काठमाडौं– सिरहाको गोलबजार नगरपालिकाका तत्कालीन नगरप्रमुख देवनाथ साहु तेलीसहित ७ जनाविरुद्ध १ करोड ६० लाख रुपैयाँभन्दा बढीको भ्रष्टाचार मुद्दा विशेष अदालत, काठमाडौंमा दायर भएको छ।
गोलबजार नगरपालिकाका तत्कालीन नगरप्रमुख तेली, उपप्रमुख रेशम कुमारी थापासहितको आपसी मिलेमतोमा आर्थिक वर्ष २०७७/७८ र २०७८/७९ मा नगरपालिका क्षेत्रभित्रका पशु हाटबजार, बाख्रा हाटबजार र गुदरी हाटबजार सञ्चालनबापतको राजस्व असुलीमा गैरकानुनी छुट दिएको र राजस्व कोषमा दाखिला नगरी हिनामिना गरेको दाबीसहित अख्तियार दुरुपयोग अनुसन्धान आयोगले मंगलबार मुद्दा दायर गरेको हो।
नगरपालिकाले वडा नं. ६ र ७ मा हाटबजार सञ्चालनका लागि प्रतिस्पर्धाबिना सोझै वडा नं. ८ निवासी ठेकेदार वीरेन्द्र कुमार यादवलाई अमानतमा ठेक्का दिएको अनुसन्धानबाट खुलेको छ।
आयोगका अनुसार गोलबजार नगर कार्यपालिकाको २०७८ साउन ४ गतेको निर्णयद्वारा प्रचलित कानुन र विधायकीय सिद्धान्तविपरीत गैरकानुनी रूपमा २७ लाख ३४ हजार ९१३ रुपैयाँ राजस्व छुट दिइएको थियो।
त्यस्तै, कार्यपालिकाको २०७८ साउन १४ गतेको निर्णयअनुसार अमानती ठेकेदार वीरेन्द्र कुमार यादवबाट असुल गरी सञ्चित कोषमा दाखिला गर्नुपर्ने १ करोड ३३ लाख ११ हजार ४३१ रुपैयाँ राजस्व असुल नगरी सार्वजनिक सम्पत्तिमा हानि–नोक्सानी पुर्याइएको थियो।
यसरी आर्थिक वर्ष २०७७/७८ र २०७८/७९ मा गरी कुल १ करोड ६० लाख ४६ हजार ३४४ रुपैयाँ बराबरको सार्वजनिक सम्पत्तिमा हानि–नोक्सानी पुर्याएको आरोपपत्रमा उल्लेख छ।
आयोगले तत्कालीन नगरप्रमुख देवनाथ साहु तेली, उपप्रमुख रेशम कुमारी थारू, तत्कालीन प्रमुख प्रशासकीय अधिकृतद्वय श्रीधर केसी र अनन्त कुमार पौड्याल, तत्कालीन निमित्त प्रमुख प्रशासकीय अधिकृत राम नारायण महतो, तत्कालीन राजस्व शाखा प्रमुख दिनेश कुमार सहनी र हाटबजार ठेकेदार वीरेन्द्र कुमार यादवविरुद्ध आरोपपत्र दायर गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1793102318.png)
-1786602170.png)
