सुडानमा हतियारधारी समूहद्वारा ४२ गोठालाको हत्या, ७८ घाइते

नेपाल लाइभ | २०७५ पौष २६ बिहीबार | Thursday, January 10, 2019 ०६:५९:०० मा प्रकाशित

जुबा– हतियारधारी व्यक्तिहरूको समूहले आक्रमण गरेर सुडानमा कम्तीमा ४२ जनाको हत्या गरेका छन्।

सुडानको बेह राज्यमा पर्ने डुचान र कोलाबिल क्षेत्रमा हतियारधारी समूहले पशुचौपायाका गोठालाहरूको हत्या गरेको हो।

उनीहरूको आक्रमणमा परी अन्य ७८ जना गोठाला घाइते भएका पनि अधिकारीहरूले बुधबार जानकारी दिएका छन्।

अकोबो राज्यका गभर्नर जोहनसन गुनी बिलुका अनुसार गत आइतबार यो घटना भएको हो।

‘मुर्ले आदीवासी समूहले गरेको अमानवीय व्यवहारप्रति हामीलाई पश्चाताप छ, यो घटना एकदमै अमानवीय र स्थानीय बासिन्दालाई आक्रान्त पार्ने खालको छ,’ बिलुले भने।

उनले हतियारधारी समूहको आक्रमणमा परी मारिनेमा अधिकांश महिला र बालबालिका रहेको जानकारी दिए।

घाइतेहरूको अवस्था स्थिर रहेको र सयभन्दा बढी पशु चौपाया चोरी भएको अधिकारीहरूले जनाएका छन्।

घटना भएको क्षेत्र दशकौँदेखि साम्प्रदायिक तथा जातीय हिंसाबाट प्रभावित हुँदै आएको छ। त्यस क्षेत्रमा बालयौन दुव्र्यवहारलगायतका अन्य हिंसा पनि हुने गरेको छ। रासस/सिन्ह्वा