काठमाडाैं- ताप्लेजुङमा भएकाे हेलिकाेप्टर दुर्घटनामा दिवंगत भएका संस्कृति पर्यटन तथा नागरिक उड्डयनमन्त्री रवीन्द्र अधिकारीलाई राष्टपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपाी शर्मा ओली, प्रमुख प्रतिपक्ष नेपाली कांग्रेसका सभापति शेरबहादुर देउवा, सत्तारुढ नेकपा अध्यक्ष पुष्पकमल दाहाललगायत शिर्षस्थ नेताहरुले श्रद्धञ्जली व्यक्त गरेका छन्।
मन्त्री अधिकारीका परिवारजनमा समवेदन व्यक्त गर्दै विभिन्न राजनीतिक दलका नेताहरुले दिवंगत मन्त्री अधिकारी आशालाग्दा युवा नेता भएको बताएका छन्।
नेकपा नेता तथा रक्षामन्त्री ईश्वर पोखरेलले अधिकारीसँगको यात्रा अन्त्य भएको पत्याउन नसकेको उल्लेख गरेका छन्। पोखरेलले राजनीतिमा अत्यन्त उज्ज्वल संभावना बोकेका नेताका रुपमा अधिकारी रहेको स्मरण गरेका छन्। उनले पिडा र आँशुसँगै श्रद्धान्जली व्यक्त गरेकाे जनाएका छन्।
परराष्ट्रमन्त्री प्रदीप ज्ञवालीले श्रद्धाञ्जलीका शब्दहरु लेख्नु पर्दा हात नै काँपिरहेको अभिव्यकति दिए। अल्पायुमा मृत्यु होला भनि कसैले नसोचेको उल्लेख गर्दै ज्ञवालीले लेखेका छन्- 'हाम्रो सम्झनाको क्यानभासमा तपाईँ सधैभरि बाँचिरहनु हुनेछ। यस दु:खद दुर्घटनामा परी दिवंगत हुनुहुने सबैमा श्रध्दासुमन।'
बुधबार ४ः३० मा अधिकारीसँग भेट्ने समय निश्चित गरेका नेकपा नेता योगेश भट्टराईले निशब्द भएको बताएका छन्। ट्विटमार्फत भट्टराईले मृत्युलाई स्विकार गर्न नसकेको जनाउँदै ‘तिम्रै आवाजले एकपटक बताइदेउन यार’ भनि आग्रह गरेका छन्।
कांग्रेस प्रवक्ता विश्वप्रकाश शर्माले दिवंगत अधिकारीसँगको विगतको लामो सहकार्य र विद्यार्थी आन्दोलन स्मरण गरेका छन्। ‘रवीन्द्र अधिकारी कुनैबेला अनेरास्ववियुको अध्यक्ष छँदा म नेपाल विद्यार्थी संघको सभापति थिएँ। दरबार हत्याकाण्ड लगत्तै नेपालको विद्यार्थी आन्दोलनलाई सानातिना विमतिबाट माथि उठाएर लोकतन्त्रका सवालमा एकता निर्माणमा अनेरास्ववियुका अध्यक्ष मित्र राजेन्द्र राई र मसँगै रवीन्द्रजीको सकृय भूमिका स्मरण गरिरहेको छु’, उनले सामाजिक सञ्जालमा लेखेका छन्।
शर्माले अधिकारीलाई राजनैतिक रूपमा आदरणीय व्यक्ति भएको स्मरण गरेका छन्। व्यक्तिगत रूपमा अधिकारीसँग एकै परिवारको सदस्यझैँ भएको उल्लेख गरेका छन्।
अधिकारीको मृत्युप्रति समवेदना व्यक्त गर्दै कांग्रेस युवा नेता गगन थापाले असल साथी गुमाएको बताएका छन्। थापाले ट्विटमा ‘मैले आज एक असल साथी गुमाएको छु, देशले एक आशातीत नेता’ उल्लेख गरेका छन्।
कांग्रेसका अर्का नेता डा रामशरण महतले घटनाले भावुक बनेको उल्लेख गरेका छन्।
कांग्रेस सहमहामन्त्री डा प्रकाशरण महतले अधिकारीको निधनप्रति दुःख गर्दै दिवंगत आत्माको चिरशान्तिको कामना गरेका छन्।
विवेकशील साझा पार्टीका संयोजक रवीन्द्र अधिकारीले ज्यान गुमाउनेप्रति समवेदना व्यक्त गर्दै ‘कसको मृत्यु कहाँ, कसरी लेखिएको हुन्छ, कसलाई के थाहा’ ट्विटमा लेखेका छन्।
दुर्घटनाप्रति शाेक व्यक्त गर्दै राजनीतिक दलका नेताका अलावा संघीय संसद, प्रदेशसभा, प्रदेश सरकार तथा विभिन्न संघसंस्था तथा व्यक्तिहरुले श्रद्धाञ्जली दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
