काठमाडौं– प्रधानमन्त्री केपी शर्मा ओलीको सम्बोधनपछि प्रश्न सोध्न नपाएको विवादमा संसद स्थगित भएको छ।
प्रमुख प्रतिपक्ष नेपाली कांग्रेसले संघीय संसदको ‘प्रतिनिधिसभा नियमावली’को २१९ अन्तर्गत प्रश्न सोध्न दिनुपर्ने विषयमा विवाद भएपछि होहल्ला बीचमै सभामुख कृष्णबहादुर महराले संसदमा दुई विधेयक पेस गर्न अनुमति दिएका थिए।
प्रधानमन्त्रीले समयसामायिक विषयमा उठेका प्रश्नहरुमा जवाफ दिए लगत्तै नेपाली कांग्रेसका नेताहरुले उठेर प्रश्न उत्तरका लागि समय मागेका थिए। कांग्रेससँगै स्वतन्त्र सांसद प्रेम सुवाल र राजपाकी सांसद सरिता गिरीसमेत उठकी थिइन्।
संसद नियमावलीको परिच्छेद ८ र ९ अनुसार प्रश्न–उत्तर कार्यक्रम होइन भन्दै सभामुखले सांसदहरुलाई बस्न आग्रह गरेपछि विवाद सुरु भएको हो। प्रधानमन्त्रीले सरकारको काम र कर्तव्यको विषयमा जानकारीमुलक विषयमा आफ्नो सम्वोधन गरेको भन्दै महराले प्रश्न गर्न नसक्ने बताएका थिए। प्रश्न–उत्तरको प्रक्रिया अलग्गै भएकोले यसमा अवरोध नर्गन सभामुख महराले आग्रह गरेपनि कांग्रेस सांसदहरुले बस्न मानेनन्।
सभामुखले ‘प्रश्न–उत्तर कार्यक्रम छ। पछि राखौंला’ भने, तर नियमावलीको व्यवस्था मिच्न नपाउने भन्दै कांग्रेस सांसदहरुले नाराबाजी गरिरहे। ‘प्रधानमन्त्रीलाई प्रश्न सोध्न नपाइने भन्ने हुँदैन’ भन्दै प्रतिवादी कांग्रेस सांसदहरुले ‘प्रश्न राख्न नदिनुले संसदको अपमान भएको’ समेत आरोप लगाएका थिए।
तर, सभामुख महराले ‘संसदको अपमान हुँदैन, प्रश्न गर्न सक्नुहुन्छ’ भन्दै रोकिरहे। मिनेन्द्र रिजाल र दिलेन्द्रप्रसाद वडुले प्रश्न सोध्न समय मागिरहे।
केही समयको रस्काकस्सीपछि सभामुखले रिजाललाई एक मिनेटभित्र आफ्ना कुरा राख्न समय दिए। तर, उनले एक मिनेटमा आफ्ना कुरा राख्न दिएको समय अस्वीकार गर्दै सबैलाई सोध्न दिनुपर्ने माग गरे।
उता दिइएको एक मिनेटको समय सकिएपछि सभामुखले जबरजस्ती बैठकको अर्को कार्यसूचीमा प्रवेश गरेका थिए। सभामुख महराले विपक्षीले उठेर गरेको अवरोधलाई पेलेर शून्य र विशेष समय हटाएको सूचना सुनाए। लगत्तै उनले अर्थ समितिका सभापति कृष्णप्रसाद दाहाललाई निवृत्तिभरण कोषसम्बन्धी तथा भुक्तानी तथा फछ्र्यौट सम्बन्धमा बनेको विधेयक दफावार छलफलका लागि संसदमा पेस गर्न समय दिएका थिए।
सभामुखले आफूहरुको अवरोध नसुनेपछि कांग्रेस सांसदहरुले रोस्टम घेरेका थिए। तर, सभामुख महराले त्यसको पर्वाह नगर्दै विधेयक पेस गर्न अनुमति दिएका थिए।
कांग्रेस सांसदहरुको नाराबाजीका बीचमै संसदमा दुई वटा विधेयक पेस भएका थिए। लगत्तै सभामुख महराले बैठक १५ मिनेटका लागि स्थगित भएको सूचना जारी गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
