भैरहवा- रुपन्देहीको सिद्धार्थनगर नगरपालिका-१ बेलहियामा रहेको बेलहिया माध्यमिक विद्यालयको सरकारी जग्गा भूमाफियाले हडपेको खुलासा भएको छ।
२०२९ सालमा स्थापित उक्त विद्यालयको १२ कठ्ठा १५ जग्गा मध्ये १२ कठ्ठा ४ धुर जग्गा भुमाफियाले हडपेको हालै मात्र खुलासा भएको हो।
सिद्धार्थनगर नगरपालिका-१ को १(ङ) को कित्ता नम्बर ३१० र ३११ को १२ कठ्ठा १५ धुरमध्ये १२ कठ्ठा ४ धुर जग्गा सोही नगरपालिका वडा नम्बर ९ वस्ने विजयकुमार जैसवाल र गंगोत्रीदेवी जैसवालबाट ज्ञानीश्वरी श्रेष्ठका नाममा रजिस्ट्रेसन पास भएको देखिन्छ। श्रेष्ठ सिद्धार्थनगर नगरपालिका वडा नम्बर ३ का स्थायी बासिन्दा हुन्।
विद्यालय व्यबस्थापन समितिका अध्यक्ष सुरेन्द्र क्षेत्रीले जानकारी उक्त सरकारी जग्गा व्यक्तिको नाममा पार्नका लामो प्रयास भएको अनुमान गर्न गाह्रो नभएको बताए।
विद्यालको सो जग्गा श्रेष्ठका नाममा पार्न श्रेष्ठसहित भूमाफिया र तत्कालीन मालपोत अधिकृतसहित मालपोत कर्मचारीको गिरोह नै सक्रिय रहेको समाचार श्रोतको दाबी छ।
श्रेष्ठ जेसिआई सिद्धार्थ लेडी नेपालकी पूर्व अध्यक्ष तथा होटल व्यवसायी समेत हुन्।
विद्यालयको जग्गा माफियाले व्यक्तिको नाममा गराएको समयमा मालपोत कार्यालय रुपन्देही भैरहवाको प्रमुख मालपोत अधिकृत शंकरप्रसाद सुवेदी* कार्यरत थिए। सोही समयमा जग्गा पास गर्ने अधिकृतको रुपमा खिमानन्द आचार्य थिए।
यता आर्चायले भने उक्त जग्गा पास गर्न आफ्नो कुनै भुमिका नरहेको उल्लेख गरेका छन्।
उनले आफ्नो नामबाट कीर्ते हरुताक्षर गरेर जग्गा पास गराईएको दाबी गरे।
'सरकारी जग्गा व्यक्तिको नाममा गराउने कार्यमा मेरो कुनै संलग्नता छैन,' आर्चायले भने, 'घटनाको सत्यतथ्य बाहिर ल्याउन र घटनामा संम्लग्नलाई कारबाही गर्न मैले अनुसन्धानका लागि आवश्यक सहयोग गर्नेछु।'
प्रमुख मालपोत अधिकृतलाई श्रेस्ता बदर गरेर अनुसन्धान गर्न समेत उनले आग्रह पनि गरे।
लिखतमा प्रयोग गरिएको दस्तखत कीर्ते गरिएको, लिखतमा पानी पारिएको, हस्ताक्षर बिगारेको, जग्गा बिक्री गर्ने व्यक्तिको नागरिकता नम्बर र जारी मिति नलेखिएको तथा जग्गा बिक्री गर्ने व्यक्तिको औँठा छाप समेत नरहेको हुँदा उक्त जग्गा अवैध तरिकाले श्रेष्ठका नाममा रजिस्ट्रेसन पास गरेको दाबी गरे।
यसरी भयो घटनाको खुलासा
बेलहिया-वसन्तपुर वाइपास सडक विस्तार गर्दा सडक फराकिलो बन्न गई विद्यालयको ११ धुर जग्गा सडकमा परेको थियो।
जग्गा विस्तार सम्बन्धी काम गर्ने क्रममा आवश्यक खोजीनिति गर्दा विद्यालयको नाममा रहेको सो जग्गा माफियाले अर्कै व्यक्तिको नाममा पारिसकेको खुलासा भएको हो।
विद्यालयको उक्त जग्गा २०७० साल चैत ६ गते विजय कुमार जैसवाल र गंगोत्रीदेवी जैसवालबाट ज्ञानीश्वरी श्रेष्ठको नाममा पास गरिएको फेला परेको हो।
हडपिएको जग्गा नेपाल सरकारको छुट कित्ताका रुपमा रहेको र पक्रिया पुर्याएर विद्यालयका नाममा ल्याउन नपाउँदै भुमाफियाले व्यक्तिको नाममा गराएको स्थानीयबासीको तर्क छ।
नेपाल सरकारको छुट कित्ता भएकोले विद्यालयको नाममा दर्ता गर्न सिद्धार्थनगर नगरपालिकाले २०५३ साल भदौ १४ गते सिफारिस गरेको थियो।
त्यसैगरी सिद्धार्थनगर नगरपालिका-१ को कार्यालयले २०६० साल असोज ११ गते सर्जमिन मुचुल्का तयार पारेर नापी शाखा, रुपन्देहीको फिल्ड बुक उतारसमेत गरेको थियो।
