काठमाडौं– सेयर बजार सुधारमा बाधक भएको भन्दै अर्थमन्त्री डा युवराज खतिवडाको राजीनामासहित १० बुँदे माग राख्दै अनसन बसेका लगानीकर्ता केही पछि हटेका छन्।
दबाब समूहका संयोजक हरि ढकालले अहिले आफूहरुले राखेका अन्य माग पुरा भएमा अर्थमन्त्री खतिवडाले पदबाट राजीनामा दिनुनपर्ने बताए। भने, ‘राजीनामाले माग पुरा हुने होइन। तर, हाम्रा अन्य मागहरु भने पुरा हुनु पर्यो, माग पुरा नहुँदासम्म यो आन्दोलन निरन्तर रुपमा चलिरहन्छ।’ यद्यपि दबाब समूहले अघि सारेका १० बुँदामध्ये मुख्य माग नै अर्थमन्त्रीको राजीनामा रहेको छ।
यता जानकारहरु भने अनसनलाई निरर्थक भएको बताउँछन्। बजार घट्दैमा लगानीकर्ताले आन्दोलन गर्नुनपर्ने एक जानकारले बताए। उनले भने, ‘लगानीकर्ताको काम नियमनकारी निकायले कारोबारलाई प्रभावकारी नबनाएको खण्डमा आपत्ति जनाएर सुसुचित गर्ने हो। घटेको बेला बढाउन आन्दोलन गर्ने होइन।’ उनले सेयरको मूल्य बजारको माग र आपूर्तिले निर्धारण गर्ने बताए। भने, ‘आफू प्रतिफलको आसमा लगानी गर्ने अनि त्यसको प्रतिफल सरकारले सुनिश्चित गर्नुपर्छ भन्ने छैन।’
अर्का एक लगानीकर्ताले हालको अनसन सिमित व्यक्तिको स्वार्थपूर्तिको लागि भएको दाबी गरे। भने, ‘लगानीकर्ताले राखेका अधिकांश माग जायज छैनन्। जुन पूरा गर्न असंभव जस्तै छ।’
यता दबाब मूलक समूहको १० बुँदै मागमध्ये अर्थमन्त्रीको राजीनामा बाहेका अन्य मागमा नेपाल पूँजी बजार लगानीकर्ता संघले समर्थन गरेको छ। संघकी अध्यक्ष राधा पोखरेलले भनिन्, ‘अर्थमन्त्रीको राजीनामा बाहेक अन्य माग जायज छन्। यी माग पुरा नहुन्जेल हाम्रो आन्दोलन जारी रहने छ।’ यद्यपि दबाबमूलक अन्दोलनमा सेयर बजारका ‘खेलाडी’ भनेर चिनिएका व्यक्तिहरु भने प्रत्यक्ष रुपमा सहभागि छैनन्।
लगानीकर्ताको अनसनमा राजपाको ऐक्यबद्धता
लगानीकर्ताहरुको दबाब समूहले थालेको अनसनमा राजनीति छिरेको छ। लगानीकर्ताहरुले थालेको अनसनलाई राष्टिय जनता पार्टी(राजपा), नेपालले समर्थन जनाएको छ। सो दलका संयोजक राजेन्द्र महतोले सेयर लगानीकर्ता दबाब समूहलाई एक पत्र पठाउँदै ऐक्यबद्धता जनाएका हुन्।
पत्रमा देशको द्रूत आर्थिक विकासका लागि मेरुदण्डको रुपमा रहेको पूँजीबजारमा वर्तमान सरकारको गलत नीति र निर्णयका कारणले सर्वसाधारण लगानीकर्ताको खर्बौं रकम गुम्न गई पूँजीबजार विचलित भएको र देशको सम्पूर्ण अर्थतन्त्र नै प्रभावित हुनसक्ने अवस्थाप्रति राजपा नेपालको ध्यानाकर्षण भएको जनाएको छ। पत्रमा भनिएको छ, ‘सेयर लगानीकर्ता दबाब समूहबाट उठाइएका माग र जारी रिले अनसनप्रति राजपा नेपाल ऐक्यबद्धता जाहेर गर्दछ।’
