काठमाडौं– उपप्रधान तथा गृहमन्त्री नारायणकाजी श्रेष्ठले पश्चिम नेपालका भूकम्प प्रभावितलाई अस्थायी आवासका लागि दिने ५० हजार रुपैयाँ एकमुस्ट दिन नसकिने बताएका छन्। यद्यपि दोस्रो किस्ता बापतको रकम दिन ढिला नगरिने उनको भनाइ छ।
बिहीवार राष्ट्रिय सभा अन्तर्गतको राष्ट्रिय सरोकार तथा समन्वय समितिको बैठकमा बोल्दै गृहमन्त्री श्रेष्ठले भूकम्प प्रभावितहरुलाई अस्थायी आवास निर्माणका लागि दिइने ५० हजार रुपैयाँमध्ये पहिलो किस्तामा नगदै २५ हजार रुपैयाँ दिइने बताए। पहिलो किस्ता बुझेर आवास निर्माणको काम सुरु गर्नासाथै बाँकी २५ हजार रुपैयाँ बैंकमार्फत् दिइने गृहमन्त्री श्रेष्ठको भनाइ छ।
दोस्रो किस्ता दिनका लागि पनि कुनै ढिलाइ नहुने उनले स्पष्ट पारे। २ किस्तामा दिइने भए पनि समयको ग्याप धेरै नहुने भएकाले एकै किस्ता दिए जसरी नै रकम प्रदान गरिने गृहमन्त्री श्रेष्ठको भनाइ छ।
गृहमन्त्री श्रेष्ठले भने, ‘५० हजार नै एकैचोटी दिन किन नहुने? त्यसो गर्दा अलि सरल हुन्थ्यो कि भन्ने छ। त्यसमा हाम्रो सानो कुराले गर्दाखेरी हामीले नगरेको। तर हामीले एकैचोटी दिने जस्तै जस्तै गरेका छौँ। एकैचोटी जस्ता त राख्दैनौँ नि। घर बनाउने अलिकति मेसो, केही न केही घर बनाउन लागेको जस्तो देखियो भने एक दिनमा हामी जुन पैला २५ हजार दिन्छौँ। भोलि, पर्सिपल्ट नै माग्यो भने अर्को २५ हजार दिइहाल्छौँ। घर बनाउन थाल्यो, अस्थायी आवास भन्ने केही त देखौँ भन्ने एउटा कुरा। दोस्रो, पहिलो किस्ता खाता छैन भने नगदमै जाओस्। पछिल्लो किस्ता खातामा जाओस्। भनेर यो खाताको समस्या हल गर्न पनि हो। तर त्यो चाहीँ एक किस्ता जस्तै हुन्छ। खाली पहिला अलिकति बनाउन खोजिएको देखिनुपर्यो। त्यसको २ दिन, ३ दिन जति दिन पछि भन्नुहुन्छ, खातामा पैसा पठाउने व्यवस्था गरेका छौँ। यो ५० हजारमा कुनै समस्या हुँदैन।’
गृहमन्त्री श्रेष्ठले अस्थायी आवास निर्माणका लागि मात्रै ५ अर्ब रुपैयाँ चाहिने बताए। उनले पुनर्निमाणको सम्बन्धमा आँकडा बनाएर दाता राष्ट्रहरु र दातृ निकायसँग छलफल गरी योजना बनाएर काम गर्ने बताए।
गृहमन्त्री श्रेष्ठले भने ‘यही अस्थायी आवासको लागि पनि हामीलाई कम्तीमा ५ अर्ब रुपैयाँ चाहिन्छ। त्यसपछाडि हामी पुनर्निमाणमा जाँदाखेरी त धेरै ठूलो रकम खर्च गर्नुपर्ने स्थिति छ। पुनर्निमाणमा पनि ठूलै खर्च हुने स्थिति छ। पुनर्निमाणको हकमा मोटामोटी आँकडा बनाएर दाता राष्ट्रहरुसँग र दातृ निकायहरुसँग नि छलफल गर्ने प्रक्रियामा छौँ। र हामी पुनर्निर्माणको योजना बनाएर अगाडि बढ्छौँ।’
बैठकमा बोल्दै गृह मन्त्रालयका सचिव दिनेश भट्टराईले जाजरकोटमा टेन्ट १ हजार ६३४ वटा, त्रिपाल ४१ हजार ४०२, कम्बल ३१ हजार ६५४, म्याट्रेस १३ हजार ४९२ र स्लिपिङ ब्याग २ हजार ४८५ पठाइएको जानकारी दिए। त्यस्तै रुकुम पश्चिममा ८०३ वटा टेन्ट, त्रिपाल २२ हजार २५०, कम्बल ६ हजार १७, पी फम ५ हजार २०१ वटा र स्लिपिङ ब्याग १ हजार ३१४ वटा पठाइएको बताए।
सचिव भट्टराईले हालसम्म आवास निर्माणका लागि जाजरकोटमा ५५ करोड, रुकुम पश्चिममा ५५ करोड, बझाङमा २५ करोड, बाजुरामा १४ करोड, सल्यानमा २ करोड रुपैयाँ गरी जम्मा १ अर्ब ५१ करोड रुपैयाँ पठाइएको जानकारी दिए।
भूकम्पमा परी जाजरकोट र रुकुम पश्चिममा गरी कुल १५४ जनाको मृत्यु र ३६६ जना घाइते भएका सचिव भट्टराईले जानकारी दिए। जाजरकोटमा पूर्ण क्षति भएको घरको संख्या ९ हजार ७९४ र आंशिक क्षति भएका घरको संख्या २४ हजार रहेको सचिव भट्टराईले जानकारी दिए। रुकुम पश्चिममा १६ हजार ५७० घरमा पूर्ण क्षति, ९ हजार ९६१ घरमा आंशिक क्षति हुनुका साथै १६ वटा सार्वजनिक भवन पूर्ण क्षति र २१ वटा आंशिक क्षति भएको जनाइएको छ। त्यस्तै, रुकुम पूर्वमा १५० घर, सल्यानमा ६०० बढी घर, रोल्पामा १०० बढी घर र प्युठानमा ३१ घरमा क्षति भएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
