बुटवल – नेकपा एमाले र नेकपा माओवादी केन्द्रको वाम गठबन्धनले रुपन्देहीलाई प्रदेश ५ को राजधानी बनाउने प्रतिबद्धता व्यक्त गरेका छन्।
गठबन्धनले रुपन्देहीलाई प्रदेशको राजधानी बनाउन पूर्वाधारलगायत सम्पूर्णरुपले अनुकूल प्रतिबद्धता आज सार्वजनिक गरेको हो । रुपन्देही क्षेत्र नं २ का प्रतिनिधिसभा उम्मेदवार एवं एमालेका उपमहासचिव विष्णुप्रसाद पौडेलले विकासको पूर्वाधार, भौगोलिका र प्रशासनिक अनुकूलतालगायत हिसाबले रुपन्देहीबाहेक अन्यत्र राजधानी बन्ने कुनै सम्भावना नरहेको दाबी गरे।
प्रतिबद्धता पत्रमा विगतमा संसद र सडकको आन्दोलनबाट यस प्रदेशको तराई र पहाडलाई अलग गर्ने षड्यन्त्रलाई सदाका लागि असफल तुल्याएको जनाउँदै अब प्रदेशको राजधानी स्थापना गर्न अनुकूल हुने गरी विभिन्न १२ बुँदामा रणनीतिक आयोजना तथा कार्यक्रम कार्यान्वयन गरिने उल्लेख छ।
नेता पौडेलले बुटवल, तिलोत्तमा, सैनामैना र आसपासका क्षेत्रमा जग्गाको प्रबन्ध गरी प्रादेशिक राजधानीका लागि आवश्यक पर्ने प्रशासनिक एवं सार्वजनिक सेवाप्रवाहका सरकारी भवन एवं आवश्यक संरचना निर्माण गरिने बताए।
प्रतिबद्धता पत्रमा बुटवल उपमहानगरपालिका, तिलोत्तमा, सिद्धार्थनगर, सैनामैना, देवदह नगरपालिका र ओमसतिया, रोहेणी, शुद्धोधन, सियारीलगायत गाउँपालिकालाई समेटेर महानगरपालिकामा विकास गरिने र त्यसका लागि सम्बन्धित नगरपालिका, गाउँपालिका, प्रदेश र संघीय सरकारका प्रतिनिधि सम्मिलित महानगर विकास परिषद् गठन गरिने उल्लेख छ।
अन्तर्राष्ट्रिय योजनविद्को सहभागितामा महानगरको गुरुयोजना निर्माण गरी कार्यान्वयन गरिने प्रतिबद्धतासमेत जाहेर गरिएको छ । यसैगरी निर्माणाधीन बुटवल–बेलहिया छ लेन सडकलाई गुणस्तरीय रूपमा शीघ्र सम्पन्न गरी, ठेक्का प्रव्रिmया अघि बढेको बुुटवल–नारायणगढ सडकलाई छ लेनमा स्तरोन्नति गर्ने कार्यलाई तीव्रताका साथ अघि बढाउन आफूहरुले नेतृत्व लिने प्रतिबद्धता जनाइएको छ।
साथै बुटवल–कोहलपुर राजमार्गलाई छ लेनमा स्तरोन्नति गर्ने कार्य थालनी गरिनेछ । बुटवल–पोखरा सिद्धार्थ राजमार्गलाई स्तरोन्नति गरी ‘डेडिकेटेड डबल लेन’को बनाइने समेत उल्लेख छ।
यस्तै त्रिवेणी–परासी–भैरहवा–लुम्बिनी–तिलौराकोट–बहादुरगन्ज हुलाकी सडकलाई चार लेनमा स्तरोन्नति गरिनुका साथै बेलवास–बेथरी चार लेन सडक, मुर्गिया–सूर्यपुरा–लुम्बिनी सडक र बेलवास–नुवाकोट–झुम्सा सडकको निर्माण कार्य सम्पन्न गरिने जनाइएको छ।
‘बृहत् लुम्बिनी चक्रपथ’
रूपन्देही, पश्चिम नवलपरासी, पूर्वी नवलपरासी, पाल्पा, गुल्मी, अर्घाखाँची र कपिलवस्तु जिल्लालाई सडक सञ्जालमा आबद्ध गर्न बृहत् लुम्बिनी चक्रपथको निर्माण कार्य अघि बढाउनाका साथै बुटवललाई ५ नं प्रदेशका सबै जिल्ला सदरमुकामसँग कम्तीमा ‘डेडिकेटेड दुई लेन’ सडक सञ्जालद्वारा जोडिने प्रतिबद्धता पनि व्यक्त गरिएको छ।
यस्तै पूर्वपश्चिम रेलमार्ग र केरुङ–काठमाडौं–पोखरा–लुम्बिनी रेलमार्गको विस्तृत परियोजना प्रस्ताव तयार गरी निर्माण कार्य आरम्भ गरिनुका साथै निर्माणाधीन गौतमबुद्ध अन्तर्राष्ट्रिय विमानस्थलको निर्माण कार्य सम्पन्न गरी काठमाडौँ, पोखरा, विराटनगर, नेपालगन्ज, धनगढीलगायतका देशका मुख्य शहर र अन्तर्राष्ट्रिय क्षेत्रमा हवाई सेवा सञ्चालन गरिने छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
