काठमाडौँ – नेकपा एमालेले निर्वाचन स्वच्छ र मर्यादित बनाउनका लागि सरकारलाई ध्यानाकर्षण गराएको छ।
निर्वाचन परिचालन कमिटीका सदस्य मुकुन्द न्यौपाने, अग्नि खरेल, बिन्दा पाण्डे, युवराज कार्की र रमेश बडालसहितको टोलीले मुख्य सचिव, गृहसचिव र तीनवटै सुरक्षा निकायका प्रमुखहरूसँग सुरक्षा चूनौतीका बारेमा छुट्टाछुट्टै छलफल गरी निर्वाचनमा सम्भावित धाँधलीप्रति ध्यानाकर्षण गराएको हो।
निर्वाचन परिचालन कमिटीका प्रवक्ता विष्णु रिमालले हालै सरकारले आचार संहिताविपरीत प्रहरी र प्रशासनका प्रमुखहरूको सरुवा र हेरफेर गरेको बारेमा प्रश्न गरिएको र त्यसले स्वच्छ निर्वाचनलाई पार्न सक्ने असरका बारेमा ध्यानाकर्षण गराउँदै आचारसंहिताविपरीत काम नगर्नका लागि सचेत गराइएको जानकारी दिए।
कमिटीले सञ्चारमाध्यममा दोलखामा नेपाली कांगे्रस र विप्लव नेतृत्वको नेकपासित गोप्य बैठक भएको समाचारप्रति ध्यानाकर्षण गराउँदै सरकारको जवाफको माग गरेको छ। उम्मेद्वार, मतदाता र मतपेटिका सुरक्षाको विषयमा पार्टी गम्भीर रहेको र निर्वाचन स्वच्छ र भयरहित वातावरणमा होस् भन्ने माग एमालले गरेको छ।
यसैबीच आजै निर्वाचन परिचालन कमिटीका सदस्य अग्नि खरेलको नेतृत्वमा गएको टोलीले प्रमुख निर्वाचन आयुक्तसित भेटघाट गरी स्वच्छ निर्वाचन र प्रहरी प्रशासनलाई प्रयोग गरी हुनसक्ने लक्षित धाँधलीप्रति आयोगको ध्यानाकर्षण गराएको छ।
संवेदनशील निर्वाचन क्षेत्रबाट मतपेटिका मतगणनास्थलमा ल्याउँदा कानुनबमोजिम उमेदवारको प्रतिनिधि रहन पाउनुपर्ने व्यवस्थाका लागि समेत आयोगको ध्यानाकर्षण गराएको प्रवक्ता रिमालले जानकारी दिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
