काठमाडौं– डेविड मिलरको विस्फोटक ब्याटिङका बाबजुद कर्णाली याक्स नेपाल प्रिमियर लिग (एनपीएल) मा सुदूरपश्चिम रोयल्ससँग ३९ रनले पराजित भएको छ।
शुक्रबार कीर्तिपुरमा भएको खेलमा सुदूरपश्चिमले दिएको १७७ रनको लक्ष्य पछ्याएको कर्णालीले निर्धारित २० ओभरमा सात विकेट गुमाएर १३७ रन मात्र बनाउन सक्यो।
कर्णालीका लागि मिलरले एक्लै अविजित ९३ रन बनाए पनि टोलीलाई जिताउन सकेनन्। उनले ५५ बलमा पाँच चौका र सात छक्का प्रहार गरे। तर, उनलाई अर्को एन्डबाट पर्याप्त साथ मिलेन।
कर्णालीका दीपक डुम्रेले १२ बलमा तीन चौका र एक छक्कासहित १८ रन बनाए। कप्तान सोमपाल कामीले १७ बलमा आठ रन जोडे। गुल्सन झाले तीन, पवन सर्राफले पाँच, हुसेन तलातले एक र मार्क वाटले चार रन बनाए। अरिफुल इस्लाम खाता नखोली आउट भए।
सुदूरपश्चिमका स्कट कुगेलाइनले चार ओभरमा ३९ रन खर्चेर दुई विकेट लिए। हेमन्त धामी, अनिल खरेल, दीपेन्द्रसिंह ऐरी, थारिन्दु रत्नायके र अविनाश बोहराले समान एक विकेट लिए।
यसअघि टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १७६ रन बनाएको थियो।
सुदूरपश्चिमका सैफ जैबले सर्वाधिक ३५ रन बनाए। उनले २४ बलमा चार चौका र एक छक्का प्रहार गरे। विनोद भण्डारीले २२ बलमा दुई चौका र दुई छक्कासहित २७ रन जोडे।
ब्रान्डन म्याकमुलनले १६ बलमा २४ तथा इशान पाण्डेले १३ बलमा तीन छक्कासहित २३ रन बनाए। थारिन्दु रत्नायके १२ बलमा तीन चौका र एक छक्कासहित २२ रनमा अविजित रहे। स्कट कुगेलाइनले ६ बलमा दुई चौकासहित अविजित १३ रन बनाए।
कर्णालीका मार्क वाटले दुई विकेट लिए। नन्दन यादव, हुसेन तलात र सूर्य तामाङले समान एक विकेट हात पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
