काठमाडौं- चालू आर्थिक वर्षको पहिलो ५ महिनाको अविधमा मुलुकमा करिब साढे ६ खर्बको सामान आयात भएको छ। यस वर्षको साउन १ गतेदखि मंसिर मसान्तको अविधमा ६ खर्ब ४४ अर्ब ५० करोड रुपैयाँ बराबरको सामान भित्रिएको व्यापार तथा निकासी प्रवर्द्धन केन्द्रले जानकारी दिएको छ। गत वर्षको यही अविधमा ४ खर्ब ८७ अर्ब रुपैयाँ बराबरको समान भित्रिएको थियो।
मंसिर मसान्तसम्ममा सबै भन्दा बढी पेटोलियम पदार्थको आयात भएको छ। पेटोलियम पदार्थमा ८७ अर्ब ९९ करोड १६ लाख रुपैयाँ खर्च भएको केन्द्रले जानकारी दिएको छ। यो अघिल्लो वर्षको तुलनामा ५८ दशमलव ४ प्रतिशतले बढी हो। साथै फलाम तथा सिल्भरका सामानको आयत ४९ दशमलव ७ प्रतिशतले बढेको छ।
उत्पादनशील क्षेत्रमा लागनी गर्न आयात बढेको हो भने सकारात्मक रुपमा लिनुपर्ने व्यापार तथा निकासी प्रवर्द्धन केन्द्रका कार्यकारी निर्देशक शरदविक्रम राणाले बताए। उनले भने,‘अत्यधिक आयात भएको पेट्रोलियम पदार्थ पूँजी निर्माणमा प्रयोग भएको भए त्यसले आगामी दिनमा व्यापार घाटा कम गर्न सहयोग गर्छ।’
यता मंसिर मसान्तसम्ममा निर्यात १२ दशमलव ३ प्रतिशतले बढेर ३७ अर्ब ५० करोड रुपैयाँ पुगेको छ। यसमा क्रमिक सुधार आएको निर्देशक राणाले बताए। उनले भने, ‘यार्न, उलन लगायतका सामान निकासीमा वृद्धि भएसँगै निर्यात बढेको हो।'
५ महिनामा यार्नको निर्यात २० प्रतिशतले बढेको छ। यस अवधिमा ३ अर्ब ८२ करोड रुपैयाँ बराबरको यार्न निर्यात भएको छ। यता उलनको निर्यात करिब १६ प्रतिशतले बढेको छ।
कृषिजन्य वस्तुको निर्यात २६ प्रतिशतले बढेको निर्देशक राणाले जानकारी दिए। ‘मंसिर मसान्तसम्म ११ अर्ब ४४ करोड रुपैयाँ बराबरको कृषिजन्य वस्तु निर्यात भएको छ,’ राणाले भने। अघिल्लो वर्ष ९ अर्ब ९ करोड रुपैयाँ बराबरको कृषिजन्य वस्तुको निर्यात भएको थियो।
चाइनिज सामानको आयात बढ्यो
अघिल्लो वर्षको तुलनामा यस वर्षको मंसिर मसान्त सम्ममा चाइनिज सामानको आयात ४७ दशमलव ४ प्रतिशतले बढेको छ। पाँच महिनामा चीनबाट ८८ अर्ब ६३ करोड रुपैयाँ बराबरको समान-आयात भएको छ। जबकि अघिल्लो वर्षको यही अवधिमा ६० अर्ब १२ करोड रुपैयाँ बराबरको सामान आयत भएको छ।
यता सबैभन्दा धेरै सामान आयत हुने भारतबाट पाँच महिनामा ३ खर्ब ८६ करोड ५५ लाख रुपैयाँ बराबरको सामान आयात भएको छ। यो अघिल्लो वर्षको यही अवधिको तुलनामा ३१ दशमलव १ प्रतिशतले बढी हो। अघिल्लो वर्ष भारतबाट २ खर्ब ९४ अर्ब रुपैयाँ बराबरको समान आयात भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791358722.jpg)
-1786602170.png)
