काठमाडौं– अन्तरजातीय विवाहको विषयलाई लिएर ३ वर्ष अगाडि रुकुमको सोती गाउँमा नवराज विकसहित ६ जनाको हत्या घटनाको मुद्दामा आज (सोमबार) पनि सुनुवाइ सुरु भएको छ।
रुकुम पश्चिम जिल्ला अदालतका न्यायाधीश डा खड्कबहादुर केसीको इजलासमा आइतबारदेखि निरन्तर सुनुवाइ सुरु भएको थियो। फैसला केन्द्रित सुनुवाइको पहिलो दिन आइतबार सरकारी वकिल र पीडित पक्षका कानुन व्यवसायीले बहस गरे। पीडितका पक्षबाट आइतबार २ जना सरकारी वकिलसहित ९ जनाले बहस गरे।
जिल्ला अदालतका सूचना अधिकारी गोविन्दप्रसाद कोइरालाका अनुसार आइतबार २ जना सरकारी वकिल र ७ जना वरिष्ठ अधिवक्ताले बहस गरेका थिए।
चन्द्रबहादुर सिंजाली र राजेन्द्र रेग्मीले सरकारी वकिलका तर्फबाट बहस गरेका थिए। पीडितका तर्फवाट वरिष्ठ अधिवक्ताहरु दिनेश त्रिपाठी, हरिप्रसाद सुवेदीसहितले बहस गरे। पीडितका तर्फबाट २४ जना वकिलले बहस गर्ने भनी वकालतानामा भरेकाले सोमबार पनि पीडित पक्षको बहस हुनेछ।
पीडित पक्षको बहसपछि प्रतिवादीका वकिलहरुले बहस गर्नेछन्। बहस गर्ने वकिलहरूको संख्या थपिन सक्ने भएकाले निरन्तर सुनुवाइ गरेर यो साताभित्र फैसला दिने अदालतको तयारी छ। अभियुक्त बनाइएका व्यक्तिहरु धेरै भएकाले उनीहरु सबैको तर्फबाट बहस गर्न समय दिनुपर्ने भएकाले समय लाग्ने सूचना अधिकारी कोइरालाले बताए। कोइरालाका अनुसार इजलासबाट समय मिलाएर बहस गराउने प्रयास पनि भइरहेको छ।
निवेदक, प्रतिवादीको बहसपछि केही समय जवाफी वहसका लागि पनि समय दिनुपर्ने भएकाले समय लाग्ने उनले बताए।
१० जेठ २०७७ मा जाजरकोटको रानागाउँका २१ वर्षीय नवराज विक साथीसहित आफ्नी प्रेमिका रुकुम पश्चिमको चौरजहारी नगरपालिका–८ सोती गाउँकी मल्ल थरकी युवतीसँग विवाहको कुरा गर्न पुगेका थिए। दलितले ठकुरीकी छोरीसँग विवाह गर्न लागेको भन्दै सोती गाउँका स्थानीयले नवराजसहित उनका साथीलाई लेखेटेर मारेका थिए।
उक्त घटनामा ६ जनाको ज्यान गएको थियो भने १२ जना घाइते भएका थिए। मृतकहरुको शव भेरी नदीमा भेटिएको थियो।
घटनाका सन्दर्भमा छानबिन गर्न नेकपा माओवादी केन्द्रका सांसद देवेन्द्र पौडेलको संयोजकत्वमा संसदीय छानबिन समिति समेत गठन गरिएको थियो। संसदीय समितिले उक्त घटना नियोजित रुपमा भएको निष्कर्ष निकालेको थियो।
घटनाका सन्दर्भमा प्रहरीको अनुसन्धानपछि सोती गाउँका ३४ जनालाई प्रतिवादी बनाउँदै रुकुम पश्चिम जिल्ला अदालतमा मुद्दा दर्ता भएको थियो। प्रतिवादीहरुविरुद्ध कर्तव्य ज्यान, ज्यान मार्ने उद्योग र जातीय छुवाछुतको कसुरमा सजाय मागदाबी गरिएको छ।
मुद्दाका अभियुक्तमध्ये जिल्ला अदालतले २३ जनालाई पुर्पक्षका लागि थुनामा पठाउने आदेश गरेको थियो। ११ जनालाई भने तारेखमा छाडिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
