काठमाडौं- त्रिभुवन अन्तर्राष्ट्रिय विमानस्थल कार्यालयले असुली गर्नुपर्ने बक्यौता रकम मात्रै झन्डै साढे २ अर्ब पुगेको छ। विमानस्थलभित्र व्यापार व्यवसाय गर्दै आएका पसल, होटल तथा एयरलाइन्स कम्पनीको बक्यौता २०७५ पुस मसान्तसम्मा मात्रै २ अर्ब ४७ करोड ९३ लाख २७ हजार ७ सय ३९ रुपैयाँ पुगेको छ।
विमानस्थल कार्यालयका अनुसार सञ्चालनामा रहेको ३२ वटा अन्तर्राष्ट्रिय उडान गर्ने एयरलाइन्स कम्पनी, सञ्चालनमै रहेका १८ वटा आन्तरिक उडान भर्ने कम्पनी, सञ्चालनमा नरहेका आन्तरिकतर्फका १२ एयरलाइन्स कम्पनी, सञ्चालनमा नरहेको १८ अन्तर्राष्ट्रिय एयरलाइन्स कम्पनी, १९ सरकारी संस्था, ६८ विभिन्न कम्पनी र व्यापार व्यवसाय नै बन्द गरेको ३८ कम्पनीको बक्यौता बाँकी रहेको विमानस्थल कार्यालयले जनाकारी दिएको छ।
सञ्चालनमा रहेको एयरलाइन्स कम्पनीमध्ये सबैभन्दा बढी बक्यौता रकम राष्ट्रिय ध्वजाबाहक नेपाल एयरलाइन्स एडिएफसहित गरी ३४ करोडभन्दा बढी पुगेको छ। नेपाल एयरलाइन्सले अहिले किस्ताबन्दीमा बक्यौता चुक्ता गर्दै आएको छ।
यसैगरी दोस्रो धेरै सञ्चालनमा रहको एयरलाइन्समा मलेसियन एयरलाइन्स कम्पनी एयर एसिया (हाल उडान बन्द गरिसकेको) रहेको छ। एयर एसियाको बक्यौता मात्रै २० करोडभन्दा बढी पुगेको छ। यसबाहेक हिमालय एयरलाइन्सको १६ करोड रुपैयाँभन्दा बढी रहेको विमानस्थल कार्यालयका प्रमुख राजकुमार क्षेत्रीले जानकारी दिए।
बक्यौता रकमको विषयमा प्रतिनिधिसभाको लेखा समितिले गरेको छलफलको विषयमा क्षेत्रीले यसबारे जानकारी गराएका हुन्।
सञ्चालनमा रहेको एयरलाइन्स कम्पनीले ३ महिनाभित्र बक्यौता चुक्ता नगरे आफूहरु जहाज नै ग्राउन्डेड गर्ने गरी अगाडि बढेको सांसदहरुको जिज्ञासामा क्षेत्रीले बताए।
यसैगरी आन्तरिकतर्फ सबैभन्दा बढी बक्यौता भएको सौर्य एयरलाइन्सले अहिले एक करोड रुपैयाँ तिर्दै उडान सुचारु गरेको उनले जानकारी दिए। सौर्य एयरलाइन्सको बक्यौता मात्रै ४ करोड पुगेको थियो।
यसैगरी आन्तरिक उडानतर्फको सिम्रिक एयरलाइन्सले पनि विमानस्थल कार्यालयलाई १ करोड ९ लाख रुपैयाँ तिर्न बाँकी रहेको छ। सिम्रिकले किस्ताबन्दीमा रकम तिर्दै आएको छ।
आन्तरिकतर्फ सञ्चालनमा नरहेको १२ एयरलाइन्समध्ये सबैभन्दा बढी ४ करोड ६३ लाखभन्दा बढी र कस्मिक एयरलाइन्सको ३ करोड ३३ लाखभन्दा बढी बक्यौता रहेको छ। यो रकम असुलीका लागि पनि प्रक्रिया थालनी भएको क्षेत्रीले जानकारी दिए।
यसैगरी अन्तर्राष्ट्रिय उडानतर्फ सञ्चालनमा नरहेको एयरलाइन्स कम्पनीमध्ये सबैभन्दा गल्फ एयरको २ करोड २२ लाख १३ हजार रहेको क्षेत्रीले जानकारी दिए।
साथै सरकारी निकायमध्ये सबैभन्दा बढी बक्यौता रकम त्रिभुवन विमानस्थल भन्सार कार्यालयको रहेको छ। भन्सार कार्यालयको बक्यौता मात्रै ५४ करोडभन्दा बढी रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
