काठमाडौं- धान उत्पादनले ऐतिहासिक रेकर्ड कायम गरेको छ। चालू आर्थिक वर्ष (आव) २०७५/७६ मा हालसम्मकै सबैभन्दा उच्च परिमाणमा धान उत्पादन भएको कृषि तथा पशुपन्छी विकास मन्त्रालयले जनाएको छ।
मन्त्रालयका अनुसार यस वर्ष ५६ लाख १० हजार मेट्रिक टन धान उत्पादन भएको मन्त्रालयले जनाएको छ। यसअघि आव ०७३/७४ मा ५२ लाख ३० हजार मेट्रिक टन धान उत्पादन भएको थियो। उक्त रेकर्डलाई चालू आवको उत्पादनले तोडेको हो।
यो यथेष्ट वर्षा, पर्याप्त मात्रामा रसायनिक मलको आपूर्ति हुनु, प्राकृतिक प्रकोप ननिम्तिनु, विगतका वर्षका तुलनामा धेरै क्षेत्रफलमा रोपाइँ हुनु, वर्णशंकर जातका धान लगाउने प्रवृत्तिलगायतका कारण धान उत्पादन बढेको मन्त्रालयले जनाएको छ। त्यस्तै, प्रधानमन्त्री कृषि आधुनिकीकरण परियोजनाका ७ वटा जोन र ३ सुपरजोनबाट बृहत रूपमा कार्यक्रम संचालन हुनुले पनि उत्पादन वृद्धिमा सहयोग पुर्याएको मन्त्रालयको भनाइ छ।
गत वर्ष ५१ लाख ५१ हजार धान उत्पादन भएको थियो। चालू वर्षमा उत्पादित धान गत वर्षको तुलनामा ४ लाख ५८ हजारले बढी हो। यो वृद्धि करिब ९ प्रतिशत बढी हो।
चालू आवमा करिब ९६ प्रतिशत खेतीयोग्य जमिनमा धान खेती भएको मन्त्रालयले जनाएको छ। चालू आवमा बाली लगाईएको क्षेत्रफलमा २० हजार हेक्टरले बढेको मन्त्रालयको भनाइ छ।
गत आवमा ३ दशमलव ५ मा रहेको उत्पादकत्व यस वर्ष ३ दशमलव ७६ हासिल भई ७ प्रतिशतले वृद्धि भएको दाबी मन्त्रालयको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
