काठमाडौं- त्रिभुवन अन्तर्राष्ट्रिय विमानस्थलमा २० भन्दा बढी फर्मले सम्झौता अवधि सकिएपनि व्यापार तथा व्यवसाय गर्दै आएको रहस्य खुलेको छ।
सम्झौता अवधि सकिएपछि पनि जिल्ला अदालत, उच्च अदालत तथा सर्वोच्च अदालतबाट 'स्टे अर्डर' लिँदै व्यापारव्यवसाय सञ्चालन गर्दै आएको विमानस्थल कार्यालयका प्रमुख राजकुमार क्षेत्रीले जानकारी दिए।
विमानस्थल भित्र सञ्चालनमा रहेका व्यापारिक फर्मको सम्झौता अवधि, भाडा र बक्यौताका विषयमा संघीय संसद्अन्तर्गत प्रतिनिधिसभाको लेखा समितिले गरेको छलफलमा क्षेत्रीले यस्तो अभिव्यक्ति दिएका हुन्।
एबिपि मार्ट प्रालिले अन्तर्राष्ट्रिय टर्मिनल भवनमा कफी सप सञ्चालनका लागि २०७२ भदौमा वार्षिक ३७ लाख ४० हजार रुपैयाँमा व्यवसाय गर्ने गरी विमानस्थल कार्यालयसँग सम्झौता गरेको थियो। सम्झौता अवधि ३ वर्षको भएपनि अहिले जिल्ला अदालत काठमाडौंबाट स्टे अडर लिँदै सो फर्मले व्यवसाय गरिरहेको छ।
यसैगरी सोनिग सर्भिस प्रालिले अन्तर्राष्ट्रिय टर्मिनल भवनकै भुईंतलामा ब्यागेज लेमिनेसनका लागि भन्दै विमानस्थल कार्यालयसँग २०६९ भदौमा ३ वर्षका लागि वार्षिक १ लाख ४६ हजार ६ सय ५२ रुपैयाँमा सम्झौता गरेको थियो। तर, सम्झौता अवधि सकिएपनि स्टेअर्डरकै भरमा व्यापारव्यवसाय सञ्चालन गर्दै आएको छ।
यसैगरी, कार्की मल्टिपल ट्रेड एन्ड सप्लायर्सको टि/कफी सप र गिफ्ट पसलले पनि स्टे अर्डरकै भरमा व्यापार व्यवसाय सञ्चालन गर्दै आएको छ।
यसैगरी, साइकिरण इन्टरप्राइजेज (पुस्तक पसल), क्रिएटिभ नेपाली प्रोडक्ड प्रालि, होटल र्याडिसन, विपासा इन्टरप्राइजेज, सोनिग सर्भिसकै गिफ्ट पसल, होटल सोनिग, क्लासिक मार्ट, विमानस्थल चिया कफी तथा मिठाई पसल, हिमालय मनी चेन्चर, मल्टी बिजनेश स्पोर्टस् सर्भिसले स्टे अर्डर लिँदै व्यवसाय सञ्चालन गर्दै आएका हुन्।
त्यस्तै, यति मनि एक्सचेन्ज प्रालि, हाइलाइटस् नेपाल, इस्ट एन्ड वेस्ट इन्टरनेसनल टुर्स एन्ड ट्राभल, हिमालय नेपाल मनी एक्सचेन्ज र होटल स्वगिन सर्भिसले स्टे अर्डर लिँदै व्यापार व्यवसाय सञ्चालन गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