अर्थमन्त्री डा खतिवडाले पदबाट राजीनामा दिनुपर्ने भन्दै अनसनमा बसेका उनीहरु अहिले यो मागबाट भने पछि हटेका छन्।
एक वर्षमा ३ सय ८३ अंकले घट्यो नेप्से परिसूचक
गत वर्षको मंसिर २४ देखि आजसम्म आइपुग्दा नेप्से परिसूचक ३ सय ८३ दशमलब ५६ अंकले घटेको छ।
२०७४ मंसिर २४ गते १ हजार ५ सय २७ दशमलब ७५ को बिन्दुमा रहेको नेप्से परिसूचक आज १ हजार १ सय ४४ दशमलब १९ को बिन्दुमा आइपुगेको छ। पछिल्लो एक वर्षको आँकडा हेर्दा नेप्से परिसूचक निरन्तर रुपमा ओरालो लागेको छ।
२०७४ साल चैत १२ गते परिसूचक १ हजार १ सय ६८ दशमलब ६२ को बिन्दुमा पुगेर केही सम्हालिएको थियो। सोपश्चात् केही समय उकालो लागेको परिसूचक २०७५ बैसाख ९ गते १ हजार ४ सय ३८ दशमलब ४९ को बिन्दुमा पुग्यो। त्यसपछि पुनः निरन्तर रुपमा ओरालो लागेको परिसूचक असोज ७ गते केही सम्हालिन खोजे पनि त्यसले निरन्तरता पाउन भने सकेको छैन।
अर्थमन्त्रीले गठन गरेको समितिको बैठक भोलि
अर्थ मन्त्रालयले मुद्रा र पूँजी बजारमा देखिएका समस्याबारे अध्ययन गर्न नेपाल राष्ट्र बैंकका डेपुटी गभर्नर शिवराज श्रेष्ठको संयोजकत्वमा गठित समितिको पहिलो चरणको बैठक आइतबार बसेको थियो। बैठकमा नेपाल बैंकर्स संघका अध्यक्ष ज्ञानेन्द्र ढुंगाना र नेपाल इन्भेस्टर फोरमका अध्यक्ष अम्बिकाप्रसाद पौडेलले हाल वित्तीय क्षेत्रमा देखिएका समस्याबारे आफ्ना भनाइ राखेका थिए।
आ–आफ्नो क्षेत्रका समस्या र तिनको समाधानका लागि सुझाव संकलन गरी मंगलबारको बैठकमा दुवै संस्थाका प्रतिनिधिले संकलित सुझाव प्रस्तुत गर्नेगरी आइतबारको बैठक सकिएको थियो।
समितिमा डेपुटी गभर्नर श्रेष्ठसहित नेपाल धितोपत्र बोर्डका अध्यक्ष डा रेवतबहादुर कार्की, अर्थ मन्त्रालय वित्तीय क्षेत्र व्यवस्थापन तथा संस्था समन्वय महाशाखा प्रमुख उत्तरकुमार खत्रीसहित बैंकर्स संघका अध्यक्ष ढुङ्गाना र सेयर लगानीकर्ताका प्रतिनिधि इनभेस्टर फोरमका अध्यक्ष पौडेल छन्।
अघिल्लो साता बैंकर्स संघले भद्र सहमति खारेज गर्दै व्यक्तिगत मुद्दति निक्षेपको ब्याज तोक्ने जिम्मा बैंकहरुलाई नै खुला छाडेपछि मुद्दति निक्षेपको ब्याजदर बढेर साढे १३ प्रतिशत पुगिसकेको छ। समिति गठन गरेकै दिन बैंकर्स संघको साधारणसभामा मन्त्री खतिवडाले उच्च ब्याजदर र ग्राहक खोसाखोस बैंकहरुकै लागि घातक हुने भन्दै सचेत गराएका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।