काठमाडौं– प्रधानमन्त्री केपी शर्मा ओलीले राष्ट्रिय प्रहरी प्रशिक्षण केन्द्र (प्रहरी एकेडेमी) लाई काभ्रेको पनौती सारिने बताएका छन्। मंगलबार राष्ट्रिय प्रहरी प्रशिक्षण केन्द्र महाराजगन्जमा प्रहरी निरीक्षकको १७८औं ब्याचको आधारभूत तालिमको दीक्षान्त समारोहमा बोल्दै प्रधानमन्त्री ओलीले सो कुरा बताएका हुन्।
नेपाल प्रहरीलाई आधुनिक, सक्षम र कुनै पनि देशको प्रहरीसँग प्रतिस्पर्धा गर्न सक्ने खालको बनाउने बताउँदै त्यसका लागि चाहिने भौतिक, प्राविधिक, सुविधासहितको तालिम केन्द्र उपलब्ध गराउन सरकारले काम सुरु गरिसकेको उनले बताए। त्यसैअनुरुप प्रहरी एकेडेमीलाई काभ्रेको पनौती सार्ने तयारी भएको पनि प्रधानमन्त्री ओलीको भनाइ थियो।
‘प्रहरी एकेडेमीलाई धेरै वर्ष अघिदेखि यो ठाउँ साघुँरो भयो भन्ने वास्तविक आवाज थियो। यो पर्याप्त भएन भनेर यहाँबाट पनौती सार्ने भनेर त्यहाँ जमिन पनि खरिद गरिएको थियो। त्यो १०औं वर्षअघिको कुरामा भारतले एकेडेमी बनाउने कुरा पनि थियो,’ प्रधानमन्त्री ओलीले भने, ‘पहिल्यै भएको सम्झौतालाई अहिलेको सरकारले त्यस फराकिलो ठाउँमा (जहाँ दौड, पिटीपरडेदेखि चाँदमारी सम्मका धेरै कुरा एकै पटक गर्न सक्न सकिन्छ) स्थानान्तरणको तयारी सुरु गरेको छ।'
एकेडेमी सार्ने कुरालाई हल्ला गर्न रुचाउने र आफूलाई खुब सेलिब्रिटी देखाउनेहरुले अनुचित खालका टिप्पणीहरु गरेको ओलीको भनाइ थियो।
‘केहीले राष्ट्रपतिज्यूले यहाँबाट लखेट्न खोजे भनेर पनि कुरा काटे। छिमेकी पिरेको भन्नेसम्मका शब्द पनि प्रयोग गरे,’ प्रधानमन्त्री ओलीले भने, ‘कतिपय पूर्वप्रहरीहरु त्यसबेला एकेडेमी सार्न सहमत हुने तर अहिले आएर यो ठिक भएन भन्ने वक्तव्यबाजी र टिप्पणी गर्ने कुरा पनि सुनिए। सरकार यस्तो कुरासँग होइन देश र जनताका लागि जे गर्नुपर्नै हो त्यो कुरामा दृढ छ।’
कार्यक्रममा १९ महिनाको लामो आधारभूत तालिमपश्चात् १७८ ब्याचका ९५ जना प्रहरी निरीक्षक दीक्षित भएका थिए। आधारभूत तालिम सकेर कार्यक्षेत्रमा खटिन लागेका प्रहरी निरीक्षकहरुलाई प्रधानमन्त्री ओलीले बधाई दिँदै भने, ‘नेपाल प्रहरीलाई अझ सफल र सबल बनाउन योगदान पुर्याउने कुरामा विश्वास लिएको छु।’
प्रहरीको बहुआयामिक भूमिकाबारे चर्चा गर्दै प्रधानमन्त्री ओलीले भने, ‘जनतालाई न्याय दिन पनि प्रहरी चाहिन्छ। न्यायको प्रारम्भ नै प्रहरीबाट हुन्छ। अख्तियारले पनि प्रहरीको मद्दतबिना काम गर्न सक्दैन। शान्ति सुव्यवस्था, सुशासन र हरेक कुरालाई व्यवस्थित गर्न प्रहरीको आवश्यकता हुन्छ। चाहे विद्यालयको परीक्षा होस्, चाहे सांस्कृतिक पर्व र मेला हुन्, चाहे अन्तराष्ट्रिय क्षेत्रमा गएर पुर्याउने सेवा होस्। प्रहरीको कर्तव्य असाधारण, असीमित र बहुआयामिक छ।'
