काठमाडौं– टिकापुर काण्डको मुख्य योजनाकारको आरोप लागेका रेशम चौधरीले आज सपथ लिएपनि उनी निलम्बित सांसदका रुपमा रहने भएका छन्।
थरुहट आन्दोलनका क्रममा कैलालीको टिकापुरमा एक नाबालकसहित ८ जनाको मृत्यु हुनेगरि २०७२ भदौ ७ मा सो हत्याकाण्ड भएको थियो।
चौधरी कैलाली क्षेत्र नम्बर १ बाट प्रतिनिधिसभा सदस्यका लागि राष्ट्रिय जनता पार्टी (राजपा)को उम्मेदवारको रुपममा विजयी भएका थिए। सांसद पदमा निर्वाचित भएपनि हत्या आरोप लागेका उनलाई हालसम्म पनि सपथ नगराइएको भन्दै चौधरीको रिहाइ तथा सपथलाई राजपाले आफ्नो प्रतिष्ठाको लडाइँ बनाएको थियो।
संसदको हिउँदे अधिवेशन बस्नु एक दिन अघि मात्रै (पुस १०) प्रधानमन्त्री केपी शर्मा ओलीलाई भेटेर राजपाले चौधरीको रिहाइ तथा सपथ खुवाउन सरकारलाई ७ दिनको म्याद दिएको थियो।
राजपाले सरकारलाई समर्थन जनाउँदा भएको सहमति कार्यान्वयन नभए सरकारलाई दिएको समर्थन फिर्ता लिने चेतावनी दिएपछि प्रधानमन्त्रीले समयमै माग पुरा हुने आश्वासन दिएका थिए।
प्रधानमन्त्रीसँगको भेटमा राजपा नेताहरुले जेलमा रहेका चौधरीको रिहाइको माग जोडसँग उठाएका थिए।
प्रधानमन्त्रीसँग भेट गरेको भोलिपल्ट (पुस ११) मा बसेको संसदको पहिलो बैठकमा अध्यक्ष मण्डलका संयोजक राजेन्द्र महतोले जेलमा रहेका चौधरीका पक्षमा सरकारसँग आक्रोश पोखेका थिए। महतोले सोधेका थिए–
‘यो संसदमा निवार्चित सांसद बस्नुपर्छ कि पर्दैन? प्रचण्डजी तपाईंले १० वर्ष आन्दोलन गर्नुभयो। हजारौं मान्छेले शहादत प्राप्त गरे। सुरक्षा निकायका कर्मचारी मारिए। कसलाई मुद्दा लाग्यो? को जेलमा छ? जनताबाट निवार्चित रेशम चौधरी जेलमा बस्नुपर्छ? थारु हुँदैमा जेलमा बस्नुपर्ने? यही हो लोकतन्त्र? यसैको लागि लडेका हौं हामी?’
संसदमा सरकार पक्षसँग असन्तुष्टि व्यक्त गर्दै महतोले चौधरी जेल बस्नुपर्नाको जवाफ माग गरेका थिए।
राजपाको नेतृत्वमा महतो आइसकेपछि उनको प्रभाव पार्टीमा बढाउन पनि चौधरीको सपथलाई मुख्य रुपमा जोडेर हेरिएको छ।
अर्कोतर्फ, ७ दिने राजपाको अल्टिमेटमलाई सम्बोधन गर्नेगरि ओली सरकारले केही माग संबोधन गर्ने ‘चेस्टा’ गरेको छ। राजपासँगको दुरी नबढाउनका लागि सरकारले चौधरीको सपथको रणनीति लिएको बुझिन्छ।
निलम्बित सांसदका रुपमा रहने
टीकापुर घटना गराएको अभियोगमा चौधरीविरुद्ध कर्तव्य ज्यान, ज्यान मार्ने उद्योग र डाँकाचोरी मुद्दा दायर गरिएको थियो। उक्त घटनामा एक नाबालकसहित ८ प्रहरीले ज्यान गुमाएका थिए।
काठमाडौंस्थित डिल्लीबजार कारागारमा रहेका चौधरीले गत फागुनमा कैलालीको जिल्ला अदालतमा आत्मसमर्पण गरेका थिए। चौधरीमाथि मुद्दा लागेपछि उनी भारतमा लुकेर बस्दै आएको बताइन्छ।
नेपाल कम्युनिष्ट पार्टी (नेकपा) का एक सांसदले चौधरीले सपथ लिएपनि उनी निलम्बित सांसदको रुपमा रहने बताए। अदालती प्रक्रिया जारी रहने जनाउँदै उनले भने, ‘१÷२ महिना भित्रै उनी रिहा हुन्छन्।’
चौधरीलाई संसद नियमावलीमा निलम्बित सांसदका रुपमा राख्न नेकपाले चाहेको तर कांग्रेसका कारण लेख्न नसकिएको उनले स्मरणसमेत गरे।
०७२ सालमा घटेको टीकापुर घटनापछि भारतमा बस्दै आएका चौधरीले भूमिगत रूपमै चुनावमा जितेका थिए। अदालतमा आत्मसमर्पण गरेका उनले सपथ भने लिन पाएका थिएनन्।
रेशम चौधरीको सपथ जनताको जीत : राजपा
टीकापुर घटनाका आरोपी रेशम चौधरीलाई सपथ खुवाइन लागेको विषयलाई राष्ट्रिय जनता पार्टीले सकारात्मक कदमको रूपमा लिएको छ।
राजपा महासचिव केशव झाले चौधरीको सपथ आफूहरूले सरकारसँग उठाइरहेका मागहरूको सम्बोधनको ‘सुरूवात’ मात्र भएको टिप्पणी गरे।
‘जनताबाट जितेका प्रतिनिधिले सपथ खान पाउनुपर्छ भन्ने हाम्रो माग रहँदै आएको थियो’, उनले भने, ‘तर, उनले सपथ खाएसँगै हाम्रा मागहरू पूरा हुने क्रम मात्र सुरू हुनेछ। यसलाई भने हामीले एउटा सुरूवातको रूपमा लिएका छौं।’
झाले चौधरीको सपथ ‘जनताको जीत’को रूपमा अथ्र्याए। ‘रेशम चौधरीलाई सपथ नखुवाउनु भनेको लोकतन्त्रकै उपहास थियो’, उनको भनाइ थियो।
चौधरीले आजै दिउँसो ३ बजे सपथ खाने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775112303.png)
-1764146706.png)
