काठमाडौं- सरकारले गत कात्तिक महिनामा सरकारीस्तरमा श्रम सम्झौता गरेको मलेसियाको रोजगारी ८ महिनादेखि बन्द छ। नेपाल सरकारले नै मलेसियाको रोजगारी रोकेको बताइए पनि मलेसिया सरकारले नै नेपाली कामदार लिन रोक लगाएको हो।
मलेसिया सरकारले प्रष्ट कानुन बनाएर मात्र विदेशी कामदार लिने योजना अघि सारेको छ। जसकारण गत मंसिर पहिलो सातादेखि नेपाल र बंगलादेशबाट रोजगारीका लागि नयाँ श्रम स्वीकृति लिएर जाने कामदारलाई रोक लगाइएको हो।
विदेशी कामदार लिने सम्बन्धमा नीति तय गर्न मलेसिया सरकारले गठन गरेको कार्यदलले प्रारम्भिक प्रतिवेदन बुझाइसकेको छ। उक्त प्रतिवेदनमाथि अहिले छलफल चलिरहेको छ। सो कुरा पुष्टि गर्दै मानव संसाधन राज्यमन्त्री महफुज ओमारले एक कार्यक्रममा भने, 'कार्यदलले बुझाएको प्रारम्भिक प्रतिवेदनमाथि छलफल जारी छ। रोजगारीका लागि विदेशी कामदार लिन अझै दुई महिना लाग्ने छ।' मलेसियाको अनलाइर्न 'द सन डेल्ली’ले समाचार लेखेको छ।
सो समाचार संस्थाका अनुसार कार्यदलले विदेशी कामदार लिने (विशेषगरी नेपाली) पूर्ण प्रतिवेदन दुई महिनाभित्रमा सरकारलाई बुझाउने राज्यमन्त्री ओमारले बताए। त्यसपछि मात्र विदेशी कामदार ल्याउने प्रक्रिया थालनी हुने बताइएको छ। मलेसिया सरकारले अहिले नेपाल र बंगलादेशबाट कामदार लिन बन्द गरेको छ।
विदेशी कामदारका सम्बन्धमा लिइने सबै नीति सोही कार्यदलको सुझावअनुसार तय गरिने र त्यसपछि धेरैजसो समस्या समाधान हुने विश्वास राज्यमन्त्री ओमारले व्यक्त गरे। विदेशी कामदार लिने विषयमा आधिकारिक निर्णय आउन अझ दुई महिना कुर्नुपर्ने राज्यमन्त्री ओमारले दोहोर्याएका थिए।
के भन्छ नेपाल सरकार?
मलेसिया जाने कामदार नेपाल सरकारले रोक्नुपर्ने कुनै कारण नभएको श्रम रोजगार तथा सामाजिक सुरक्षा मन्त्रालयका एक अधिकारीले बताए। 'श्रम मन्त्रालयले पटक-पटक मलेसियाको मानव संसाधन मन्त्रालयलाई नेपाली कामदार लिन पत्राचार गरिरहेको छ,' ती अधिकारीले भने, 'यो विषयमा मलेसिया सरकारले कानुन निर्माणको गृहकार्य भइरहेको भन्दै केही समय पर्खन आग्रह गरिरहेको छ।'
पछिल्लो समय नेपालले नभएर मलेसिया सरकारले नै कानुनी प्रक्रिया मिलाइरहेकाले नयाँ श्रमिक रोकिएको ती कर्मचारीले जानकारी दिए। मलेसियाको रोजगारी खुल्ने विषयमा आधिकारिक निर्णय आउन दुई महिना लाग्न सक्ने समेत उनले बताए।
मलेसिया सरकारले नेपाली कामदार निःशुल्कदरमै लिने बताउँदै आएको छ।
गत जेठमा सरकारले मलेसिया जाने नेपाली श्रमिकमाथि आर्थिक ठगी गरेको भन्दै सो पक्रिया संलग्न रहेका संस्थाहरूलाई अवैधानिक ठहर गरी ती संस्थाका कामकारबाही बन्द गरिदिएको थियो। बायोमेट्रिम, भिएलएन, वानस्टप सेन्टर, ओएसी, जिसिसी र माइग्रालगायतका पाँच वटा संस्था खारेजीमा परेका थिए। यो सँगै मलेसिया जाने नेपाली कामदारका सबै प्रक्रिया रोकिएको छ। यी संस्थामार्फत कामदार नलिने श्रम सम्झौता निर्णय भएको बताइएको छ।
पछिल्लो समय मलेसियामा कामदारको अभाव चर्किएको छ। जसकारण मलेसिया सरकारलाई दबाब बढेको मलेसियाली सञ्चारमाध्यमले समाचार संप्रेषण गर्दै आएका छन्।
नेपाल र मलेसियाबीच श्रम समझदारी भए पनि बाँकी प्रक्रिया नमिलेका कारण अझै पनि मलेसियाको रोजगारी टुंगो लागेको छैन। श्रम सम्झौता भएपनि मलेसियाको रोजगारी नखुल्दा धेरै नेपालीको रोजगारी गुमेको छ।
मलेसियाको रोजगारी बन्द हुनुअघि मासिक १० हजार नेपाली मलेसिया जाने गरेका थिए। कलिङ भिसा लागेका करिब ९ हजार कामदार पनि मलेसिया जानेबाट बञ्चित भएर रोकिएका छन्।
नेपाली कामदार बढी जाने देशको सूचीमा मलेसिया पहिलो नम्बरमा पर्ने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