उक्त जिम्मेवारी बहन गर्न सक्ने बनाउनकै लागि १९ महिना लामो तालिम दिइएको प्रधानमन्त्रीले ओलीले बताए। ‘तपाईंहरुले लिएको तालिम काम गर्नका लागि हो। खेलमा अभ्यास किन गरिन्छ? म्याचमा जानका लागि। वर्षभरि किन पढिन्छ? परीक्षा दिएर उत्तीर्ण हुनका लागि। तपाईहरुले तालिम किन लिनुभएको छ? कार्यक्षेत्रमा गएर काम गर्नका लागि। त्यो तालिम अब व्यवहारमा उतार्नुपर्छ।’
प्रहरी संगठन दलाली गर्नका लागि होइन
कार्यक्रममा बोल्दै प्रधानमन्त्री ओलीले प्रहरीलाई एउटा सुझाव दिन चाहेको बताए। कार्यक्रमको अन्त्यतिर उनले भने, 'तपाईंहरुलाई एउटा सुझाव छ। संगठनमा अनुशासन एउटा कुरा हो। अनुशासनमा मातहतका लाई पनि राख्नुस्, आफू पनि बस्नुस्। अनुशासनका नाममा मातहतकालाई नदबाउनुस्, माथिकाको दलाली नगर्नुस्। प्रहरी संगठन दलाली गर्नका लागि होइन। स्वाभिमानपूर्वक कर्तव्य पूरा गरेर सेवा गर्नका लागि हो।’
त्यस्तै प्रहरीमा हुने बढुवा चलखेलबारे ओलीले भने, ‘अब तपाईंहरुले प्रमोशन हुनका लागि कसैलाई रिझाउनु पर्दैन। कसैकहाँ धाउनु पर्दैन। यस अवसरमा म प्रहरी संगठनका जिम्मेवार पदाधिकारीलाई भन्न चाहान्छु- कार्यसम्पादन मूल्यांकन अथवा प्रमोशनका लागि न्यायोचित प्रणली स्थापन गर्नुस्। कुनै प्रहरीले भेदभावको सिकार भए भन्ने कुरा अब उप्रान्त हुनु हुँदैन।’
अर्को प्रसंगमा बोल्दै प्रधानमन्त्री ओलीले अब अपराधको राजनीतिकरण मान्य नहुने बताए। 'बम पड्काउने मान्छे मार्ने, अपराध गर्ने, चन्दाका नाममा लुटपाट मच्चाउने, त्रासको वातावरण सिर्जना गर्ने, आतंककारी क्रियाकलापलाई राजनीतिको खोल ओडाएर उम्किने कुरा हुन सक्दैन,' उनले भने, 'राजनीतिकको अपराधीकरण र अपराधको राजनीतिकरण यी दुवै मान्य हुँदैन।’
धमिलो पानीमा माछा मार्ने क्रम अझै जारी
उक्त कार्यक्रममा बोल्दै गृहमन्त्री रामबहादुर थापा बादलले राजनीतिको नाममा धमिलो पानीमा माछा मार्ने काम अझै जारी भएको बताएका छन्।
सोही कार्यक्रममा उनले भने, ‘संविधान विरोधी गतिविधि अझै हुने गरेका छन्। लोकतन्त्रमा विरोधको मर्यादित शैली र तरिका हुन्छ। त्यसमा सरकारको आपत्ति रहन्न। परन्तु देशलाई विखण्डनतर्फ लैजाने वा संविधानको मर्म विपरित परिचालीत समूहका गतिविधि भने सह्य हुँदैन।’
सुरक्षा निकायहरुलाई यसतर्फ अत्यन्त चनाखो हुन पनि गृहमन्त्री थापाले निर्देशन दिएका थिए। ‘राजनीति विचारधाराको खेल हो। तपाईंलाई असमर्थ हुने अधिकार छ। तर अराजक हुन भने पाइँदैन,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
