काठमाडौं– पोखरा विश्वविद्यालयबाट सम्बन्धन लिएर परीक्षा सञ्चालन गरेका निजी कलेजलाई कारबाहीको माग गर्दै विरोध गर्ने क्रममा नेविसंघका पोखरा विश्वविद्यालय विभागका विद्यार्थी नेता नवराज त्रिपाठी पक्राउ परेका छन्।
चाैथाे पटक ताेकिएकाे मितिअनुसार आजदेखि परीक्षा सुरु भएकाे छ। काठमाडाैंकाे पुरानाे बानेशवरस्थित सायम कलेजमा परीक्षा चलिरहँदा निजी कलेजलाई कारबाहीकाे माग गर्दै विराेधमा उत्रिएका नेता त्रिपाठी पक्राउ परेका हुन्। उनलाई तीनकुनेस्थित प्रहरी कार्यालयमा राखिएको छ।
विश्वविद्यालयअन्तर्गत ४२ कलेजले ३ सय ४४ विद्यार्थीकाे तोकिएको मापदण्ड नपुर्याइ भर्ना गरेका थिए। नेविसंघले परीक्षा केन्द्र तोकेका कलेजमा तालाबन्दी गरेको थियो। कलेजलाई कारबाहीको माग राख्दै नेविसंघ आन्दोलनमा उत्रिएकाे थियो।
यसअघि तीन पटकसम्म परीक्षा स्थगन भएसँगै निजी कलेजका तर्फबाट सर्वोच्च अदालतमा मुद्दा दायर भएको थियो। गत बुधबार पोखरा विश्वविद्यालयका नाममा आदेश जारी गर्दै सर्वोच्चले रजिष्ट्रेसन उपलब्ध गराउन निर्देशन दिएको थियाे। रिटको अन्तिम टुंगो नलागेसम्म विद्यार्थीलाई रजिष्ट्रेसन नम्बर उपलब्ध गराई परिक्षामा सहभागी गराउन सर्वोच्चले अन्तरिम आदेश दिएको हाे।
न्यायाधीश विश्वम्भरप्रसाद श्रेष्ठको एकल इजलासले ‘तोकेको रजिष्ट्रेसन दस्तुर बुझाई २०७५ कार्तिकबाट नियमित विद्यार्थीको रुपमा अध्ययन गरेको तथ्य’ उल्लेख गरेको छ। निजी विद्यालयको तर्फबाट मन्दिप खड्काले पोखरा विश्वविद्यालयलाई विपक्षी बनाइ मुद्दा दायर गरेका थिए।
सर्वोच्चको आदेशसँगै पोखरा विश्वविद्यालयबाट सम्बन्धन लिई विभिन्न ४२ कलेजले स्नातक तहको व्यवस्थापन संकायमा भर्ना लिएका ३ सय ४४ विद्यार्थी आजबाट सुरु भएकाे परीक्षामा सामेल भएका छन्।
परिक्षा नियन्त्रण कार्यालयले चाैथाे पटक सार्वजनिक गरेकाे परीक्षा तालिकाअनुसार आजबाट परीक्षा सुरु भएकाे हाे।
यसअघि बैसाख ७ मा बसेको प्राज्ञिक परिषद्को बैठकले पूर्ववत् निर्णयमा पुनर्विचार गर्न नसकिने जनाउँदै मापदण्ड नपुगेका विद्यार्थीहरूको रजिष्ट्रेसन नहुने स्पष्ट पारेको थियो। विश्वविद्यालयको निर्णयबाट रुष्ट बनेका निजी कलेजहरूले विज्ञप्ति प्रकाशित गरी प्राज्ञिक परिषद्को निर्णयको विरोध गरेका थिए।
प्राज्ञिक परिषद्ले कक्षा ११ र १२ मा न्यूनतम ‘सी प्लस' श्रेणीलाई परिक्षार्थी हुन योग्य ठहराएको थियो। त्यसै मापदण्डको आधारमा परीक्षा नियन्त्रण कार्यालयले परीक्षाकाे तालिका निकालेको थियो।
स्नातक तह व्यवस्थापन संकायको पहिलो सेमेस्टरमा भर्नाका लागि विश्वविद्यालय प्राज्ञिक परिषद्ले निर्धारण गरेको मापदण्डलाई कलेजहरूले आफू अनुकूल व्याख्या गरी विद्यार्थी भर्ना गरेका थिए।
व्यवस्थापन संकायले आफू मातहतका कलेजहरूलाई परिपत्र गरी विद्यार्थी भर्नाको मापदण्ड गत साउन १० मा जानकारी गराएको थियो।
व्यवस्थापन संकायका सबै कार्यक्रमका लागि कक्षा ११ र १२ मा न्यूनतम मापदण्ड ‘सि’ ग्रेड हुनुपर्ने स्पष्ट पारेको थियो। अक्षारांकन पद्धतिअनुसार कक्षा ११ र १२ को लागि छुट्टाछुट्टै ग्रेड र अङ्क पद्धतिको आधारमा प्लस टु पास वा समकक्षी ट्रान्सक्रिफ्ट अनुसारको प्रतिशतलाई दोहोरो तरिकाले व्याख्या गरिएको थियो।
विश्वविद्यालय पदाधिकारी र कलेज सञ्चालकहरूले आ– आफ्नो तरिकाले मापदण्डको व्याख्या गरेपछि परीक्षा सर्दै आएको थियो।
यस सम्बन्धमा नेपाल लाइभले प्रकाशन गरेका शृंखलाबद्ध समाचारहरु:
मापदण्ड विपरीत विद्यार्थी भर्ना गरेका निजी कलेजहरूले विश्वविद्यालयलाई झुकाइ छाडे
मापदण्डविपरीत भर्ना-४ : ४२ कलेजका ३४४ विद्यार्थीलाई परीक्षा दिने व्यवस्था गर्न सर्वोच्चको आदेश
मापदण्डविपरीत भर्ना-३ : कलेजको चरम लापरबाही, ३४४ विद्यार्थी परीक्षा दिनबाट वञ्चित
मापदण्डविपरीत भर्ना-२ : विद्यार्थी बढाउन ४२ कलेजको एकपछि अर्को ‘हर्कत’
मापदण्डविपरीत भर्ना : विद्यार्थीको भविष्यमाथि खेलबाड गर्ने ४२ कलेज
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
