काठमाडौं- प्रधानन्यायाधीश ओमप्रकाश मिश्रले अवकाश एक सातासम्म मुद्दाको पेशी नहेर्ने निर्णय गरेका छन्। बुधवारदेखि अवकाश पाउने दिन आउँदो पुस १७ गतेसम्म कुनै पनि मुद्दा इजलासमा बसेर नहेर्ने उनले निर्णय गरेका हुन्।
रोलक्रमा रहेका न्यायाधीश दीपकराज जोशी संसदीय सुनुवाइबाट अस्विकृत हुँदा मिश्रले प्रधानन्यायाधीश हुने मौका पाएका थिए। भदौ २६ गते प्रधानन्यायाधीश नियुक्त भएका मिश्रको कार्यकाल पनि यअसघिका न्यायाधीशझैं विवादित नै रह्यो।
भ्रष्टाचारका मुद्दा, एनसेल र अन्य राजस्वका मुद्दामा उनले विवादित फैसला गरेका छन्। इजलास तोक्नेदेखि ठूला विकास आयोजनाको मुद्दा र संवैधानिक इजलास बसाउने कुरामा पनि उनी विवादमा मुछिए।
मिश्रको कार्यकालमा भ्रष्टाचार आरोपी धेरै अभियुक्तले सफाइ पाएका थिए। मोतीलाल बोहोरादेखि कृषि विकास बैंक घोटला प्रकरणमा यसअघि दोषी ठहर भएका गोविन्दप्रसाद जोशीले समेत सफाइ पाए।
४ महिनाको कार्याकालमा मिश्र दुई पटक अदालतको निरीक्षणको नाममा हेलिकोप्टर लिएर रारा र पाथिभरा भ्रमणका परिवारका सदस्यसहित निस्किए। प्रधानन्यायाधीशको सपथ लिँदा उनले अदालतमा अटो पेशी तोक्ने पद्धतिको विकास गर्ने वाचा गरेका थिए। तर उक्त वाचा गफमै मात्र सीमित हुन पुग्यो।
पदबहालीका क्रममा मिश्रले आफूले कम समयमा न्यायालयमाथि जनविश्वास बढाउने, सूचनामैत्री न्यायालय बनाउने, सम्पत्ति विवरण नबुझाउने न्यायाधीशलाई कारबाहीको दायरामा ल्याउने लगायतका प्रतिबद्धता व्यक्त गरेका थिए। तर यी वाचा कुनै पनि कार्यान्वयनमा गएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
