काठमाडौं– राष्ट्रिय स्वतन्त्र पार्टीका सभापति रवि लामिछाने भारतको धार्मिक भ्रमणबाट फर्किएको सार्वजनिक जानकारी मंगलबार मात्र भयो, जबकि उनी आइतबार राति नै काठमाडौं फर्केका थिए।
उनी भारत जाँदा निजी सचिवालयले विज्ञप्ति नै निकालेर जानकारी गराएको थियो। तर, फर्किएको जानकारी दिन चाहेन।
भारतबाट फर्केपछि रवि मंगलबार बिहान पशुपतिनाथ मन्दिरको दर्शन गर्न गए। पशुपतिनाथको दर्शनपछि रविकी धर्मपत्नी निकिता पौडेल लामिछानेले फोटो सार्वजनिक गर्दै आफ्नो फेसबुक वालमा लेखिन्, ‘परम्परागत धार्मिक मान्यताअनुसार माता कामाख्याको दर्शनपछि शिवशक्ति पीठको दर्शन गरिएमा मात्रै तीर्थयात्रा पूर्ण हुन्छ। कामाख्या माता, सतीदेवीको योनी पतन भएको स्थानमा स्थापित स्वरूप भएकाले महादेवको दर्शनले यात्रा पूर्ण हुने जनविश्वास बनेको हुन सक्छ। आज आराध्यदेव श्री पशुपतिनाथको दर्शनसँग तीर्थयात्रा पूर्ण गरियो।’
रवि गत शुक्रबार तीनदिने आध्यात्मिक तथा पारिवारिक भ्रमणका लागि धनगढी हुँदै उत्तराखण्ड गएका थिए। उनले उत्तराखण्डमा गोलु देवता, नैनीतालस्थित कैंची धाम र आसाममा कामाख्या देवीको दर्शन गर्नुका साथै काली बाबाको पनि दर्शन गरेका थिए।
रविका निकटस्थहरूले कालीदास बाबासँगको भेटबाहेकका फोटोहरू सार्वजनिक गरेका थिए। मंगलबार पशुपतिनाथ मन्दिर दर्शनको फोटोसमेत सार्वजनिक भएको छ। कतिपय अवस्थामा नेपालको राजनीतिमा कालीदास बाबालाई जोड्ने गरिन्छ। उनीसँगको भेटबारे रविको सचिवालयले पूर्वजानकारी सार्वजनिक गरेको थिएन।
रवि कहिले भारतबाट फर्किए भन्ने सूचना उनीनिकटस्थहरूले दिएका छैनन्। जानकारहरूका अनुसार तीनदिने भ्रमण सकेर उनी आइतबार राति नयाँदिल्लीबाट काठमाडौं विमानस्थलमा ओर्लिएका थिए। उनीसँगै निकिता र प्रमुख स्वकीय सचिव अभिनाश आचार्य पनि फर्केका छन्।
रवि गत जेठमा पार्टी सभापतिको हैसियतमा भारतको औपचारिक भ्रमणमा गएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
