको गहिरो संलग्नता रहेको आँकलन गर्दै अनुसन्धान थप प्रभावकारी बनाएको अख्तियार कार्यालयको भनाइ छ।

सार्वजनिक जग्गा व्यक्तिको नाममा बनाउने विषय सामान्य नभएको भन्दै यसमा गम्भीर छानबिन गर्नुपर्ने भएकाले सोही अनुसार तयारी गरी काम अघि बढाएको अख्यतियार कार्यालय बुटवलका सूचना अधिकारी सुरेश भुसालले बताए। 'अख्तियार कार्यालयले सार्वजनिक जग्गा व्यक्तिको नाममा दर्ता गरिने कुरा विधिसम्मत भए नभएको विषयमा छानबिन सुरू गरिसकेको छ,' उनले भने।

अख्तियारले मातपोत कार्यालय रुपन्देहीबाट लिखत दर्ता डायरी, मोठ ठेली, लिखत ब्यान्डिङ ठेली र श्रेस्ता ठेलीसहितका सम्बन्धित कागजपत्र लगेर अनुसन्धान थालेको छ। कार्यालयले प्रमाणहरुको अध्ययन तथा दुवै पक्षसँगको सोधपुछ पछि सोही अनुसार थप अनुसन्धानमा लागेको बताएको छ।

विद्यालयको जग्गा व्यक्तिको नाममा गराउने समयमा मालपोत कार्यालय रुपन्देही भैरहवाका प्रमुख मालपोत अधिकृतको रुपमा शंकरप्रसाद सुवेदी कार्यरत थिए। जग्गा पास गर्ने अधिकृतको रुपमा सोही कार्यालयमा खिमानन्द आचार्य रहेका थिए।

लिखतमा प्रयोग गरिएको दस्तखत बिगारिएको, लिखतमा पानी पारिएको, जग्गा बिक्री गर्ने व्यक्तिको नागरिकता नम्बर र जारी मिति समेत नलेखिएको तथा जग्गा बिक्री गर्ने व्यत्तिको औँठा छाप समेत नराखी उक्त जग्गा अवैध तरिकाले श्रेष्ठको नाममा पारिएको श्रोतको दाबी छ।

यसरी खुल्यो घटना
बेलहिया-वसन्तपुर वाइपास सडक विस्तारका क्रममा विद्यालको सो जग्गामध्ये ११ धुर जग्गा सडकमा परेको थियो। विद्यालयको नाममा दर्ता प्रक्रिया अघि बढाउन खोज्दा उक्त जग्गा २०७० साल चैत्र ६ मा विजय कुमार जैसवाल र गंगोत्री देवि जैसवालबाट ज्ञानीश्वरी श्रेष्ठको नाममा पास भएको फेला परेको हो।

हडपिएको जग्गा नेपाल सरकारको छुट कित्ताका रुपमा रहेको थियो। पक्रिया पुर्‍याएर विद्यालयको नाममा ल्याउन नपाउँदै भू-माफियाहरुले व्यक्तिको नाममा पास गराएको स्थानीयको तर्क छ।

छुट कित्ता भएकोले विद्यालयका नाममा दर्ता गर्न सिद्धार्थनगर नगरपालिकाले २०५३ साल भाद्र १४ मा सिफारिस गरेको थियो। त्यसैगरी सिद्धार्थनगर नगरपालिका-१ ले २०६० साल आश्विन ११ गते सर्जमिन मुचुल्का तयार पारेर नापी शाखा, रुपन्देहीको फिल्ड बुक उतार समेत गरेको थियो।

नयाँ गौश्वरा नापीको प्रतिक्षामा लामो समय बितेपछि विद्यालयको नाममा जग्गा दर्ता प्रक्रिया अघि बढाउन खोज्दा उक्त जग्गा श्रेष्ठको नाममा रजिष्ट्रेसन पास भएको पाइएको हो।

वि.स. २०५३ सालबाट विद्यालयले भोगचलन गर्दै आइरहेको उक्त जग्गा २०६९ साल फागुन २० गतेदेखि पहिला श्री शर्मा एण्ड कम्पनी र हाल सुरेश प्रसाद कलवारलाई भाडामा दिइएको विदालयका पूर्वअध्यक्ष विष्णुप्रसाद शर्माले जानकारी दिए।

मालपोत कार्यालय रुपन्देहीका प्रमुख मालपोत अधिकृत शिवप्रसाद रेग्मीले उक्त जग्गाको विषयमा जग्गा किनबेच गर्ने पक्षलाई लिएर बयान गरिएको बताए। आफूहरूले बोलाएको बयानमा जग्गा बेच्ने व्यक्ति नआएको र खरिद गर्ने व्यक्ति ज्ञानेश्वरी श्रेष्ठ मात्रै आएको रेग्मीले बताए।

मालपोतसँगको बयानमा श्रेष्ठले आफुले जग्गा किनेको बताएपनि जग्गा किनेका आवश्यक कागज हराएको बताएको मालपोत श्रोतको भनाइ छ। श्रोतका अनुसार श्रेष्ठ जग्गा प्रकरणमा जोगिने कुनै आधार फेला नपरेपछि कागजपत्र हराएको नाटक सुरु गरेकी छन्। मातपोत कार्यालयले आफू मातहत कर्मचारीसंग पनि प्रारम्भिक अनुसन्धान गरिरहेको जनाएको छ।

यो पनि ः सरकारी सम्पत्तिमा भूमाफियाको खेल : बेलहिया माविको जग्गा ज्ञानेश्वरी श्रेष्ठका नाममा