मुख्यमन्त्री फेर्ने हल्ला मात्रै : स्वास्थ्य मन्त्री यादव

समाचार

दिनेश शर्मा बुधबार, पुस १८, २०७५ १५:२१

राजविराज– उपप्रधान एवम् स्वास्थ्य तथा जनसंख्या मन्त्री उपेन्द्र यादवले मौलिक हक उपभोगको दिशामा मुलुक अघि बढेको बताएका छन्।

स्वास्थ्य मन्त्रालय र नेपाली सेनाको सहकार्यमा सञ्चालन हुन लागेको बृहत स्वास्थ्य शिविरको तयारीका लागि बुधबार गृह जिल्ला सप्तरी आएका यादवले शिक्षा, स्वास्थ्य, रोजगारी लगायतका संविधान प्रदत्त मौलिक हक उपभोगको वातावरण बन्दै गएको बताए।

‘अहिलेको संविधानको महत्वपूर्ण भाग भनेको मौलिक हक हो, त्यसको उपभोग गराउन १६ वटा ऐन बनेका छन्,’ यादवले भने,‘मुलुक अब त्यही दिशामा अघि बढेको छ।’

संविधान संशोधनको एजेण्डा पनि यथावत रहेको यादवले बताए। जबरजस्ती संविधान जारी गरेका पक्षले पनि संशोधन नगरी हुन्न भन्ने महसुस गर्न थालेकाले संशोधनको उचित वातावरण बन्दै गएको उनले बताए।

मुख्यमन्त्री फेर्ने हल्ला मात्रै

मन्त्री यादवले प्रदेश–२ को सरकार परिवर्तन हुने र मुख्य मन्त्री हेरफेर हुने विषय हल्ला मात्रै भएको प्रतिक्रिया दिए। उपलब्ध साधन/श्रोत, परिस्थितिका आधारमा प्रदेश सरकारले राम्रै काम गरिरहेको उनको भनाइ छ।

‘सीमित स्रोत साधन र संक्रमणकालीन अवस्थामा सरकारले राम्रै काम गरिरहेको छ,’ उनले भने,‘जनताका अपेक्षा अलि बढी नै छन्, केही असन्तुष्टि देखिनु स्वभाविक हो।’

फागुन १ देखि सप्तरीमा स्वास्थ्य शिविर

स्वास्थ्य मन्त्री यादवले फागुन–१ गतेदेखि सप्तरी सदरमुकाम राजविराजमा सञ्चालन हुने बृहत् स्वास्थ्य शिविर सञ्चालनका लागि सरोकारवालासँग छलफल गरेका छन्।

स्वास्थ्य मन्त्रालयको सहयोगमा नेपाली सेनाले शिविरको आयोजना गर्न लागेको हो।

स्वास्थ्य शिवीरबाट सप्तरी, सिरहा, उदयपुर र सुनसरी जिल्लाका बिरामीले सेवा लिन सक्ने स्वास्थ्य सचिव पुष्पा चौधरीले जानकारी दिइन्।

स्वास्थ्य सचिव चौधरी र नेपाली सेनाका उपरथी एवम् स्वास्थ्य महानिर्देशक शशी राईसहित आएका यादवले शिविरका लागि जिल्लामा रहेको स्रोत साधन र जनशक्ति चुस्त राख्न निर्देशन दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।