नयाँ गोश्वरा नापीको प्रतीक्षामा लामो समय बितेपछि हाल विद्यालयको नाममा जग्गा दर्ता प्रक्रिया अघि बढाउन खोज्दा उक्त जग्गा श्रेष्ठको नाममा भइसकेको पाइएको बेलहिया माध्यामिक विद्यालयका विद्यालय व्यवस्थापन समितिका पूर्व अध्यक्ष तथा स्थानीय समाजसेवी विष्णुप्रसाद शर्माले जानकारी दिए।
वि.स. २०५३ सालबाट विद्यालयले भोग–चलन गर्दै आई रहेको उक्त जग्गा २०६९ साल फागुन २० गतेभन्दा पहिला श्री शर्मा एन्ड कम्पनी प्रालिका नाममा रहेको थियो।
तर हाल सुरेश प्रसाद कलवारलाई भाडामा दिइएको पूर्व अध्यक्ष शर्माले जानकारी दिए।
भूमाफियामार्फत् व्यक्तिको नाममा गएको उक्त जग्गा रोक्काका लागि नगरपालिका अन्तर्गतको वडा नम्बर १ को कार्यालय र जिल्ला प्रशासन कार्यालय रुपन्देही मार्फत् खोजी गर्दा श्रेष्ठलाई जग्गा रजिस्ट्रेसन पास गराउने व्यक्ति जैसवालको पहिचान हुन नसकेका बताइएको छ।
मालपोत कार्यालय रुपन्देहीमा जैसवालको नाममा उक्त कित्ता प्रमाणित तथा मिसिल दर्ता समेत नरहेको देखिन्छ।
सम्बन्धित वडा कार्यालयको सिफारिस, चारकिल्ला प्रमाणित, स्थलगत सर्जमिन बिना नै नाटकीय रुपमा उक्त जग्गा व्यक्तिको नाममा कसरी दर्ता हुन पुग्यो भन्दै आश्चर्यमा परेको बेलहियाका स्थानीय देवराज न्यौपानेले जानकारी दिए।
स्थानीयको सक्रियता
विद्यालयका नाममा रहेको सार्वजनिक जग्गा व्यक्तिको नाममा पुगेपछि जग्गा फिर्ताका लागि बेलहियाबासीले सक्रियता देखाएका छन्।
ज्ञानीश्वरी श्रेष्ठको नाममा भएको उक्त जग्गा विद्यालयको नाममा नआउँदा सम्म बेलहियाबासी चुप लागेर नबस्ने उनले चेतावनी दिए।
विद्यालयको जग्गा भूमाफिया मार्फत व्यक्तिले हडपेको भन्दै बेलहियाबासीले जग्गा फिर्ता गर्न माग गरेका हुन्।
विद्यालयको खेल मैदानका लागि खरिद गरिएको उक्त जग्गा हडपेर करोडौंमा कारोबार गर्ने उद्देश्य रहेको भन्दै बेलहियाबासी आक्रोशित समेत बनेका छन्।
अनुसन्धान अघि बढ्यो : मालपोत कार्यालय
मालपोत कार्यालय रुपन्देहीका प्रमुख मालपोत अधिकृत शिव प्रसाद रेग्मीले उक्त जग्गाको विषयमा अनुसन्धान अगाडि बढाएको बताए।
हालसम्मको प्रारम्भिक अनुसन्धानले उक्त जग्गा कीर्ते गरेर व्यक्तिको नाममा लगिएको फेला परेको उनले बताए।
'विद्यालय पक्षले जग्गा रोक्का राख्न दिएको निवेदनको आधारमा जग्गा रोक्का राखिएको छ,' उनले भने, 'जग्गा पास बदर गर्ने विषयमा विद्यालयले निवेदन नदिएका कारण समस्या छ। विद्यालयको निवेदन प्राप्त भएपछि कारबाही अघि बढाउन सजिलो हुन्छ।'
यस विषयमा आफूहरु गम्भीर अनुसन्धानमा लागेको मालपोत अधिकृत रेग्मीले दाबी गरे।
सरकारी जग्गा व्यक्तिको नाममा गएपछि जिल्ला प्रशासन कार्यालय रुपन्देहीले पनि चासो देखाएको छ।
रुपन्देहीका प्रमुख जिल्ला अधिकारी उदयबहादुर राना मगरले सरकारी जग्गा व्यक्तिको नाममा गएको विषयमा आफूले गम्भीर अनुसन्धान गर्ने बताए।
उनले सरकारी जग्गा व्यक्तिको नाममा बनाउने गिरोहलाई कानुनी दायरामा ल्याएरै छाड्ने दाबी गरेका छन्।
*(यसअघि प्रकाशित समाचारमा मालपोत कार्यालय रुपन्देही भैरहवाका तत्कालीन प्रमुख मालपोत अधिकृत शंकरप्रसाद सुवेदी हुनुपर्नेमा अन्यथा भएकाले सच्याइएको छ।-सम्पादक)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1786602170.png)
