काठमाडौं– निर्वाचन सार्न सरकारले अदालतको आदेश टेक्न सक्ने चर्चा गरिएको ‘अगल–अलग मतपत्र सम्बन्धी रिट निवेदन’को किनारा सर्वोच्च अदालतले बुधबार मात्रै लगाउने भएको छ।
प्रत्यक्ष र समानुपातिक निर्वाचनका लागि अलग–अलग मतपत्र हुनुपर्ने माग गर्दै राष्ट्रिय जनता पार्टीका नेता सर्वेन्द्रनाथ शुक्लाले सर्वोच्चमा रिट निवेदन दायर गरेका थिए। उक्त रिट उपर सर्वोच्चमा सुनुवाई सुरु हुने बित्तिकै सरकारबाट बाहिरिने मनस्थितिमा पुगेका माओवादी केन्द्रका मन्त्रीहरुले निर्वाचन सार्ने षड्यन्त्र भएको भन्दै सरकार नछाड्ने घोषणा गरेका थिए।
उक्त निवेदनमा सरकार र विपक्षी दुवैको वहसपछि बुधबारलाई फैसला सुनाउने पेशी तोकिएको छ।
सर्वोच्चले बुधबार फैसला सुनाएपछि माओवादी मन्त्रीहरुले सरकारले अदालतको आदेश टेकेर निर्वाचन सार्ने तयारी गरेको भनी लगाएको आरोप प्रष्ट हुनेछ।
न्यायाधीश दीपकराज जोशी र पुरुषोतम भण्डारीको संयुक्त इजलाशले मंगलबार उक्त मुद्दामा सुनुवाइ सकेको छ। थप अध्ययन आवश्यक भएको भन्दै इजलासले फैसला मिति एक दिन पछि सारेको हो।
सर्वोच्च अदालतका प्रवक्ता नारायण पन्थीले भने, ‘दिनभरि निवेदक र सरकार पक्षको बहस सकियो, फैसलाका लागि थप अध्ययन आवश्यक देखिएकाले भोलिको पेशी तोकिएको छ।’
माओवादी केन्द्रले सर्वोच्चले मतपत्र अलग–अलग बनाउन आदेश दिने र त्यही आदेशका आधारमा सरकारले निर्वाचन सार्ने आरोप लगाउँदै सरकारबाट बाहिरिन अस्वीकार गरेको थियो । दुई घन्टा पहिले मन्त्री फिर्ता बोलाउने सूचना चुहाएको माओवादीले गृहमन्त्री जनार्दन शर्मा मार्फत ३ बजे पत्रकार सम्मेलन गरी सरकारले निर्वाचन सार्न लागेको सूचना पाएको जिकिर गर्दै मन्त्रीबाट नहट्ने जानकारी दिएको थियो।
माघ ७ भित्र प्रदेश र प्रतिनिधिसभाको निर्वाचन गरिसक्नुपर्ने संवैधानिक वाध्यताका कारण दलीय सहमतिमा निर्वाचन आयोगले समानुपातिकका लागि एउटा र प्रत्यक्षका लागि एउटा मतपत्र बनाउने निर्णय गरेको थियो।
तर, सर्वोच्च अदालतमा राजपाका नेता शुक्लाले असोज २२ मा एउटै मतपत्रमा दुई किसिमको निर्वाचन गर्न नमिल्ने भन्दै रिट दायर गरेका थिए।
आयोगले समानुपातिक निर्वाचनका लागि मतपत्र छाप्न थालिसकेको छ। जसमा एउटै मतपत्रमा दुई खण्ड बनाई प्रतिनिधिसभा र प्रदेशसभाका लागि ८८ पार्टीको चिह्न राखिएको छ।
तर, अदालतले एउटै मतपत्रबाट दुई किसिमको निर्वाचन गर्न नमिल्ने आदेश दिएमा मतपत्र छाप्न नभ्याइने बहानामा सरकारले निर्वाचन सार्न सक्ने माओवादीको आँकलन देखिन्छ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750327258.png)
-1749826086.png)
