काठमाडौं- अर्थमन्त्री डा युवराज खतिवडाले बैंकर र उद्योगीलाई मिलेर जान सुझाव दिएका छन्।
बढ्दो बैंकको ब्याजदरका विषयमा सोमबार दिउँसो अर्थ मन्त्रालयमा बैंकर र उद्योगी बीच भएको छलफलमा अर्थमन्त्री खतिवडाले यस्तो सुझाव दिएका हुन्।
बैंकर र उद्योगीलाई अर्थमन्त्री खतिवडाले आफ्नै कार्यकक्षमा बोलाएर दुईपक्षीय छलफलबाट व्यवसायिकतालाई केन्द्रमा राखेर अघि बढ्न सुझाव दिएका थिए।
यसअघि शनिबार बढ्दो बैंकिङ ब्याजदरको विषयमा प्रधानमन्त्री केपी शर्माओलीले अर्थमन्त्री खतिवडासहित उद्योगी, नेपाल राष्ट्र बैंकका गभर्नरसँग छलफल गरेका थिए। छलफलमा प्रधानमन्त्रीले अर्थमन्त्री खतिवडा र गभर्नरलाई बैंकको ब्याजदर घटाउन सकिने विकल्प खोजी गर्न निर्देशन दिएका थिए।
अर्थ मन्त्रालयका सोमबार भएको छलफलमा भने बैंकर र उद्योगीबीच आरोप-प्रत्यारोप समेत चलेको थियो। आरोप प्रत्यारोपमा एकले अर्कोको पोल खोल्ने काम समेत भएको थियो।
छलफलमा अर्थमन्त्री, अर्थसचिव, गभर्नर, डेपुटी गभर्नर, बीमा समितिका अध्यक्ष चिरञ्जीबी चापागाईं, धितोपत्र बोर्डका अध्यक्ष रेवतबहादुर कार्कीलगायत उपस्थित रहेको थियो।
छलफलकै क्रममा अर्थमन्त्री खतिवडाले ब्याजदरका विषयमा गम्भीर हुन बैंकरलाई निर्देशन दिनुका साथै समस्या समाधान नगरे हस्तक्षेप गर्ने समेत बताएका थिए। साथै केही समस्या मौद्रिक नीतिले समेत समाधान गर्ने र त्यसले पनि समाधान नभएको विषयवस्तुमा फेरि छलफल गर्ने गरी बैठक सकिएको अर्थ मन्त्रालयले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
