काठमाडौं- निजगढ अन्तर्राष्ट्रिय विमानस्थल निर्माणका लागि सरकारले कतारसँग जिटुजी (सरकारी स्तरमा) प्रक्रिया अगाडि बढाएको छ। कतारले विमानस्थल निर्माणमा चासो देखाएसँगै सरकारले पनि आफ्नो प्रस्ताव कतारसमक्ष पेस गरेको छ।
‘विमानस्थल निमार्णका लागि दुई देशबीचको प्रस्ताव आदानप्रदान भएको छ,' संस्कृति, पर्यटन तथा नागरिक उड्डयनमन्त्री रवीन्द्र अधिकारीले भने, ‘अहिले प्रस्तावको मस्यौदामा छलफल सुरु भएको छ।’ बुट मोडलमा विमानस्थल निर्माण गर्नेगरी सरकारले कतारको प्रस्तावको स्वागत गर्दै आफ्नो प्रस्ताव पठाएको मन्त्री अधिकारीले बताए।
‘प्रस्तावको विषयमा प्राविधिक रुपमा छलफल सुरु भइसकेको छ,' मन्त्री अधिकारीले भने, ‘दुई पक्षीय प्रस्तावमा उल्लेख भएको विषय मिलेसँगै सरकारले कतारसँग विमानस्थल निर्माणका लागि जिटुजी गर्नेछ।’ तर, अहिले नै सबै कुरा फाइनल भने भइनसकेको मन्त्री अधिकारीको भनाइ छ।
कतारले केही सयमअगाडि विमानस्थल निर्माणमा चासो देखाउँदै दूतावासमार्फत प्रस्ताव पेस गरेको थियो। कतारको प्रस्ताव आएपछि मन्त्रालयले पनि विमानस्थल निर्माणको विषयमा आफ्नो धारणसहित दूतावास मार्फत नै पठाएको मन्त्री अधिकारीले जानकारी दिए।
कतारले कम्तीमा ३० वर्षको लागि निजगढ विमानस्थल निर्माण र सञ्चालन गर्ने गरी काम गर्ने प्रस्ताव माग गरेको थियो।
कतारले विमानस्थल निर्माणमा चासो देखापछि प्रधानमन्त्री केपी शर्मा ओली, अर्थमन्त्री युवराज खतिवडा र पर्यटनमन्त्री अधिकारीबीच पनि छलफल भइसकेको छ।
मन्त्रालका अनुसार प्रस्तावित निजगढ अन्तर्राष्ट्रिय विमानस्थल सरकारले कतारलाई सार्वजनिक निजी साझेदारी (पिपिपी) मोडेलमा दिनेगरी छलफल गरेको हो। गत भदौमा अर्थ मन्त्रालयले पनि विमानस्थल निर्माणका लागि पिपिपी मोडेल उपयुक्त हुनेगरी सुझाव दिएको थियो।
विमानस्थल निर्माणका लागि आवश्यक वातावरणीय प्रभाव मूल्यांकन (इआइए) प्रतिवेदनसमेत पास भइसकेको छ। साथै अहिले विमानस्थल निर्माण स्थलमा रहेको रुख कटानी आदेशको फाइल वन तथा वातावरण मन्त्रालयमा छलफलकै क्रममा छ। साथै विमानस्थल निर्माणका लागि आयोजना कार्यालयले मास्टर प्लान समेत निर्माण गर्ने गरी प्रक्रिया अगाडि बढाएको छ।
मन्त्रालयले पनि कोरियाली कम्पनी ल्यान्डमार्क वल्डवाइड (एलएमडब्लु) ले तयार पारेको प्रतिवेदको स्वामित्व ग्रहण गर्दे काम अगाडि बढाइरहेको छ। सरकारले पनि यो विमानस्थल ३ हजार ६ सय मिटर लामो र ४५ मिटर फराकिलो तथा दोहोरो धावन मार्गसहित निर्माण गर्न लागेको छ। विमानस्थल निर्माणपछि विश्व बजारमा उत्पादन भएका सबैजसो अत्याधुनिक वाइडबडी जहाजहरु उडान/अवतरण गर्न सक्नेगरी विमानस्थल निर्माण गर्ने सरकारको लक्ष्य छ।
निर्माण सम्पन्न भएपछि वार्षिक ६ करोड यात्रु धान्न सक्ने उक्त विमानस्थल टर्मिनल भवनमा ६ बोर्डिङ गेट, ३४ चेक इन काउन्टर, ६ सुरक्षा जाँच, ३५ अध्यागमन, ८ भन्सार जाँच काउन्टर रहनेछ।
किन आवश्यक छ निजगढ?
नेपाल नागरिक उड्डयन प्राधिकरणले निजगढ अन्तर्राष्ट्रिय विमानस्थल नै नेपालको आर्थिक समृद्धिका लागि गेम चेन्जर प्रोजेक्ट हुने बताउँदै आएको छ।
त्यसका पनि सरकारले त्रिभुवन अन्तर्राष्ट्रिय विमानस्थलको क्षमता अधिकतम विन्दुमा पुगिसकेको अवस्थाका कारण पनि निजगढ विमानस्थल अत्यावश्यक रहेको ठहर गरेको छ।
त्यसमा पनि हाल सञ्चालनमा रहेको त्रिभुवन अन्तर्राष्ट्रिय विमानस्थल र भैरहवामा निर्माण भइरहेको गौतम बुद्ध अन्तर्राष्ट्रिय विमानस्थलका पनि केही सीमितताका कारण फुल फेजमा सञ्चालन हुने नसक्ने हुँदा निजगढ अन्तर्राष्ट्रिय विमानस्थल अति नै आवश्यक रहेको सरकारको ठहर छ।
निजगढ अन्तर्राष्ट्रिय विमानस्थल मात्रै आइकाओको '४ एफ' फुल फेजमा निर्माण गर्न सकिने र ट्रान्जिट हबको रुपमा विकास गर्ने सकिने प्राधिकरणको ठहर छ।
नेपाल नागरिक उड्डयन प्राधिकरण राष्ट्रिय गौरवको आयोजनाले तयार पारेको विमानस्थल सम्बन्धित एक रिपोर्टको पूर्णपाठ
यो पनि : निजगढ अन्तर्राष्ट्रिय विमानस्थल निर्माणमा कतारको चासो, ३० वर्षसम्म सञ्चालनकाे प्रस्ताव
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
