काठमाडाैं- कृषि तथा पशुपंक्षी विकासमन्त्री चक्रपाणि खनालले नेपाल कृषि अनुसन्धान परिषद (नार्क) ले प्रभावकारी रुपमा काम गर्न नसकेको भन्दै कडा आलोचना गरेका छन्।
नार्कअन्तर्गतको बाह्य अनुसन्धान महाशाखाले आयोजना गरेको ‘१३औं राष्ट्रिय बाह्य अनुसन्धान कार्यशाला गोष्ठी’मा बोल्दै मन्त्री खनालले नेपालमा कृषि क्षेत्रमा भएको अध्ययन अनुसन्धान लाजमर्दो भएको धारणा राखेका हुन्।
‘पहिले हामी अनुसन्धानमा छिमेकी देशभन्दा अगाडि थियौं, तर अहिले लाजमर्दो अवस्था छ। ४० को दशकमा जस्तो विकास अहिले भएको छैन। जनतामा नपुग्ने अनुसन्धानको केही काम छैन। अनुसन्धानलाई तलसम्म पुर्याउने हो भने केही तरिका बदल्नुपर्छ’, उनले भने।
लामो समयदेखि नार्कमा बसेर अध्ययन अनुसन्धान गरिरहेका कृषि वैज्ञानिकहरुको कार्यक्षमता र दक्षताप्रति पनि मन्त्री खनालले प्रश्न उठाएका छन्। ‘कतिपय अनुसन्धानकर्ता आफैंले गरेको अनुसन्धान बुझ्नु हुन्छ कि हुन्न शंका लाग्छ। अनुसन्धान किसानले सजिलै बुझ्ने र काम लाग्ने हुनुपर्छ’, मन्त्री खनालकाे भनाइ थियाे।
नार्कको संरचनालाई परिमार्जित रुपमा अगाडि बढाउन खोजेपनि आफू सफल हुने/नहुनेमा द्विविधा रहेको खनालले आशंका जताए। ‘नार्कभित्र अन्तरविरोध छ भन्ने बुझेको छु, तर बदल्न मैले पनि सकेको छैन। बदल्न सक्छु वा आफैं बदलिन्छु, भन्न सक्दिन’, उनको भनाइ थियो।
‘नार्कलाइ मानिता विश्वविद्यालय बनाएर प्रविधि र प्रचारलाइ किसानसामू लैजाऔं। केन्द्रलाई रिपोर्टिङ गर्नेगरी प्रत्येक प्रदेशमा एउटा केन्द्र बनाउँ। मातहतका निकाए प्रभावकारी तरिकाले कामै गर्दैनन् भने तिनलाई राखिराक्नु पर्दैन। ३६ वटा विभाग चाहिँदैन ९ वटा मात्र भए पुग्छ’, खनालले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
