काठमाडौ– नेपाल कम्युनिस्ट पार्टीका अध्यक्ष पुष्पकमल दाहल ‘प्रचण्ड’ ले उत्तरी छिमेकी देश चीनले अघि सारेको ‘बेल्ट एन्ड रोड इनिसिएटिभ–बिआरआई’मार्फत् नेपालले फाइदा लिन सक्ने बताएका छन्। विश्वकै शान्ति, विकास र स्थिरताका लागि चिनियाँ राष्ट्रपति सि चिनिफिङको दूरगामी रणनीति बिआरआई अघि आएको अध्यक्ष प्रचण्डले बताए।
काठमाडौँमा आयोजित एक कार्यक्रममा बोल्दै नेकपाका अध्यक्ष प्रचण्डले दोस्रो पटक आफू प्रधानमन्त्री हुँदा नेपालले बिआरआईमा सदस्य राष्ट्रको हैसियतमा सहभागी हुने निर्णय गरेको बताए। ‘छिमेकी देशले सुरू गर्न थालेको महत्वाकांक्षी योजनामा नेपाल सहभागी हुनुपर्ने मान्यताका आधारमा नै तत्कालीन सरकारले बिआरआईमा सहभागी हुने निर्णय गरेको थियो।’
नेपालले गएको दशक राजनीतिको उचारचडाव निकै देखेको बताउँदै अध्यक्ष प्रचण्डले नेपालले विश्वलाई नै उत्प्रेरणा दिने किसिमको शान्ति प्रक्रिया आफ्नै पहलमा सम्पन्न गरेको बताए। नेपालले शान्ति प्रक्रियाको ज्यादै संदेशनशील र महत्वपूर्ण प्रक्रिया पूरा गरेको दाबी गर्दै उनले नेपालले शान्ति प्रक्रियालाई पूर्ण रूपमा टुङ्ग्याउने क्रममा रहेको पनि दाबी गरे।
‘राजनीतिक स्थिरता र स्थायी सरकार निर्माणसँग नेपाल अब आर्थिक विकासको क्रममा रहेको छ,’ प्रचण्डले भने, ‘दीर्घकालीन शान्तिका लागि पनि उच्चस्तरको आर्थिक विकास आवश्यक पर्छ।’
विकसित विश्व राजनीतिक परिदृश्यसँगै चीनले अघि सारेको बिआरआईबाट नेपालले फाइदा लिन सक्ने बुझाइसँगै नेपालले उक्त योजनामा सहभागी हुने सम्झौता गरेको अध्यक्ष प्रचण्डको बताए। आर्थिक विकासका लागि पनि कनेक्टिभिटी आवश्यक रहेको बताउँदै प्रचण्डले बिआरआईले नेपालले उक्त अवसर दिने पनि विश्वास व्यक्त गरेका छन्।
नेपालको तीन दिने औपचारिक भ्रमणमा रहेको अमेरिकी रक्षा राज्यमन्त्री जो फेल्टरले नेपालले चिनियाँ नेतृत्वको बिआरआई परियोजनामा सहभागी हुनुपूर्व सचेत हुनुपर्ने बताएको भोलीपल्ट नेकपाका अध्यक्ष प्रचण्डले चिनियाँ राष्ट्रपति चिनिफिङले अघि सारेको परियोजनाले नेपाललाई दीर्घकालीन फाइदा पुग्ने बताएका हुन्।
अमेरिकी रक्षाराज्यमन्त्री फेल्टरले बिआरआई नेपालको हितमा हुनुपर्ने बताउँदै चिनियाँ सर्त अनुसार नेपालअघि बढ्न नहुने बताएका थिए। अमेरिकी योजना अन्र्तगत आएको इन्डो प्यासफिक रणनीतिमा सहभागी हुँदा नेपाललाई फाइदा पुग्ने बताउँदै उनले चिनियाँ परियोजना अन्र्तगत ऋण स्वीकार्नु पूर्व छिमेकी देश श्रीलंका, माल्दिभ्समा के भएको छ त्यो हेर्न नेपाललाई सुझाव दिएका थिए।
नेपालले चिनियाँ राष्ट्रपति चिनफिङको महत्वाकांक्षी योजना बिआरआईमा सन् २०१७ मा सदस्यका रुपमा सहभागी हुने सम्झौता गरेको थियो। राष्ट्रपति विद्यादेवी भण्डारी यही अप्रिल २५–२८ गतेसम्म चीनमा आयोजना हुने दोस्रो बिआरआई सम्मेलनमा सहभागी हुन चीन जाने कार्यक्रम छ।
बिआरआई अन्र्तगत नेपालले ९ परियोजना संञ्चालन गर्ने योजना राखेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
