काठमाडौं– प्रधानमन्त्री केपी शर्मा ओलीले सामाजिक सुरक्षा कार्यक्रम आफूले मात्रै ल्याएको भनेर 'प्याटेन्ट राइट' वा 'कपी राइट'मा बहस नगरेको बताएका छन्।
गत मंसिर ११ देखि सुरु योगदानमा आधारित सामाजिक सुरक्षा कार्यक्रम आफ्नो पालामा आएको भन्दै चालू अधिवेशनको पहिलो दिन पूर्व प्रधानमन्त्री शेरबहादुर देउवाले प्रधानमन्त्री ओलीको आलोचना गरेका थिए।
आइतबार संसदमा सम्बोधन गर्दै प्रधानमन्त्री ओलीले देउवालाई जवाफ दिएका हुन्। 'मेरा मित्र पूर्व प्रधानमन्त्रीले त यसै सदनमा प्रश्न गर्नुभयो- सामाजिक सुरक्षा हाम्रो पालामा ल्याएका हाैं, अहिले प्रधानमन्त्रीले आफूले ल्याएको भन्ने?', प्रधानमन्त्री ओलीले भने, 'यसमा अप्ठ्यारो मान्नुपर्ने, मुखै लुकाउनुपर्ने कुरा कहाँबाट आयो। जस जो कोही लिनुस्, लिनुभए हुन्छ। हामी प्याटेन्ट राइट वा कपी राइटमा बहस गरिरहेका छैनौं। मेरो भनाइ यतिमात्रै हो। गएको मंसिर ११ गतेबाट मैले योगदानमा आधारित सामाजिक सुरक्षा कार्यक्रम ल्याएको हुँ। सबैले राम्रोसँग थाहा पाउने गरी। यो नयाँ युगको सुरुवात हो।'
प्रधानमन्त्रीले ओलीले संविधानमा उल्लेख समाजवाद उन्मुख हाम्रो गन्तव्य र लोककल्याणकारी राज्यको चरित्र निश्चित गर्ने भएकाले सामाजिक सुरक्षा कार्यक्रम नयाँ युगको थालनी नै भएको दाबी गरे।
यो कार्यक्रमको घोषणा हुने अघिल्लो दिन राजधानीका विभिन्न स्थानमा बिजुलीका पोल-पाेलमा प्रधानमन्त्रीको फोटोसहित 'नयाँ युगको सुरुवात' उल्लेखित पोस्टर झुन्ड्याइएको थियो। त्यस्तै, घोषणा कार्यक्रमको दिन उस्तै प्रकृतिको विज्ञापन राष्ट्रिय दैनिक पत्रिकाहरुकाे पहिलाे पृष्ठमा प्रकाशित गरिएको थियो।
उनले यो उपलब्धी मेरो एक्लो वा मेरो दलको मात्रै भनेर कहीँ नभनेको दाबी गरे। 'यस आर्थिक वर्षको नीति तथा कार्यक्रम यस सदनले सर्वसम्मतिले स्वीकृत गरेको हो, पारित गरेको हो। त्यसैमा उल्लेख भए बमोजिम योगदानमा आधारित सामाजिक सुरक्षा लागू हुँदा त्यसको जस सिंगो सदनले पाउनुपर्छ। यसको श्रेय सबैले मिलेर लिउँ। मेरो आग्रह त्यही हो', उनले भने, 'जस लिन हानाथाप गर्नुभन्दा पनि प्रभावकारी ढंगले कार्यान्वयन गरौं।'
'सामाजिक सुरक्षा नागरिकको हक हो। २५ वर्षअघि ७५ वर्ष उमेर पार गरेका जेष्ठ नागरिकलाई मासिक एक सय रुपैयाँ भत्ता दिँदै सुरु भएको सामाजिक सुरक्षा प्रणालीले यस वर्षबाट गुणात्मक फड्को मारेको छ। हरेक वर्ष मंसिर ११ गतेलाई सामाजिक सुरक्षा दिवसका रुपमा मनाइने निर्णयसँगै योगदानमा आधारित सामाजिक सुरक्षा योजना कार्यान्वयनमा आएको छ', प्रधानमन्त्री ओलीले भने, 'यसले आफ्नो दायरामा ज्यालादारी रहेका वा स्वरोजगार, औपचारिक वा अनौपचारिक दुवै श्रम क्षेत्र र सबै प्रकृतिका श्रम सम्बन्धमा कार्यरत श्रमजीवीहरुलाई समेट्दै श्रम शक्तिको विकासको लागि आवश्यक उत्पादन सम्बन्धको प्रभावकारी ढंगले परिवर्तन गरिरहेको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
