बिहीबार दुई देशबीच भएकाे छलफलपछि समझदारीका लागि आवश्यक 'ड्राफ्ट' साटासाट गरिँदै
काठमाडौं– नेपाल र संयुक्त अरब इमिरेट्स (युएई) बीच नयाँ श्रम सम्झौताको टुंगो लागेपनि समझदारी हुने समय केही पछि सर्ने भएकाे छ।
इस्लाम धर्मालम्बीहरूको महान पर्व रमजान नजिकिएसँगै समझदारी हुने मिति लम्बिने मन्त्रालय स्रोतले बताएको छ। यसवर्ष मे ६ देखि इस्लाम धर्मालम्बीहरूको रमजान पर्व रहेकोले समझदारी हुने समय केही पर धकेलिने जनाइएको छ।
यस पर्वमा बिहान सबेरैदेखि सूर्यास्त नभएसम्म मुसलमानहरू रोजा व्रत बस्ने गर्छन्। बिरामी र अशक्तबाहेक सबै मुस्लिमहरूलाई अनिवार्य गरिएको यो पर्व १ महिनासम्म चल्छ।
युएईसँग १२ वर्ष अघिदेखिको श्रम समझदारी खारेज गरी नयाँ श्रम समझदारी गर्ने विषयमा गत बिहीबार दुई देशका विज्ञ टोलीको छलफलपछि टुंगो लागेको थियो।
सन् २००७ मा युएई र नेपालबीच भएको श्रम समझदारी श्रमिकहरूको हकहितमा प्रभावकारी नभएको भन्दै श्रम, रोजगार तथा सामाजिक सुरक्षा मन्त्री गोकर्ण विष्टले युएई सरकारसँग नयाँ श्रम समझदारीका लागि प्रस्ताव अघि सारेका थिए।
युएईमा शून्य लागतमा कामदारहरु जान पाउने गरी तयारी भइसकेको जनाइएको छ। न्यूनतम पारिश्रमिकको प्रत्याभूत गरी सामाजिक सुरक्षाको ग्यारेन्टीसहित कामदारहरू पठाइनेबारे छलफल भइसकेको छ। यद्यपि समझदारी पत्रमा हस्ताक्षर गरिने मितिको भने टुंगो लागेको छैन।
समझदारीका लागि आवश्यक 'ड्राफ्ट' समेत आदानप्रदान भइसकेको छ। जसमा नेपाली कामदारहरूले पासपोर्ट पनि आफ्नै साथमा राख्न पाउने उल्लेख छ।
श्रमिकहरूको ज्याला महिनाको पहिलो हप्ता बैंकमार्फत् पाउने उल्लेख गरिएको छ।
ड्राफ्टमा श्रमिकहरूको बिमा तथा स्वास्थ्य सुविधाहरू समेत उल्लेख गरिएको श्रम मन्त्रालयका सहसचिव रामप्रसाद घिमिरेले जानकारी दिए। उनले भने, ‘हामीले श्रमिकहरूको हकहित हुने गरी समझदारीका बुँदाहरू तय गरेका छौं, युएईसँग भएको पुरानो समझदारी प्रभावकारी नभएपछि त्यसलाई खारेज गरी नयाँ श्रम समझदारी कायम गर्न लागेका हौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
