ललितपुर - ‘डायल एक्सिलेटर: डिजिटल इनोभेशन इन एग्रिकल्चर एन्ड लजिस्टिक्स’ मा कृषकलाई सघाउने उत्कृष्ट ७ कम्पनीका परियोजनाहरूले सोमबार आफ्नो मोडल प्रस्तुत गरेका छन्।
स्विस सरकारको विकास सहयोग सँग मिलेर आद्यन्त फन्ड म्यानेजमेन्टले कार्यक्रम आयोजना गरेको हो।
कार्यक्रममा ‘दैलो कृषि’, ‘आर एन्ड डी सोलुशन्स’, ‘एग्रिबाटो’, ‘डा फिस’, ‘पिक एन्ड ड्रप’, ‘थोप्लो मेशिन’ र ‘प्लान्ट स्याट’ जस्ता कम्पनीहरूले कृषि तथा आपूर्ति क्षेत्रमा प्रविधिको प्रयोग मार्फत कृषकहरूलाई सहयोग गर्ने परियोजनाहरूको प्रस्तुति दिएका थिए।
यी सातवटै कम्पनीलाई विगत केही महिना देखि मार्गनिर्देशन तथा तालिम प्रदान गरिएको थियो। डायल कार्यक्रममा सहभागी कम्पनीका प्रतिनिधिहरूले आफ्ना योजनाका सम्भावना र आवश्यक लगानीबारे जानकारी दिएका थिए।
कार्यक्रममा ‘दैलो कृषि’ले प्रविधिको प्रयोग मार्फत किसानबाट स्थानीय रूपमा उत्पादित कृषि सामग्री उपभोक्ताको घरदैलोमा पर्याउने योजना प्रस्तुत गरे। यसले किसानले आफ्ना उत्पादनको उचित मूल्य पाउने र ग्राहकले सामानको गुणस्तरमा शंका नगर्ने अवस्थाको लक्ष्य राखेको छ।
‘आर एन्ड डी सोलुशन्स’ले ‘एग्रि नेपाल’एपमार्फत “माटोदेखि बजारसम्म”भन्ने नाराका साथ कृषिउत्पादनको प्रवद्र्धन गर्ने जानकारी दिएको छ।
त्यस्तै, ‘एग्रिबाटो’ले किसानलाई थोक व्यापारीसँग जोड्ने एपको प्रस्तुति दियो, जसमार्फत किसानहरूले सोझै खरिदकर्तासँग सम्पर्क गर्न र बजार मूल्यको रियल(टाइम अपडेट लिनसक्ने छन्।
‘डा। फिस’ले माछापालक किसानका लागि पानीको गुणस्तर मापन र माछामा लाग्न सक्ने सम्भावित रोग पहिचान गर्न सहयोग गर्ने उपकरणबारे जानकारी गरायो।
पाँचवर्षदेखि कृषि आपूर्ति क्षेत्रमा सक्रिय ‘पिक एन्ड ड्रप’ले सामाजिक सञ्जालमा आउने अर्डरलाई अटोमेसन प्रविधिमार्फत आफ्नो सिस्टममा समाहित गर्ने प्रविधिबारे जानकारी गरायो।
‘थोप्लो मेशिन’ले स्मार्ट ग्राफ्टिङ प्रणाली र सिँचाइ नियन्त्रक प्रणालीसहित अंकुरण तथा कलमी गर्ने स्वचालित प्रणालीबारे प्रस्तुति दिएको छ।
‘प्लान्ट स्याट’ले भने लामो समयदेखि कृषकलाई बीमा लिन प्रोत्साहित गर्दै आएको बताउँदै, स्याटेलाइटमार्फत कृषि बालीको अवस्थाबारे जानकारी दिने प्रविधिको प्रस्तुति दिए। यस प्रणालीले कृषकलाई क्षतिपूर्ति लिन र बीमा कम्पनीलाई भुक्तानी दिन सहज हुने बताइएको छ। यसले कृषक र बीमा कम्पनी बीचको पारदर्शिता र विश्वास बढाउने अपेक्षा गरिएको छ।
कार्यक्रमपछि बोल्दै स्विस सरकारको विकास सहयोग प्रतिनिधि सिसिल रिभेराले कृषिमा सिर्जनशीलता र नवप्रवर्तनमा स्विट्जरल्यान्ड सधैं साथ दिँदै आएको बताइन्।
“स्विट्जरल्यान्ड परम्परागत कृषिमा समृद्ध देश हो र आधुनिकीकरणमा अग्रणी भूमिका खेलिरहेको छ। चिज, चकलेट र इनोभेसन जोड्दा स्विट्जरल्यान्ड बन्छ,” उनले भनिन्, “एसडिसीले उद्यमीहरूलाई सधैं नवप्रवर्तनमा हौसला दिँदै आएको छ।”
प्रमुख अतिथि दीपक विष्टले प्रविधिको सहायताले काम छिटो र सहज हुने हुँदा यसले समाजमा धेरै पक्षमा फाइदा पुग्ने बताए।
उनले प्रविधिमा आएका परिवर्तनले अवसर र चुनौती दुवै ल्याउने हुँदा युवा पुस्ताले सक्रिय भूमिका खेल्नुपर्नेमा जोड दिए।
“उद्यमशीलतामा जोखिम र अवसर दुवै हुन्छन्। अबको समय डिजिटल सार्वजनिक पूर्वाधार र डिजिटल वस्तुको बलियो समर्थन तयार गर्नुपर्छ,” उनले भने, “हरेक क्षेत्रमा नवप्रवर्तनलाई ध्यानदिएर अघि बढ्नुपर्छ।”
कार्यक्रममा विशेष अतिथि जुना माथेमाले पनि आफ्ना विचार व्यक्त गरेकी थिइन्। सातमध्ये उत्कृष्ट हुने एक कम्पनीले आफ्नो परियोजनाका लागि ६० प्रतिशत अनुदान पाउने छ भने ४०% लगानी आफैंले जुटाउनुपर्नेछ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
