काठमाडौं– बलात्कार र चोरीको कसुरमा दोषी ठहर भइ सजाय भुक्तान गरेपछि कारागारबाट छुटेका १ जनालाई प्रहरीले महिलाको हत्या अभियोगमा पुन: पक्राउ गरेको छ।
पुन: पक्राउ पर्नेमा धादिङको त्रिपुरासुन्दरी गाउँपालिका–६ गोलाङका ४० वर्षीय शिवबहादुर बस्याल छन्। धादिङको त्रिपुरासुन्दरी गाउँपालिका–६ गोलाङकी ६२ वर्षीय मनकुमारी सार्कीको हत्या आरोप प्रहरीले उनलाई पक्राउ गरेको हो।
प्रहरीका अनुसार बस्यालले कारागारबाट छुटेको दिन, मंसिर १४ गते मनकुमारीको हत्या गरेका थिए। मनकुमारीको हत्या अभियोगमा प्रहरीले बस्याल बाहेक अन्य २ जनालाई पनि पक्राउ गरेको छ। पक्राउ पर्ने अन्य २ जनामा धादिङको त्रिपुरासुन्दरी गाउँपालिका–६ गोलाङकै ५४ वर्षीय टोपबहादुर सार्की र ४० वर्षीय सुनिल नेपाली छन्।
प्रहरीका अनुसार मनकुमारीको हत्या शिवबहादुरले गरेका हुन्। टोवबहादुर र सुनिलले आर्थिक प्रलोभन देखाएपछि शिवबहादुरले हत्या गरेको प्रहरीले जनाएको छ। शिववबहादुर मंसिर १४ गते जिल्ला कारागार धादिङबाट रिहा भएका थिए। रिहा भएकै दिन शिवबहादुरले मनकुमारीको घाँटी थिची हत्या गरेको पाइएको छ।
मंसिर १५ गते बिहान ९ बजेतिर मनकुमारी आफ्नै घरमा मृत फेला परेकी थिइन्। त्यसपछि इन्सपेक्टर अभय लामाको कमाण्डमा घटनाको अनुसन्धान अघि बढाइएको थियो।
अनुसन्धानको क्रममा शिवबहादुरको संलग्नता देखिएपछि प्रहरीले उनलाई गोलाङबाटै पक्राउ गरेको थियो।
पक्राउ परेका शिवबहादुरले टोपबहादुर र सुनिलको योजनाअनुसार आफूले मनकुमारीको हत्या गरेको बताएपछि उनीहरुलाई पनि पक्राउ गरिएको प्रहरीले जनाएको छ।
पक्राउ परेका तीनै जनालाई जिल्ला अदालत धादिङबाट ७ दिनको म्याद लिएर अनुसन्धान अघि बढाइएको छ। हत्यामा प्रत्यक्ष संलग्न जोडिएका शिवबहादुर मंसिर १४ गतेमात्रै बलात्कार र चोरी घटनामा जेल परेर छुटेका व्यक्ति रहेको खुलेको छ। उनी २० महिना कारागार बसेर मंसिर १४ गतेमात्रै रिहा भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
