डडेल्धुरा– नयाँ शक्ति नेपालका संयोजक एवम् पूर्वप्रधानमन्त्री डा. बाबुराम भट्टराईले राजनीतिलाई भ्रष्टाचार मुक्त बनाउनु पर्ने बताएका छन्।
पार्टीको जनसंवाद यात्राका क्रममा मंगलबार डडेल्धुरा सदरमुकाममा आयोजना गरिएको एक कार्यक्रममा बोल्दै डाक्टर भट्टराईले विकास र समृद्धिको बाटोमा देशलाई अगाडि बढाउनका लागि राजनीति भ्रष्टाचार मुक्त बनाउनु पर्ने बताएका हुन्।
उनले भने, ‘अब हामीले विकास र समृद्धिको बाटोमा जाने हो भने राजनीतिलाई भ्रष्टाचार मुक्त नगरिकन हुँदैन।’
नेपाली कांग्रेस, तत्कालीन एमाले, एमाओवादीले त्याग र बलिदान गरेर संघीय लोकातान्त्रिक गणतन्त्र ल्याएको उल्लेख गर्दै भट्टराईले नेताहरूले विगत बिर्सेर भ्रष्टाचारमा लिप्त भइरहेको आरोप लगाए।
‘हामी सबै पार्टीका साथीहरू क्रान्तिकारी हौँ, सबै साथी जेल बस्नु भएको हो। धेरैले सहादत प्राप्त गरे। तर, सत्तामा पुगेपछि हाम्रो इतिहासको रेकर्ड राम्रो छैन, नेपाली कांग्रेस २०४६/४७, तत्कालीन एमाले २०५४/५५ र २०५६ पछि सत्तामा गयो र तत्कालीन माओवादी २०६३/६४ मा सत्तामा गयो। अहिले दुई तिहाइको सरकार बनेको छ। तर सत्तामा पुगेपछि भ्रष्टाचार भयो,’ उनले भने, ‘सत्तामा पुगेपछि सबैले आफ्नो आदर्शलाई बिर्सेका छन्, जसरी गुलियोमा डुबेको झिँगा जसरी उड्न सिक्दैन, त्यसरी सत्ताको चासनीमा क्रान्तीकारी साथीहरू डुबेको हामीले देखेका छौँ।’
वाइडबडी, बुढीगण्डकी, एनसेल, ३३ किलो सुन प्रकरणमा हाकाहाकी रुपमा भ्रष्टाचार भएको उनको आरोप छ। जनताले तिरेको करको पैसामा ठूला ठूला भष्टाचार हुने हो भने देश समृद्ध बन्न नसक्ने उनको भनाइ थियो।
‘हिजोका क्रान्तिकारी भनिने कम्युनिस्ट र कांग्रेस लोकतन्त्रवादी भनिने साथीहरूले समेत पन्चायत र राणाकालको जस्तै भ्रष्टाचाराका काण्ड गरे। अझ त्यतिबेला अपार्दशिता हुन्थ्या। तर, आजभोपलि जनताले हाकाकाकी थाहा हुने गरेर भ्रष्टाचार गरे।’
उनले थपे, ‘चाहे वाइडबडी काण्ड भन्नुस चाहे बुढीगण्डकी प्रकरण भन्नुस् अथवा एनसेल प्रकरण वा ३३ किलो सुन काण्ड यी त बाहिर आएका कुरा हुन् भित्री कुरा त कति छ कति! यसरी देशको निम्ति उठाएको राजश्वको रक्षा गर्ने जिम्मेवारी पाएका व्यक्तिले नै मिलाएर खाए।’
भष्टाचार नियन्त्रण गर्ने संस्थाहरू कमजोर
संयोजक भट्टराईले भ्रष्टाचार नियन्त्रण गर्ने, नियम कानून लागू गर्ने, दण्डित गर्ने संस्थाहरू कमजोर भएको बताए।
अख्तियार दुरुपयोग अनुसन्धान आयोगमा पार्टीका मान्छे भर्ति गर्दा भ्रष्टाचार बढेको उनको बुभाइ छ। पार्टीका मान्छेले भागबण्डा गरेर संवैधानिक समिति माफर्त भने पनि अन्ततः आयुक्त नियुक्त हुने गरेको उनले ठोकुवा गरे।
‘हाम्रा अनुसन्धान गर्ने संस्था कमजोर भए। आयोगमा पार्टीका मान्छेहरूले भागबन्डा गरेर आयुक्तहरू नियुक्त गर्छन्, पार्टीकै मान्छे नियुक्त भएपछि तिनले कसरी भ्रष्टाचार नियन्त्रण गर्लान?’ उनले प्रश्न गरे।
उनले अख्तियार दुरुपयोग अनुसन्धान आयोग काम नलाग्ने भइसकेकाले देशमा अब सशक्त जनलोकपाल आवश्यकता भएको बताए।
सुदूरपश्चिम प्रदेशको नाम उपयुक्त भएन
संयोजक भट्टराईले सुदूरपश्चिम प्रदेशको नाम उपयुक्त नराखिएको तर्क गरे। ‘काठमाडौंबाट पो सुदूरपश्चिम, यताबाट त सुदूर छैन होला नि?’ उनले प्रश्न गरे, ‘प्रदेशको आफ्नै पहिचान होला त! त्यसबाट नाम राख्न सकिन्थ्यो नि!’
उनले कांग्रेस सभापति शेरबहादुर देउवालाई लक्षित गर्दै भने ‘यहाँका नेताले नाम सुदूरपश्चिम राखे, हुदाँ–हुँदा राजधानी पनि तराई तोके।’
पहाडाबाट राजधानी कैलाली सारिनु यहाँका नागरिकलाई ठूलै धोका भएको समेत बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
