काठमाडौं - गृहमन्त्री सुदन गुरुङले भ्रष्टाचार, शक्तिको दुरुपयोग र पक्षपातमा संलग्न प्रहरीलाई संरक्षण नगरिने स्पष्ट पारेका छन् । उनले प्रहरीको सेवा–सुविधा वृद्धि, जनशक्ति थप तथा आधुनिक प्रविधि र पूर्वाधार विकास सरकारको प्राथमिकतामा रहेको बताए ।
नेपाल प्रहरीको ७१औँ प्रहरी दिवसका अवसरमा प्रहरी प्रधान कार्यालय नक्सालमा आयोजित समारोहलाई सम्बोधन गर्दै उनले प्रहरीलाई व्यावसायिक, जिम्मेवार र नागरिकमैत्री बनाउनुपर्नेमा जोड दिए ।
गृहमन्त्री गुरुङले उजुरी तथा जाहेरी दर्तादेखि अनुसन्धानसम्म नागरिकलाई केन्द्रमा राखेर काम गर्न निर्देशन दिए । प्रहरीको बोलीचाली, आचरण र व्यवहार नागरिकमैत्री हुनुपर्ने उल्लेख गर्दै उनले निष्पक्ष अनुसन्धानबाट मात्रै नागरिकको विश्वास जित्न सकिने बताए ।
“प्रहरीको वर्दी डर र त्रासको होइन, आशा, भरोसा र नागरिक–प्रहरी सहकार्यको प्रतीक बन्नुपर्छ,” उनले भने ।
उनले हालैको विपद्मा उद्धारमा खटिएका सुरक्षाकर्मीका लागि जोखिम भत्ता तथा खाजा खर्चको व्यवस्था गरिएको जानकारी दिए । प्रहरीको दरबन्दी थप गर्न प्रस्ताव गरिएको उल्लेख गर्दै उनले सेवा–सुविधा, पूर्वाधार र प्रविधि विकासमा सरकारले प्राथमिकता दिएको बताए ।
गुरुङले एआई, डिजिटल फरेन्सिक, साइबर अपराध, वित्तीय अपराध अनुसन्धान तथा डीएनए फरेन्सिकजस्ता क्षेत्रमा प्रहरीको दक्षता बढाउनुपर्ने बताए । साथै, भिड नियन्त्रण र बल प्रयोग गर्दा आवश्यकता, अनुपातिकता तथा जवाफदेहिताको सिद्धान्त पालना गर्न निर्देशन दिए ।
राज्यका संवेदनशील सूचना चुहाउने कार्यमा संलग्नलाई उन्मुक्ति नदिइने स्पष्ट पार्दै उनले प्रहरी संगठनभित्र अनुशासन र व्यावसायिक आचरण कायम राख्नुपर्नेमा जोड दिए ।
“सही कार्यका लागि सरकार तपाईंहरूको साथमा छ, तर गलत कार्यको संरक्षण हुने छैन,” उनले भने ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
