समाज

सप्तरीमा मुखियाको दस्तखत कीर्ते गरी प्रअद्वारा विद्यालयको लाखौं रकम हिनामिना

दिनेश शर्मा आइतबार, वैशाख २२, २०७६ ०९:४०

राजविराज- प्रदेश सरकारको विकास बजेट दुरुपयोग गर्न पूर्व सांसदसहितका व्यक्ति नै कीर्तेमा संलग्न भएको घट्ना टुङ्गिन नपाउँदै सप्तरीमा अर्को कीर्ते प्रकरण चर्चामा आएको छ।

कञ्चनरुप नगरपालिका-३, सुब्बाटोलस्थित शंकर माध्यमिक विद्यालयका प्रधानाध्यापक (प्रअ) दीलिपकुमार गुप्ताले कीर्ते गरी लाखौं रकम हिनामिना गरेको रहस्य पछिल्लो पटक खुलेको छ।

शिक्षा विकास तथा समन्वय इकाइ, राजविराजले आव २०७५/०७६ को ‘मावि शिक्षक अनुदान’ शीर्षकमा पठाएको ७ लाख ३२ हजार रुपैयाँ गुप्ताले कीर्ते गरी हिनामिना गरेको विषय सार्वजनिक भएको हो।

प्रअ गुप्ताले विद्यालयका मुखिया श्रवण चौधरीको दस्तखत कीर्ते गरी रकम हिनामिना गरेका हुन्।

राजविराजस्थित राष्ट्रिय वाणिज्य बैंकमा रहेको विद्यालयमा कुनै सूचना नै नगरी गुपचुप राखेको अध्यक्ष चौधरीले बताए।

बैंकमा रहेको १६०९ नम्बरको चल्ती खाताबाट रकम निकालेको विद्यालय व्यवस्थापन समितिका अध्यक्ष रणधीर चौधरीको भनाइ छ। प्रअ गुप्ताले कीर्ते गरी रकम निकालेको स्वीकारसमेत गरिसकेका छन्।

विद्यालयको खाता प्रअ गुप्ता र मुखिया चौधरीको संयुक्त दस्तखतबाट सञ्चालित छ। तर गुप्ताले बैंकबाट रकम झिक्नुअघि र पछि पनि सूचना गर्नुको सट्टा अर्कै चेक प्रयोग गरी रकम निकालिएको पाइएको छ।

मुखिया चौधरीले पनि आफनो दस्तखत कीर्ते गरी गुप्ताले पटक-पटक गरी बैंकवाट रकम निकालेको बताए।

'बैंकबाट रकम निकाल्न चेक बुकसमेत अर्कै प्रयोग गर्ने गरेको पाइएको छ,' उनले भने ‘विद्यालयका नाममा क्रम संख्या ००४८३०४००३ देखि ००४८३०४०२६ सम्मको चेक बुक छ। तर, मेरोसमेत दस्तखत गरी ०४८३३११४३ नम्बरको चेकबाट रकम झिकिएको छ।’

प्रअले कीर्ते गरी रकम हिनामिना गरेको विषयमा कञ्चनरुप नगरपालिकाका मेयर बसन्त मिश्रलेसमेत बेवास्ता गरेको आरोप अध्यक्ष चौधरीले लगाए।

आव २०७१/०७२ देखि हालसम्म विद्यालयको ४० लाखभन्दा बढी रकम हिनामिना गरेको अनुमान गरिएको छ। यस सम्बन्धमा थप अनुसन्धान भइरहेको सरोकारवालाहरूले बताएका छन्।

शौचालय निर्माण, पिसिएफ शिक्षक र कार्यालय सहयोगीको तलब, छात्रवृत्ति र पाठ्यपुस्तकको रकम समेत गुप्ताले दुरुपयोग गरेको स्थानीयले आरोप लगाएका छन्।

गुप्ता आफैंले स्वीकारे ७ लाख ३२ हजारको हिनामिना

प्रअ गुप्ताले मुखियाको दस्तखत कीर्ते गरी रकम झिकेको विषय स्वीकार गरेका छन्।

गत फागुन ५ गते उनले विद्यालयको लेटरप्याडमै आफूले रकम हिनामिना गरेको स्वीकार्दै कबुलियतनामा गरेका छन्।

सो रकम चैत्र ४ गते पुनः बैंक दाखिला गरिएको जनाइएको छ।

गुप्ता प्रअबाट बर्खास्त, साहलाई निमित्तको जिम्मेवारी

कीर्ते गरेर विद्यालयको लाखौं रुपैयाँ हिनामिना गरेको जानकारीपछि विद्यालय व्यवस्थापन समिति र वडाअध्यक्ष सत्यनारायण साहसहित गत चैत्र ५ गतेको बैठकले प्रअ गुप्तालाई निलम्बन गरेको छ। विद्यालयमा शिक्षक सूर्यनारायण यादव निमित्त प्रअ नियुक्त भएका छन्।

तर प्रअबाट हटाउने निर्णयविरुद्ध गुप्ताले उच्च अदालत जनकपुर, राजविराज इजलासमा चैत्र ६ गते रिट निवेदन दायर गरेका छन्। निमित्त प्रअ यादव, अध्यक्ष चौधरी र वडा अध्यक्ष साहलाई विपक्षी बनाएको उनले अन्तरिम आदेशसहित निषेधाज्ञाको आदेश जारी गर्न माग गर्दै रिट दायर गरेका थिए।

अदालतले प्रधानाध्यापकका रुपमा निवेदकले स्थायी नियुक्ति पाएको भन्ने नदेखिएको र निवेदकलाई शिक्षकको रुपमा हाजिर गराई कामकाज गराउने भन्ने निर्णय गरेको देखिएकाले निवेदनको माग बमोजिम अन्तरिम आदेश जारी गरिरहनु मनासिव नहुने आदेशमा उल्लेख गरेको छ।

नगरपालिका पनि सक्रिय

प्रअको कबुलियतनामा, घटना प्रकृति तथा अनुगमनका आधारमा कञ्चनरुप नगरपालिकाले समेत गुप्ताविरुद्ध कारबाही प्रक्रिया अघि बढाएको छ।

नगरपालिकाको शिक्षा शाखाका स्रोतव्यक्ति दामोदर ठाकुरले प्रअ गुप्ताको तलव रोक्का गरी कारबाही सुरु गरेको बताए। ‘हामीले ३ दिने लिखित स्पष्टीकरण सोधेका थियौं, तर जवाफ आएको छैन,’ ठाकुरले भने।

शिक्षा विकास तथा समन्वय इकाई सप्तरीले पनि आवश्यक कारबाहीका लागि अख्तियारलाई पत्राचार गरिएको जनाएको छ।

विद्यालयलाई अख्तियारको पत्र

विद्यालयको रकम हिनामिना भएको विषयमा अख्तियारले समेत चासो देखाएको छ। आयोगको इटहरीस्थित कार्यालयले बैशाख ९ गते विद्यालयका नाममा पत्राचार गरी आव ०७१/०७२ देखि आव ०७४/०७५ सम्मका शंकास्पद विषयको शीर्षक नै तोकेर राय/प्रतिक्रियासहितका कागजपत्र माग गरेको छ।

अख्तियारको पत्रको जवाफ बैशाख १६ गते नै पठाइएको विद्यालयले जनाएको छ।

विद्यालयमा अनियमितता बढेको र रकम हिनामिना भएको विषयमा यसअघि पनि अभिभावकहरुले अख्तियारमा उजुरी दिएका थिए। उजुरीका आधारमा २०७४ फागुन २८ गते अख्तियारले कञ्चनरुप नगरपालिकालाई सुझाव सहितको प्रतिवेदन पठाउन पत्राचार गरेको थियो।

अख्तियारले पटकपटकको ताकेता बेवास्ता गर्दै आएको नगरपालिकाले यसपटक भने इन्जिनियर अशोक यादव र स्रोतव्यक्ति दामोदर ठाकुरलाई विद्यालयको अनुगमनमा पठाएको थियो।

सोही आधारमा नगरपालिकाले गुप्तालाई कारबाही गर्न सिफारिससहितको पत्र अख्तियारलाई पठाएको छ।